COVID-19 vaccines sa edad 12-15, next!

ni Lolet Abania | May 12, 2021

Pinaplano ng pharmaceutical giants na Pfizer at Moderna na kumuha ng Emergency Use Authorizations (EUA) para sa COVID-19 vaccines na ilalaan sa mga kabataan, ayon sa Department of Science and Technology (DOST).

Ayon kay Dr. Nina Gloriani, head ng vaccine expert panel ng DOST, target ng Pfizer na makakuha ng EUA sa September umano ng kasalukuyang taon, habang ang Moderna ay maaaring magkaroon na ng tinatawag nilang child-friendly vaccines sa katapusan naman ng taon.

“Ang mga pag-aaral ng Pfizer ay napakabilis for these younger children... Hintayin na lang po natin na mag-apply sila ng EUA sa atin,” ani Gloriani.

“We look forward to that kasi maa-address niya ‘yung pagbabakuna sa isang age group na hindi natin makakaya with the other vaccines,” dagdag niya.

Kamakailan, inaprubahan na ng United States ang paggamit ng Pfizer vaccines para sa mga kabataang nasa edad 12 hanggang 15-anyos.

Ayon kay Gloriani, ang mga batang nabakunahan ng Pfizer vaccines ay nagpakita ng magandang resulta dahil wala sa 1,000 mga bata na naturukan ng bakuna ang na-infect ng COVID-19.

Sinabi pa ni Gloriani, nagsasagawa na rin ang Pfizer at Moderna ng mga pag-aaral sa efficacy ng kanilang COVID-19 jabs para sa mga bata na nasa edad 6 na buwan hanggang 11-anyos.

“This is a bigger study. Siguro mga 6,000 to 7,000 ang kailangan na participants hindi kagaya nitong mga 12-15 years old na hanggang 3,000 lang ang naging participants,” sabi ni Gloriani.

Matatandaang noong Marso 2020, ipinag-utos ng pamahalaan na dapat manatili lamang ang mga menor-de-edad sa loob ng bahay matapos na isuspinde ang face-to-face classes upang maiwasan ang pagkalat ng COVID-19 sa mga classrooms at eskuwelahan at mahawahan sila ng nasabing sakit.

Clinical trial sa Ivermectin, sisimulan na — DOST

ni Ronalyn Seminiano Reonico | April 29, 2021

Isinusulong na maisagawa ang clinical trial para sa paggamit ng anti-parasitic drug na Ivermectin sa mga COVID-19 patients simula sa katapusan ng Mayo o sa Hunyo, ayon sa opisyal ng Department of Science and Technology (DOST) ngayong Huwebes.

Ayon kay Executive Director Jaime Montoya ng DOST-Philippine Council for Health Research and Development, ang trial para sa Ivermectin ay posibleng abutin nang 6 na buwan.

Pinag-aaralang gawin ang naturang trial sa Metro Manila at tinatayang aabot sa 1,200 pasyente na may mild at moderate COVID-19 cases ang inaasahang makikipag-participate.

Pahayag ni Montoya, “Based on a review of the Living CPG (Clinical Practice Guidelines) and the recommendation of the World Health Organization, these are the types of patients na insufficient ang evidence for benefit of Ivermectin.”

Ayon din kay Montoya, malaki ang pakinabang ng local trial upang malaman ang epekto ng naturang gamot sa mga Pinoy.

Aniya, “Maaaring ikaw nga ay maraming trial… Pero iba rin po siyempre ‘yung trial na mga Pilipino ang lumalahok.

“Makikita natin paano ba talaga nagre-respond ang Pilipino sa ganyang gamot at ano ba’ng side effects ang nakikita.”

Samantala, pamumunuan naman ni Dr. Aileen Wang ng Philippine General Hospital ang naturang trial.

'Pinas, gagawing testingan ng gamot ng South Korea kontra-COVID

ni Mary Gutierrez Almirañez | April 12, 2021

Gaganapin sa ‘Pinas ang clinical trial ng bakunang EuCorVac-19 na gawa ng South Korea upang labanan ang lumalaganap na COVID-19 pandemic, ayon sa Glovax Biotech Corporation ngayong araw, Abril 12.

Ayon kay CEO Giovanni Alingog, “The reason we wanted to do a clinical trial in the Philippines is most of the companies that were given EUA (emergency use authorization) in our country have not done a clinical trial locally. The reason we wanted to trial locally is to show, for ethnicity purposes, for Filipinos, that the vaccine is also effective and safe.”

Ngayong Abril ay nakatakdang isagawa ang combined phase 1 at phase 2 trial ng EuCorVac-19.

Batay pa sa pag-aaral, nagtataglay ito ng 91% hanggang 95% na efficacy rate.

Dagdag ni Alingog, “Because of the emergency purposes or the need of vaccine, we are asking the clinical research organizations and our FDA (Food and Drug Administration) to fast-track a bit our clinical trial so we can serve the Filipino people with a quality and safe vaccine from Korea.”

Samantala, iginiit naman ni Department of Health (DOH) Secretary Francisco Duque III na nakikipagtulungan na rin ang Glovax sa Department of Science and Technology (DOST) upang makapag-develop ang ‘Pinas ng sariling bakuna kontra COVID-19.

Sa ngayon, ang may emergency use authorization (EUA) pa lang na bakuna ay ang Pfizer-BioNTech, AstraZeneca, CoronaVac ng Sinovac, at ang Sputnik V ng Gamaleya Institute.