Gamot sa COVID-19, nauubos na — DOH

ni Lolet Abania | August 31, 2021

Malaking hamon sa Department of Health (DOH) sa ngayon ang paghahanap ng pagkukunan ng tocilizumab, isang off-label medicine na ginagamit para gamutin ang mga COVID-19 patients.

“Talagang nahihirapan po tayo mag-source out ngayon ng tocilizumab,” ani DOH Undersecretary Maria Rosario Vergeire sa briefing ngayong Martes, kung saan nakararanas na rin ng global shortage sa naturang gamot.

“Tayo ay sumulat na sa embassy natin ng Switzerland and United States para magpatulong tayo if we can be provided that reserved na allocation, kahit man lang a portion of what should be given to other countries ay makahingi tayo,” sabi ni Vergeire.

Ayon pa sa kanya, pinag-aaralan na ng grupo ng mga eksperto mula sa Living Clinical Practice Guidelines ang posibleng alternatives sa tocilizumab, subalit aniya, kinakailangan pa ang approval mula sa Food and Drug Administration (FDA).

Sinabi naman ng kalihim na ang mga stocks ng remdesivir, isa pang off-label na gamot na ibinibigay sa mga COVID-19 patients, ay sapat pa sa ngayon.

“Meron pa po tayong mga stocks sa ibang ospital natin dito sa ating bansa and we don’t see any problems with remdesivir currently because we have a direct line also with the supplier,” sabi ni Vergeire.

Samantala, ang Pilipinas ay matinding nakikipaglaban sa ngayon sa coronavirus na pinalala pa ng mas nakahahawang Delta variant ng COVID-19, na ayon sa World Health Organization (WHO) ay pinaka-dominant variant habang kinumpirma rin nilang may community transmission na sa bansa.

“The information we have clearly shows that now, already, the Delta variant has emerged as the dominant variant,” pahayag ni Dr. Rabindra Abeyasinghe, WHO Philippines representative, sa news conference ngayong Martes.

“With this kind of transmission, with these kinds of numbers, we are in community transmission of the Delta variant,” dagdag pa ni Abeyasinghe.

Delta variant, nationwide na... COVID test, gawing libre

ni Jasmin Joy Evangelista | August 31, 2021

Naniniwala ang isang eksperto na posibleng marami na ring kaso ng Delta variant sa ibang panig ng bansa at hindi lang sa National Capital Region (NCR) at Calabarzon dahil sa patuloy na pagdami ng mga nade-detect na samples nito.

Nauna nang sinabi ng Department of Health (DOH) na nakitaan nito ng posibleng community transmission ng Delta variant ang NCR at Calabarzon.

Ngunit, maaaring kumakalat na umano ang variant sa buong bansa dahil na rin sa nakikitang hawahan ng magkakapamilya o magkakasama sa tahanan, ayon sa infectious disease specialist na si Dr. Rontgene Solante.

"The secondary attack of households sa Delta is really high compared to the non-household attack... Ang hinala ko rito, Delta is already nationwide," ani Solante.

Sa 748 samples na isinailalim sa sequencing ng Philippine Genome Center, lumalabas na 516 ang Delta variant para sa kabuuang 1,789.

Lumalabas na halos 7 sa bawat 10 samples ng mga taong na-sequence ay Delta variant ang dahilan ng pagkakasakit.

Isa sa mga nakikitang dahilan kung bakit marami pa ring nagpopositibo ay itinatago ng iba ang kanilang nararamdaman at ang iba naman ay magpapakonsulta lang kapag malala na ang sintomas.

Dahil dito, ipinayo ng mga doktor ang "health-seeking behavior" para oras na makaramdam ng sintomas, maabisuhan na sa mga dapat gawin.

Ayon naman kay Solante, mahalagang pataasin ang bilang ng nate-test para sa COVID-19 ngunit iniiwasan ng ilan dahil sa kaakibat na gastos.

"If they will offer the [COVID-19] test for free, I think that will be very important. Malaking bagay kung maibibigay ng gobyerno nang libre ang test," ani Solante.

COVID cases, aabot ng 4 M sa December

ni Jasmin Joy Evangelista | August 31, 2021

Maaari umanong umabot ng 3 hanggang 4 na milyon ang kaso ng COVID-19 sa bansa sa pagtatapos ng taon, ayon sa UP Pandemic Response Team.

Nakapagtala ang bansa ng pinakamataas nitong kaso na umabot sa 22,366 kahapon, isang araw matapos ma-detect ng DOH ang karagdagang 516 na kaso ng Delta variant.

Umabot na sa 1,976,202 ang COVID-19 cases sa bansa kung saan 148,594 pa ang nananatiling aktibo.

“The Philippines might tally up to 30,000 daily fresh cases until end of September and infections peak early October”, ayon kay Prof. Jomar Rabajante ng UP Pandemic Response Team.

"Ito pong projections namin kung titingnan, lumalabas ang cumulative cases possible tayo lumagpas ng 3 million at even 4 million bago matapos ang 2021. Hindi lang po sa NCR (National Capital Region), sa buong bansa mataas po at dire-diretsong pagtaas ang mga kaso," dagdag niya.

Inaasahan umano ng DOH na lalo pang tataas ang bilang ng mga kaso ng COVID-19 dahil sa mabilis na pagkalat ng Delta variant.

"Kailangan i-factor in din natin because this is the Delta variant...we are seeing that cases would still continue to come in until September po 'yan, saka po natin makikita bumaba," sabi ni Undersecretary Maria Rosario Vergeire.

Dahil dito, kailangan daw na patuloy na sundin ang minimum health standards at lalo pang palawigin ang vaccination program sa bansa, ayon kay Rabajante.

"Talagang dapat mas maging mabilis tayo sa pagbabakuna compared sa pagkalat ng virus," dagdag niya.