OFWs pa-Saudi, puwede na uli

ni Mary Gutierrez Almirañez | May 29, 2021

Binawi ng Department of Labor and Employment (DOLE) ang temporary suspension sa deployment ng mga overseas Filipino workers (OFWs) papuntang Kingdom of Saudi Arabia (KSA), batay kay DOLE Secretary Silvestre Bello III ngayong araw, May 29.

Aniya, "After receipt of the official communication from the Saudi government this morning which ensures us that the foreign employers and agencies will shoulder the costs of institutional quarantine and other COVID protocols upon arrival in the KSA, the temporary suspension of deployment to the Kingdom is hereby lifted.”

Inabisuhan na rin ni Bello ang Philippine Overseas Employment Administration (POEA) upang ipatupad ‘immediately’ ang pagbawi sa naunang desisyon, sapagkat naging malinaw na sa kanila na KSA employers ang magbabayad sa 10-day quarantine at iba pang quarantine protocol requirements ng mga OFWs na ide-deploy sa Saudi, at hindi ang mismong OFW.

Giit pa ni POEA Administrator Bernand Olalia, “Ipinaliwanag na po nila na hindi dapat kasama ang OFWs doon sa travel advisory kung saan may pananagutan na mag-institutional quarantine, at magbayad ng COVID-19 tests at insurance coverage.”

Matatandaan namang mahigit 400 Saudi-bound OFWs ang na-stranded sa Ninoy Aquino International Airport (NAIA) nitong Biyernes dahil sa deployment suspension.

"I understand that the suspension order drew confusion and irritation among our affected departing OFWs. Again, I apologize for the inconvenience and momentary anguish that it may have caused our dear OFWs. It was to the best interest of our OFWs that such decision had to be made," sabi pa ni Bello.

P30K benepisyo ng empleyadong nagka-COVID, kasado na

ni Lolet Abania | May 2, 2021

Hinihintay na lamang ang pirma ni Pangulong Rodrigo Duterte para sa panukalang P30,000 benepisyo na makukuha ng manggagawang tinamaan ng COVID-19, ayon kay Department of Labor and Employment (DOLE) Secretary Silvestre Bello III.

“'Yung sakit na COVID-19 [ay magiging] compensable na ‘yan, hinihintay na lamang ang approval ng ating pangulo,” pahayag ni Bello sa isang virtual interview ngayong Sabado.

Giit ni Bello, naghain ang Employees’ Compensation Commission (ECC) ng panukalang P30,000 one-time benefit na matatanggap ng isang manggagawa na nagkasakit ng COVID-19.

“Merong resolusyon ang ECC diyan. Kapag tinamaan ka ng COVID sa trabaho mo, mayroon kang assistance na P30,000. One time lang po ‘yan,” ani Bello.

Sinabi ng kalihim, ang empleyado, kahit saan man sila nagtatrabaho – micro, small at medium enterprises – ay maaaring kumuha ng naturang benepisyo sa Social Security System (SSS).

“I have no reason to doubt that the president won’t approve it…Kaya pagdating niyan sa lamesa niya, pipirmahan agad ng presidente natin ‘yan,” sabi ni Bello.

Matatandaang noong April 28, inaprubahan ng ECC na pinamunuan ni Bello ang pagkakasama ng COVID-19 sa listahan ng mga itinuturing na occupational at work-related compensable diseases.

Nangangahulugan ito na ang isang manggagawa mula sa pribado o pampublikong sektor na tinamaan ng virus ay may karapatan na makatanggap ng kompensasyon mula sa tinatawag na Employees’ Compensation Program ng ECC.

Nakasaad sa ECC board resolution 21-04-14, ang isang na-diagnose clinically ng COVID-19 at nagkaroon ng history, signs at sintomas ng COVID-19 habang suportado ng diagnostic proof, kabilang dito ang reverse transcriptase polymerase chain reaction (RT-PCR) test ay itinuturing na compensable sa alinmang sumusunod na kondisyon:

• Kinakailangang may direktang koneksiyon sa mga offending agent o event at ang isang empleyado ay nakabase sa epidemiological criteria at occupational risk (e.g. healthcare workers, screening at contact tracing teams, etc.)

• Ang trabaho ng isang manggagawa ay nangangailangan ng palagiang face-to-face at close proximity interaction sa publiko o sa mga confirmed cases para sa healthcare workers’.

• Nakuha ang COVID-19 sa pinagtatrabahuhan.

• Nakuha ang COVID-19 dahil sa pagko-commute papasok at pauwi sa trabaho.

5,000 OFWs at empleyado, babakunahan sa Labor Day

ni Mary Gutierrez Almirañez | April 28, 2021

Tatlong libong overseas Filipino workers (OFWs) at 2,000 minimum wage earners ang tinatarget mabakunahan kontra-COVID-19 ngayong darating na Labor Day, May 1, ayon kay Department of Labor and Employment (DOLE) Secretary Silvestre Bello III.

Aniya, "Humingi ako kay Galvez... binigyan naman ako ng 5,000 bakuna para sa pagbabakuna namin ng 3,000 OFWs at saka 2,000 manggagawa. Gumagawa na kami ngayon ng listahan."

Matatandaang nagsimula ang vaccination rollout sa ‘Pinas noong ika-1 ng Marso sa pangunguna ng mga frontline healthcare workers at pulis na sinundan ng mga senior citizens at may comorbidities.

Kabilang din sa mga naging prayoridad sa bakuna ang mga mayor at governor na nasa high risk areas.

Sa ngayon ay prayoridad na ring mabakunahan ang mga nasa A4 Priority Groups, kung saan kabilang ang mga frontline employees upang maabot ang herd immunity sa bansa.