ER, 150% nang puno ng Covid patients

ni Jasmin Joy Evangelista | August 29, 2021

Sa patuloy na pagtaas ng kaso ng Covid-19, nag-o-operate na umano nang lagpas sa 100% ang mga emergency room sa ilang ospital sa bansa, ayon sa Philippine College of Physicians (PCP).

Sa isang interbyu kay PCP President Dr. Maricar Limpin, sinabi niya na nasa 130% hanggang 150% na ang operasyon ng ER ng ilang ospital.

"Hindi na kami masyadong nagulat. Ang ospital ngayon, puno na [ang] emergency room. Hindi lang 100%, mahigit sa 100%," ani Limpin. Bukod sa mga punong ER, ang ibang ospital ay nauubusan na rin daw ng medical supplies at mechanical ventilators.

Ang ilang ospital umano sa Cebu City ay namimili na lamang ng mga pasyenteng bibigyan ng ventilator dahil sa kakulangan ng supply.

"Sa Cebu, kailangang mag-decide sila kung sino nangangailangan sa ventilators. Kailangan mamili kung sino mataas mag-survive versus sa hindi masyadong mataas ang chance mag-survive," dagdag pa niya.

Samantala, nasa 55% na ng mechanical ventilators sa bansa ang ginagamit, batay sa datos ng DOH kahapon.

Inarbor, wala raw rason para patalsikin… P-Du30: Kung ano'ng pagkakamali ni Duque, sa akin 'yan

ni Ronalyn Seminiano Reonico | August 21, 2021

Rumesbak si Pangulong Rodrigo Duterte sa mga humihiling sa kanyang patalsikin na sa puwesto si Department of Health Secretary Francisco Duque III.

Hirit ng pangulo, magbigay ng dahilan ang mga kritiko ni Duque upang alisin niya sa puwesto ang kalihim.

Saad ni P-Duterte, “Kawawa naman ‘yung mama. Gusto nila… they want me to fire Duque.

“Gusto mong paalisin ko? Give me a reason bakit ko paalisin. Eh, kinuha ko ‘yung tao, nakiusap. Hindi naman ‘yan nag-apply, nakiusap. Hindi nakiusap na 'Kunin mo ako.' Ako ang kumuha.

“So, kung ano’ng pagkakamali niya, sa akin ‘yan.

“You want to oust him for what? Ano ba ang nagawa niya na kasamaan? May dalawang asawa siya? Wala tayong pakialam niyan, dagdagan mo pang isa, secretary, para tatlo.”

Aniya, ang mga sinisibak lamang niya sa puwesto ay ang mga sangkot sa korupsiyon at dereliction of duty, kaya isang matinding kawalan ng katarungan umano kung sisibakin niya si Duque.

Saad pa ng pangulo, “I could be doing a great injustice. Alam mo kung bakit? Ako ang kumuha [sa kanya] and he is performing. 'Pag pinaalis ko 'yan si Duque, lifetime sabihin diyan, 'Alam mo, pinaalis ‘yan kasi may corruption sa ano.' Just imagine the injustice that you inflict on your fellow human being.

“Hindi ako ganoon kung mag-perform ka. Ngayon kung magnakaw ka riyan, puwede pa kitang ipapatay para tapos ang problema ko. Tapos niyan, pakulong ako. Okay lang 'yan.”

8 patay sa Delta variant sa iba't ibang probinsiya

ni Lolet Abania | July 30, 2021

Inianunsiyo ng Department of Health na anim sa walong Delta variant na nasawi ay mga local cases.

Ayon kay DOH Undersecretary Maria Rosario Vergeire, ang mga namatay sa Delta variant na kanilang naitala ay mula sa San Nicolas, Ilocos Norte (1), Balanga, Bataan (1), Pandan, Antique (1), Cordova, Cebu (2), Pandacan, Manila (1).

Ang dalawa pang nasawi sa Delta variant ay mga returning overseas Filipinos (ROFs).

Sinabi ni Vergeire na ang mga namatay ay nasa edad 27 hanggang 78, kung saan 5 sa kanila ay lalaki.

Tatlo naman sa mga ito ay nakumpirmang hindi pa nababakunahan kontra-COVID-19 habang ang 5 ay isinailalim sa beripikasyon.

“We are continuously validating and verifying,” ani Vergeire sa briefing ngayong Biyernes.

Samantala, binanggit ng kalihim na pinag-aaralan na ng mga awtoridad ang posibleng community transmission ng mas nakahahawang Delta variant.

Aniya, ang community transmission ay pagkakaugnay ng mga kaso subalit hindi pa nila ito ma-identify.

“Sa ngayon, nakikita pa natin ang pagkaka-link ng mga kasong ito sa isa’t isa… pero siyempre, gusto pa rin nating maghanda dahil hindi po natin masasabi sa ngayon dahil hindi naman natin tine-test lahat ng merong sakit na positive sa COVID-19,” sabi ni Vergeire.

“We just need to act as if there is already this type of transmission happening in the country para mas maging cautious tayong lahat, meron tayong extra precaution. But for now, we cannot declare that because we need evidence for us to say that there is really community transmission of the Delta variant,” dagdag ng kalihim.

Sa ngayon, nakapagtala na ng 216 Delta cases sa bansa.