Turista sa bansa, pumalo ng 313K – DOT

ni Zel Fernandez | April 26, 2022

Umakyat sa mahigit 313,050 international tourist arrivals ang naitala sa bansa matapos muling magbukas ang mga borders ng ‘Pinas sa mga turistang bakunado, magmula noong Pebrero 10 hanggang Abril 25 ngayong taon.

Sa public briefing ng Laging Handa, idinetalye ni Tourism Secretary Bernadette Romulo-Puyat na karamihan sa mga dayuhan ay nanggaling sa US, Canada, at South Korea.

Bagaman, malayo pa umano ito sa dating 8 milyong turista na dumayo sa ‘Pinas bago ang pandemya noong 2019, indikasyon pa rin umano ito na unti-unti nang sumisigla ang turismo sa bansa.

“Sa pre-pandemic levels naman with regard to international tourist arrivals, medyo malayo pa kasi nu’ng 2019, we received about 8.26 million tourists. Pero masaya tayo kasi (but we are happy because) at least, we already received 313,050 international arrivals,” ani Romulo-Puyat.

Ayon sa kalihim ng Department of Tourism (DOT), katuwang ang Department of the Interior and Local Government (DILG) ay mahigpit nilang binabantayan ang pagtalima ng mga accommodation establishments sa mga health protocols kontra-COVID-19 bilang pagsiguro sa proteksiyon ng mga turista at lokal na mamamayan sa bansa.

“’Yun na nga syempre paalala pa rin, masaya tayo na we are slowly getting back to normal pero paalala rin that we still really have to follow minimum health and safety protocols,” aniya.

Pagtitiyak ng kawani, sa oras na makakita ang ahensiya ng anumang uri ng paglabag o kapabayaan sa pagpapanatili ng kalusugan at kaligtasan sa mga establisyimento, agad itong pinadadalhan ng show cause order mula sa gobyerno.

Samantala, kung sakali umanong maulit pa ang paglabag ay awtomatiko itong ipasasara.

Libreng booster shots para sa mga Japanese tourists — DOT

ni Lolet Abania | March 17, 2022

Magbibigay ang gobyerno ng libreng COVID-19 booster shots sa mga Japanese tourists na nagnanais at nasa Pilipinas sa ngayon, ayon sa Department of Tourism (DOT).

Sa isang radio interview ngayong Huwebes, sinabi ni DOT Secretary Bernadette Romulo-Puyat na nabuo ang naturang inisyatibo katuwang sina National Task Force (NTF) Against COVID-19 chief implementer at vaccine czar Secretary Carlito G. Galvez Jr. at NTF deputy chief implementer Vince Dizon.

“We also opened pala to our Japanese tourists. Kasi ngayon pa lang sila nagbo-booster program here in Japan. Together with Sec. Galvez and Sec. Vince Dizon, ang ating mga Japanese tourists, they can come [to the Philippines] and get their booster shots for free,” pahayag ni Puyat.

“They’re very happy about that because zero lang ang quarantine nila if they get their booster shots. So they’re quite happy with our announcement,” dagdag niya.

Ayon kay Puyat, kasalukuyan siyang nasa Japan, ang bansa na isa sa mga top source markets ng Pilipinas bago pa ang pandemya, upang himukin ang mga ito at ipaalam sa kanila na ligtas nang pumunta at mag-travel sa bansa.

Aniya, nakikipagpulong siya sa mga katulad din niyang opisyal doon at sa iba’t ibang tourism organizations sa Japan.

“Talagang importante sa kanila na vaccinated tayo, ‘yung ating mga tourism stakeholders. Nakuwento ko nga na 97% vaccinated na ang ating mga tourism stakeholders and 25% na booster,” sabi ni Puyat.

“Very important sa kanila ‘yung they found out the vaccination rate in the country at continuously bumababa ‘yung ating mga kaso. So they know and important din sa kanila na nu’ng September 2020 pa lamang, we received the World Travel and Tourism Council Safe Travels stamp,” saad ng kalihim.

Ang naturang stamp ay ipinagkakaloob sa mga gobyerno at kumpanya sa buong mundo na in-adopt ang health at hygiene global standardized protocols, at kung saan sinusunod ang mga guidelines na itinakda ng World Health Organization (WHO) at Centers for Disease Control and Prevention (CDC).

Gayundin, layon nitong maibalik ang kumpiyansa ng mga travelers at makatulong sa nalugmok na travel sector na makarekober.

Sa kasalukuyan, ang Pilipinas ay tumatanggap ng business at leisure travelers mula sa 157 visa-free countries simula pa noong Pebrero 10, 2022.

Ang mga fully vaccinated lamang na dayuhang turista mula sa visa-free countries ang pinapayagang makapasok sa bansa. Kailangan din nilang magprisinta ng negative COVID-19 RT-PCR test result na kinuha ng 48-oras bago pa ang kanilang biyahe.

Gayunman, ayon kay Puyat, simula sa Abril 1, muling bubuksan ng Pilipinas ang mga borders sa lahat ng foreign tourists, kabilang na ang galing sa mga visa countries.

Mga borders, posibleng buksan sa mga dayuhang turista sa Abril — DOT

ni Lolet Abania | March 10, 2022

Posibleng mabuksan na ang mga borders para sa lahat ng mga dayuhang turista sa Abril, kung saan sa kasalukuyan ay tumatanggap lamang ang Pilipinas ng mga biyaherong mula sa visa-free na mga bansa, ayon sa Department of Tourism (DOT).

Sinabi ni DOT Secretary Bernadette Romulo-Puyat, tiwala ang ahensiya na aaprubahan ng gobyerno ang panukalang tumanggap na ng mga foreign tourists mula sa lahat ng mga bansa sa susunod na buwan.

“So far we’ve been doing well so we hope to open to all countries by April,” sabi ni Puyat sa isang interview ngayong Huwebes.

Ayon kay Puyat, sinimulan ng Pilipinas na magpapasok ng mga turista mula sa 157 visa-free countries noong nakaraang buwan at noon din ay nakatanggap na ng 73,178 tourist arrivals mula Pebrero 10 hanggang Marso 8, na sadya ring “surprising” o nakagugulat dahil inaasahan sanang dumating ang mga ito sa Hunyo.

“The reason why we started with visa-free countries was this was also the recommendation of the DFA [Department of Foreign Affairs]. They wanted to say ‘yung paunti-unti muna,” saad ni Puyat.

“They told us that they are ready to accept also, kasi they have to open the consular services all over the world so we hope that it will be approved and we will be able to accept by April,” anang opisyal.

Aniya, karamihan sa mga turista ay nagmula sa United States, Canada, Korea, Australia, Japan, Germany, at Vietnam. Ang mga foreign tourists mula sa visa-free countries ay required na magprisinta ng isang negative COVID-19 RT-PCR test result na kinuha ng 48-oras bago ang kanilang trip, kasama rin ang kanilang proof of vaccination para payagang makapasok sa Pilipinas.

Ayon pa kay Puyat, pinag-iisipan na rin ng gobyerno ang pagpapagaan ng mga requirements at payagan na ang isang negative result ng antigen test na kinuha ng 24-oras bago ang kanilang trip, habang aniya, iyong mga tinamaan na ng COVID-19 ay maaaring magpositibo sa RT-PCR ng hanggang tatlong buwan.

“I think the reopening to foreign tourists more of shows that we are slowly but surely going back to normal,” sabi pa ni Puyat.