Sputnik V vaccines, piling lugar lang ang mabibigyan — DOH

ni Lolet Abania | April 24, 2021

Ipadadala lamang sa mga local government units (LGUs) ang inaasahang dumating sa bansa na doses ng Sputnik V COVID-19 vaccine na gawa ng Russia kung matutugunan ng mga ito ang karapat-dapat na storage at handling standards ng bakuna, ayon sa pahayag ng Department of Health (DOH).

Ayon kay DOH Undersecretary Maria Rosario Vergeire, ang nasabing vaccine na na-develop ng Gamaleya Institute ay kinakailangang naka-store sa madilim na lugar na may temperatura na hindi tataas sa -18 degrees Celsius, isang requirement kung saan ang ibang LGUs ay hindi ito matutugunan.

Ang temperature standards para sa Sputnik V ay mas mababa kumpara sa Sinovac at AstraZeneca, na maaaring ilagay sa normal storage facilities dahil parehong nangangailangan ang mga ito ng temperatura na nasa 2 hanggang 8 degrees Celsius.

Sa ngayon, ang dalawang brands ng bakuna ang ginagamit sa bansa para sa COVID-19 vaccination drive. Sinabi ni Vergeire na dahil sa nararapat na storage requirement, ang Sputnik V ay hindi maipapamahagi sa lahat ng rehiyon sa bansa.

“Pagdating ng Sputnik V, mayroon lang pong assigned LGUs because they have the capability to store ‘yung said vaccines... Kaya hindi natin maibigay sa lahat ng ating regions,” ani Vergeire sa briefing ngayong Sabado.

Matatandaang binanggit ng DOH na inaasahang darating ang Pfizer at Sputnik V vaccines sa katapusan ng buwan. Binigyan na ang parehong COVID-19 vaccines ng emergency use authorization ng Food and Drug Administration (FDA), isang pre-requisite para sa distribusyon at paggamit nito sa bansa.

Samantala, nitong Huwebes, may 500,000 doses ng Sinovac vaccines ang dumating sa 'Pinas. Ipapamahagi ito sa mga LGUs para ipagpatuloy ang pagbabakuna ngayong weekend, ayon kay Vergeire.

Sa datos ng gobyerno hanggang April 22, aabot na sa 1.6 milyong Pinoy ang nabakunahan kontra-COVID-19, kabilang na ang 200,000 na nakatanggap ng parehong doses ng two-jab regimen.

UK, South African at P.3 variant ng COVID-19, pataas din ang cases

ni Mary Gutierrez Almirañez | April 18, 2021

Nakapagtala ang Department of Health ng mga karagdagang kaso ng UK variant, South African variant at P.3 variant ng COVID-19 mula sa mahigit 752 indibidwal na isinailalim sa test, batay sa pinakahuling datos na inilabas ng DOH, katuwang ang University of the Philippines-Philippine Genome Center (UP-PGC) at University of the Philippines-National Institutes of Health (UP-NIH).

Ayon sa ulat, 266 ang nagpositibo sa UK variant ng COVID-19, kung saan 11 sa kanila ay mga OFWs, habang ang 188 ay local cases at ang 67 nama’y bine-verify pa. Dulot nito, umabot na sa 658 ang naitalang UK variant o ang B.1.1.7 linage ng COVID-19. Sa nabanggit na kaso, 204 sa kanila ay mga gumaling, habang 8 ang pumanaw at ang 54 ay nananatiling aktibo sa sakit.

Samantala, 351 ang nagpositibo sa South African variant o B.1.351 linage. Kabilang dito ang 15 na OFW at 263 na local cases, habang bina-validate pa ang identity ng 73 na nagpositibo. Umakyat naman sa 695 ang kabuuang bilang ng nasabing variant, kung saan 4 ang namatay at ang 293 ay gumaling na.

Dalawampu’t lima rin ang nadagdag sa P.3 variant, kaya umabot na sa 148 ang naitalang kaso nito. Tinatayang 21 sa nagpositibo ay local cases, habang ang 2 nama’y OFWs at inaalam pa ang pinanggalingan ng natitira.

Sa kabuuang bilang, pumalo na sa 926,052 ang mga tinamaan ng COVID-19 sa bansa, kung saan 203,710 ang aktibong kaso, habang 706,532 ang lahat ng gumaling at 15,810 ang mga pumanaw.

Sa ngayon ay isinasailalim sa modified enhanced community quarantine (MECQ) ang NCR Plus at inaasahang bababa pa ang hawahan ng virus dahil sa ipinatutupad na health protocols at quarantine restrictions.

922,898, nabakunahan na kontra COVID-19

ni Mary Gutierrez Almirañez | April 8, 2021

Umabot na sa 922,898 ang nabakunahan kontra COVID-19 na kabilang sa A priority list, batay sa huling datos ng Department of Health nitong Miyerkules, Abril 8.

Ayon pa sa DOH, mahigit 872,213 na ang nabakunahan ng unang dose, habang 50,685 naman ang naturukan ng pangalawang dose.

Matatandaang nagsimula ang vaccination rollout sa bansa noong ika-1 ng Marso, kung saan naunang dumating ang 600,000 doses ng Sinovac mula sa China at sinundan naman ng AstraZeneca galing COVAX facility. Nasundan pa ito ng ilang dose mula sa dalawang nasabing brand na bakuna. Samantala, inaasahan namang darating na rin ngayong Abril ang bakuna ng Pfizer sa bansa.

Sa ngayon ay tinatayang 2,525,600 doses ng bakuna na ang nai-deliver sa bansa at mahigit 77% o 1,936,600 doses na nito ang naipamahagi sa mga ospital. Sa kabuuan ay 2,670 vaccination sites ang nagsasagawa ng rollout.

Magmula naman nang maubos ang suplay ng AstraZeneca sa bansa ay pinayagan na ng Department of Health (DOH) at Food and Drug Administration (FDA) na iturok ang Sinovac sa mga senior citizens upang magpatuloy ang rollout.