8 patay sa Delta variant sa iba't ibang probinsiya

ni Lolet Abania | July 30, 2021

Inianunsiyo ng Department of Health na anim sa walong Delta variant na nasawi ay mga local cases.

Ayon kay DOH Undersecretary Maria Rosario Vergeire, ang mga namatay sa Delta variant na kanilang naitala ay mula sa San Nicolas, Ilocos Norte (1), Balanga, Bataan (1), Pandan, Antique (1), Cordova, Cebu (2), Pandacan, Manila (1).

Ang dalawa pang nasawi sa Delta variant ay mga returning overseas Filipinos (ROFs).

Sinabi ni Vergeire na ang mga namatay ay nasa edad 27 hanggang 78, kung saan 5 sa kanila ay lalaki.

Tatlo naman sa mga ito ay nakumpirmang hindi pa nababakunahan kontra-COVID-19 habang ang 5 ay isinailalim sa beripikasyon.

“We are continuously validating and verifying,” ani Vergeire sa briefing ngayong Biyernes.

Samantala, binanggit ng kalihim na pinag-aaralan na ng mga awtoridad ang posibleng community transmission ng mas nakahahawang Delta variant.

Aniya, ang community transmission ay pagkakaugnay ng mga kaso subalit hindi pa nila ito ma-identify.

“Sa ngayon, nakikita pa natin ang pagkaka-link ng mga kasong ito sa isa’t isa… pero siyempre, gusto pa rin nating maghanda dahil hindi po natin masasabi sa ngayon dahil hindi naman natin tine-test lahat ng merong sakit na positive sa COVID-19,” sabi ni Vergeire.

“We just need to act as if there is already this type of transmission happening in the country para mas maging cautious tayong lahat, meron tayong extra precaution. But for now, we cannot declare that because we need evidence for us to say that there is really community transmission of the Delta variant,” dagdag ng kalihim.

Sa ngayon, nakapagtala na ng 216 Delta cases sa bansa.

DOH, nanigurado na… Dagdag-oxygen vs. Delta variant

ni Lolet Abania | July 19, 2021

Nangangalap na ang Department of Health ng mga supply ng oxygen bilang paghahanda sakaling magkaroon muli ng pagtaas ng kaso ng COVID-19 dahil sa Delta variant.

Una nang nagbabala ang DOH sa posibleng pagsirit ng COVID-19 matapos na 11 local cases ng Delta variant ang nai-report sa Northern Mindanao, Metro Manila, Western Visayas, at Central Luzon.

“Tayo po ay nagpe-prepare for this Delta variant. Sabi nga natin it’s just a matter of time bago makapasok... Currently our existing oxygen supply is sufficient but we need to add additional so that we can be more prepared,” ani DOH Undersecretary at Spokesperson Maria Rosario Vergeire sa briefing ngayong Lunes, kung saan ang nasabing variant ay unang nai-report sa India.

“Our hospitals are now more guided that they should be expanding their beds already. Our local governments have been guided also they should intensify their PDITR (Prevent-Detect-Isolate-Treat-Reintegrate) response,” sabi pa ni Vergeire.

Ayon kay Vergeire, ang Delta variant ay mas transmissible at mataas ang posibilidad na maospital kapag tinamaan ang isang indibidwal nito.

“Kailangan lang po tayo ay very cautious. Ipatupad ang protocol natin for isolation of close contacts and those turning positive,” saad ng kalihim.

Kamakailan, nakapag-export ang bansa ng sobrang oxygen supply sa kalapit na bansang Indonesia upang makatulong ito sa paglaban nila sa pagtaas pa ng COVID-19 cases sanhi ng naturang variant.

Sinabi ni Vergeire na bawat pagkilos ay laging may kaakibat na panganib at isang kadahilanan ito na maaaring kumalat ang virus. Subalit aniya, patuloy naman ang pag-assess ng Inter-Agency Task Force (IATF) sa sitwasyon sa capital region.

“We will assess everyday so we can see if we need to heighten restrictions at kung kailangang magkaroon ulit ng NCR Plus bubble,” ani Vergeire.

Samantala, isang grupo ng mga private hospitals ang nagsabing mapipilitan na naman silang mag-expand sa kanilang mga intensive care units (ICUs) sakaling magkaroon ng panibagong pagtaas ng COVID-19 cases.

Ayon kay Dr. Jose Rene de Grano, head ng Philippine Hospital Association of the Philippines (PHAP), marami na sa kanilang mga healthcare workers ang nag-resign o nagpa-transfer na lamang na nakaapekto nang husto sa kanilang operasyon.

“When the surge happened in April, there were a lot of our personnel who resigned or transferred. That is why our bed capacity is limited, while other hospitals have downsized,” ani De Grano sa Laging Handa briefing ngayong Lunes.

“We have enough oxygen support, ventilators, but if there will be a surge, we cannot easily expand our intensive care units because it comes with huge expenses, with additional required equipment, as well as highly trained nurses and doctors,” sabi pa ni De Grano, kung saan ang mga pribadong ospital ay may mandato na makapag-allocate ng 30% ng kanilang capacity sa mga COVID-19 patients.

"No face shield" sa labas ng bahay, oks sa DOH

ni Lolet Abania | June 16, 2021

Maaari nang alisin ang mga face shield kung nasa labas ng bahay dahil sa mababa ang panganib ng transmission ng COVID-19 sa mga open space, ayon sa isang opisyal ng Department of Health.

Nang tanungin kung ang mga manggagawa na nagtatrabaho sa labas ay papayagan nang alisin ang kanilang mga face shields habang naka-duty, inamin ni DOH Undersecretary Leopoldo Vega na ang moisture o tubig na nabubuo sa face shields ay posibleng maka-distract sa mga workers.

“‘Yung face shields, kakailanganin naman talaga ‘yan ‘pag nasa indoor ka, nasa mall ka, or ‘pag may interaction ka face-to-face inside,” ani Vega sa Laging Handa briefing ngayong Miyerkules.

“Pero ‘pag nasa outside naman, kasi alam naman natin ang risk of transmission is very low, at lalung-lalo na kapag naglalakad ka lang sa kalye o kaya nagtatrabaho ka, kasi makaka-affect ‘yung moist nito so puwede n’yong tanggalin ‘yan,” dagdag niya.

Matatandaang umani ng kontrobersiya si Manila Mayor Isko Moreno, matapos na hilingin sa gobyerno na pag-isipan ang polisiya ng pag-oobliga ng paggamit ng face shield kapag nasa labas ng bahay.

Giit naman ni DOH Secretary Francisco Duque III, patuloy dapat na nakasuot ng face shields ang mga mamamayan dahil nananatiling mababa ang bilang ng nababakunahan ng COVID-19 vaccines. Gayundin, ang paggamit aniya ng face shield ay sinuportahan ng siyensiya.

Gayunman, hindi pa tumutugon ang DOH sa hiling na linawin ang face shield policy. Noong nakaraang taon, ayon sa DOH, nasa desisyon ng Inter-Agency Task Force on COVID-19 response (IATF) para sa piling laborers gaya ng construction workers na maaari nang alisin ang kanilang face shields. Subalit, diin ni Vega, ang face shields ay kinakailangan pa ring isuot indoors para sa “dagdag-proteksiyon” laban sa COVID-19.