COVID-19 vaccine, start na sa Marso — DOH

ni Thea Janica Teh | January 2, 2021

Sa pagpasok ng bagong taon, sinabi ni Department of Health (DOH) Sec. Francisco Duque III na maaari nang simulan sa Marso ang pamamahagi ng bakuna laban sa COVID-19.

Aniya, “According to our vaccine czar na si Sec. Galvez, mga end of first quarter nitong taong 2021.” Dagdag pa nito, ‘pag nagsimula ito ng Marso o second quarter ng taon ay tuluy-tuloy na ang pamamahagi ng vaccine hanggang sa marating ang 60%-70% ng populasyon, dahil ang layunin umano ay maisagawa ang herd immunity.

Wala rin umanong magiging problema sa distribusyon ng bakuna dahil mayroon silang formula na susundin kung sino ang mauuna.

Mayroon umano silang 5 kategorya at ito ay healthcare workers, matatanda, may sakit, mahihirap na pamilya at uniformed personnel tulad ng AFP at PNP.

Samantala, wala namang nabanggit si Duque kung anong bakuna ang napili at ituturok sa publiko.

Nagba-bike, exempted sa face shield, pinag-aaralan ng DOH

ni Ronalyn Seminiano Reonico | December 19, 2020

Pinag-aaralan ng Department of Health (DOH) ang rekomendasyon ng publiko at mga eksperto na gawing exempted ang mga solo-riding cyclists sa pagsusuot ng face shields sa bagong polisiya bilang parte ng health protocols.

Pahayag ni Health Undersecretary Maria Rosario, “This is a form of exercise kasi and when you do your exercises, you require for oxygen.

“So, nu’ng nagpalabas po tayo ng guidelines noon sa mask, atin pong nabanggit ito at sinasabi natin na kung hindi talaga kaya ay hindi naman kailangang gawin as long as you are alone at mag-isa ka lang naman du’n sa bisikleta and you are not in a crowded place.

“So, ito pong pagpe-face shield when you do your biking ay atin pong pag-uusapan, pero nakikita po natin that we can consider this as long as alone sila at nagbibisikleta.”

Ayon din sa DOH, maglalabas sila ng joint administrative order sa pakikipag-ugnayan sa iba pang ahensiya ng pamahalaan para sa guidelines ng pagsusuot at paggamit ng face shields.

Pag-aaralan din umano ng DOH kung papayagan ang mga may sakit, ang mga nahihirapang huminga na maging exempted sa pagsusuot ng face shield.

Deadline sa submission ng hazard pay ng health workers, extended

ni Thea Janica Teh | December 9, 2020

Mas palalawigin pa ang pagpapasa ng aplikasyon ng mga health workers sa COVID-19 hazard pay, ayon sa Department of Health (DOH) ngayong Miyerkules. Ito ay matapos magreklamo ang ilang grupo ng health workers tungkol sa 1-day deadline sa pagpapasa ng mga requirements.

Nakipagkita na ang Center for Health Development (CHD) for the National Capital Region sa union leader ng mga grupo ng health workers at Hospital Industry Tripartite Council kasama ang Department of Labor and Employment (DOLE) upang sabihin na iuusog na ang deadline ng application ng hazard pay sa katapusan ng linggo.

Kaya naman maaari pang makapagpasa ng hanggang Disyembre 11, Biyernes, 5:00 ng hapon ang lahat ng kuwalipikadong health workers.

Bukod pa rito, sinagot na rin ng DOH ang napuna ni Senator Riza Hontiveros na napagsamantalahan ang lahat ng health workers sa ating bansa at sinabing nakapaloob na umano sa Joint Circulars Nos. 1 & 2 s. 2020 of the DOH and the Department of Budget and Management ang mga guidelines sa pagbibigay ng Active Hazard Duty Pay (AHDP) at Special Risk Allowance (SRA).

Sinisigurado naman ng ahensiya sa mga health workers na tutulungan ng CHD ang ospital sa pagpapatupad ng guidelines.

Aniya, “The DOH reminds implementing units, including hospitals and health facilities, to be more facilitative in the processing of these benefits. While hospitals and other health facilities may request additional requirements and impose deadlines with a view to expediting the release of AHDP or SRA, these impositions should not unduly burden our HCWs.”

Ang pagbibigay umano ng benepisyong ito ay nakapailalim din sa Republic Act 11494 o Bayanihan to Recover as One Act.