EUA ng Sinopharm COVID-19 vaccines, DOH ang mag-a-apply

ni Mary Gutierrez Almirañez | May 10, 2021

Nilinaw ng Department of Health na sila ang magsusumite ng application para sa emergency use authorization (EUA) ng Sinopharm COVID-19 vaccines at hindi ang Chinese manufacturer nito, batay sa naging panayam kay DOH Secretary Francisco Duque III ngayong umaga, Mayo 10.

Aniya, “Mag-a-apply tayo. Iyan ang proseso. Iyan ang kailangang sundin na proseso, batay sa komunikasyon sa ating FDA Director General Eric Domingo.”

Sabi pa niya, "Ngayong umaga, ang DOH, mag-a-apply ng emergency use authorization sa FDA para sa Sinopharm dahil meron na tayong emergency use listing na inilabas ng WHO nu’ng Sabado.”

Sa ngayon, ang mga bakunang may EUA pa lamang ay ang Pfizer, AstraZeneca, Sputnik V, Sinovac, Johnson & Johnson, Bharat Biotech at Moderna.

Matatandaan namang nagpabakuna kamakailan si Pangulong Rodrigo Duterte at ang Presidential Security Group (PSG) gamit ang Sinopharm ng China, kahit na hindi pa iyon nagagawaran ng EUA.

'Pinas, kulang na kulang sa healthworkers… Nursing exams, pinamamadali

ni Lolet Abania | May 5, 2021

Hiniling ng Department of Health (DOH) at Inter-Agency Task Force (IATF) on Emerging Infectious Diseases na isagawa sa mas maagang petsa ang nursing licensure exams upang matugunan ang pangangailangan sa health workforce sa gitna ng pandemya.

Ayon kay DOH Undersecretary Maria Rosario Vergeire, nagkaroon na ng pag-uusap ang ahensiya at Philippine Nursing Association at Professional Regulation Commission para baguhin ang nursing exams na mula Nobyembre ay gawin itong Hunyo ngayong taon.

“Inire-request natin at inire-request ng IATF, baka puwede nang gawin ng June, so that by July, may mga fresh graduates and freshly licensed nurses na tayo na puwede na rin nating makasama dito sa ginagawa nating response,” ani Vergeire sa online briefing.

Matatandaang sinabi ng DOH na mayroong pondo para mag-hire ng maraming health workers subalit ang mga aplikante ay nananatiling mababa.

Noong nakaraang buwan, mahigit 100 health workers mula sa ibang rehiyon ang itinalaga sa Metro Manila kasabay ng pagsirit ng COVID-19 cases at mga pasyente na na-admit sa mga ospital.

6 nakapasok sa 'Pinas mula India, positibo sa COVID-19

ni Lolet Abania | May 5, 2021

Anim na biyahero mula sa India na dumating sa Pilipinas bago pa man ipinatupad ang mahigpit na border restrictions ang nagpositibo sa COVID-19, ayon sa ulat ng Department of Health (DOH).

Ayon kay DOH Undersecretary Maria Rosario Vergeire, nasa 110 travelers mula sa India ang sumailalim sa COVID-19 testing. “Anim (Six) turned out to be positive and it is now submitted to the Philippine Genome Center for whole genome sequencing,” ani Vergeire sa online briefing ngayong Miyerkules.

“Meron pong anim na hanggang ngayon ay nilo-locate pa rin natin,” dagdag ng kalihim. Matatandaang nagpatupad ang pamahalaan ng temporary ban sa lahat ng mga biyahero mula sa India upang mapigilan ang pagpasok ng isang bagong coronavirus variant na unang na-detect sa nasabing bansa. Ipinatupad ang border restrictions noong April 29 habang magtatapos ito sa May 14.

Gayunman, hindi sakop o napabilang ang mga biyahero na in transit o dumating na sa Pilipinas bago ito naging epektibo. “That’s the hope, that we can prevent the entry of specific variants into the country,” sabi ni Vergeire.

Samantala, inirekomenda ng DOH na ang mga paparating na biyahero ay dapat sumailalim sa test sa COVID-19 matapos ang pito o walong araw nang dumating sa bansa, kung saan mataas ang viral load, upang maitaboy ang posibleng positibong kaso.

“Kahit ano pa pong variant… kailangan lagi po tayong protektado, so continue doing the minimum public health standards,” ani Vergeire. Sa ngayon, nakapagtala ang bansa ng 1,075 cases ng B.1.351 o South Africa variant, 948 cases ng B.1.1.7 o United Kingdom variant, 157 cases ng P.3 o Philippine variant, at 2 kaso ng P.1 o Brazil variant.