P500 subsidy para sa mahihirap na pamilya sa katapusan pa ng Hunyo — DSWD

ni Lolet Abania | June 9, 2022

Ipinahayag ng Department of Social Welfare and Development (DSWD) na target nilang i-release ang P500 buwanang subsidiya para sa mga mahihirap na pamilya sa katapusan ng buwan.

Ayon kay DSWD spokesperson Irene Dumlao, ilang 12.4 milyong low income families, kabilang ang mga miyembro ng Pantawid Pamilyang Pilipino Program (4Ps) at ang mga social pension beneficiaries ang makatatanggap ng cash aid ng gobyerno na para sa tatlong buwan o may kabuuang P1,500.

“Inaasahan na itong P500 per month na subsidy ay maumpisahan bago magtapos ang termino ni Pangulong Duterte,” saad ni Dumlao sa isang televised briefing ngayong Huwebes.

“Isinasaayos na natin ang mga dokumento para makapag-umpisa na doon sa distribution. Ina-account na po natin kung ilan sa ating mga mahihirap na pamilya ang may existing cash cards upang sila ang unang mahatiran ng first tranche ng subsidy na mula sa national government,” sabi ni Dumlao.

Hindi naman binanggit ng opisyal kung hanggang kailan makatatanggap ng subsidiya ang mga benepisyaryo, subalit una nang sinabi ng mga awtoridad na kaya lamang isagawa ng bansa ang nasabing programa ng tatlong buwan.

Matatandaan na noong kalagitnaan ng Marso, inaprubahan ni Pangulong Rodrigo Duterte ang monthly subsidy para sa mga naturang benepisyaryo upang mabawasan ang tinatawag na economic impact ng pagtaas ng presyo ng petrolyo at mataas na halaga ng mga bilihin.

Inilarawan naman ng iba’t ibang sektor sa bansa ang subsidy bilang maliit na sustento at hindi man lang aabot sa halaga ng isang araw na gastusin ng bawat pamilya.

Binanggit din ni Dumlao na walang mga pagkaantala sa naging direktiba ng Pangulo, paliwanag niya umabot sila sa mahigit dalawang buwan bago ito ipatupad dahil sa mga kinakailangang approval.

“Hindi natin nakita na may delay, may isinaayos lang tayo ng mga kinakailangang proseso para matiyak natin na magiging maayos ang pamamahagi ng tulong na ito,” giit pa ni Dumlao.

Erwin Tulfo, napiling DSWD chief ni P-BBM

ni Lolet Abania | May 30, 2022

Si Erwin Tulfo, na isang broadcast journalist, ang napili na maging head ng Department of Social Welfare and Development (DSWD) sa ilalim ng administrasyon ni President-elect Ferdinand “Bongbong” Marcos Jr.

“He has been in the public service doing social work in 3 decades,” ani incoming Press Secretary Trixie Cruz-Angeles sa isang press conference ngayong Lunes.

“He is known for his involvement and covering the Filipinos here and abroad through his social programs and partnerships with other organizations,” saad ni Cruz-Angeles.

Pinasalamatan naman ni Tulfo si Marcos sa kanyang appointment. “Alam ko na maraming trabaho ang naghihintay sa DSWD,” pahayag ni Tulfo sa isang text message sa mga reporters.

“Ang tanging maipapangako ko lamang ay sisikapin ko na matugunan ang mga pangangailangan ng ating mga kababayang mahihirap at nangangailangan,” sabi ni Tulfo.

Una nang sinabi ni ACT-CIS party-list na sinusubukan nilang kumbinsihin ang broadcaster na kanilang maging third nominee sa House of Representative.

Ayon pa kay Cruz-Angeles, bukod kay Tulfo na tinanggap ang posisyon ang iba pang personalidad na inalok na humawak ng government posts sa ilalim ng Marcos administration ay sina Naida Angping para sa Presidential Management Staff (PMS); Amenah Pangandaman para sa Department of Budget and Management (DBM) at Atty. John Ivan Enrile Uy para Department of Information and Communications Technology (DICT).

23K food packs, ibinigay sa mga binagyo sa Eastern Visayas — DSWD

ni Lolet Abania | December 21, 2021

Nakapagbigay na ang Department of Social Welfare and Development (DSWD) ng kabuuang 23,778 family food packs sa 15 local government units (LGUs) sa Eastern Visayas na apektado ng Bagyong Odette ngayong Martes.

Ayon sa ahensiya, nakipag-ugnayan sila at katuwang ang Office of Civil Defense, Philippine Air Force, Philippine Army, at Philippine National Police para sa transportasyon ng family food packs (FFPs) patungo sa Southern Leyte:

Silago - 2,108;

Hinundayan - 2,100;

Hinunangan - 3,500;

Saint Bernard - 1,500;

Sogod - 2,400;

Maasin City - 1,000;

Liloan - 1,800;

Limasawa - 2,000;

Macrohon - 500;

Bontoc - 1,000;

San Francisco - 1,600;

San Juan - 700 at sa Leyte:

Dulag - 1,000;

Hilongos – 70;

Tacloban City - 2,500.

Bawat food pack ay naglalaman ng 6 na kilo ng bigas, 4 cans ng corned beef, 4 cans ng tuna flakes, 2 cans ng sardines, 5 sachets ng kape at 5 sachets ng cereal drink.

Ayon sa DSWD, bawat pakete ay makakapagsustena sa isang pamilya ng dalawa hanggang tatlong araw.

“These FFPs and its contents may not be sold, as it is intended for relief distribution to disaster-affected families,” batay sa statement ng DSWD.

Giit naman ni DSWD spokesperson Irene Dumlao, mayroon na silang mahigit P900 milyon halaga ng available stockpiles at standby funds para makatulong sa mga naapektuhan ng Bagyong Odette.

Sinabi rin ni Dumlao na hanggang nitong Sabado, nakapagbigay na ang DSWD ng tinatayang P3.5 milyong halaga ng assistance sa mga lugar na hinagupit ni Odette sa Caraga, Eastern at Western Visayas, at Mimaropa regions.

Paliwanag naman ng DSWD na batay sa Republic Act 10121, ang mga LGUs ang unang dapat na rumesponde sa panahon ng disasters o mga sakuna. Habang maaari namang mag-request ng karagdagang relief items mula sa ahensiya kung kinakailangan.