Nurse, medtech at Chinese na nagbenta ng Sinovac, arestado

ni Lolet Abania | July 2, 2021

Muling ipinaalala ng Department of Health (DOH) sa publiko na ang mga COVID-19 vaccines ay hindi ipinagbibili matapos na tatlo umanong sellers ng Sinovac doses ang inaresto.

Una nang sinabi ng National Bureau of Investigation (NBI) na nadakip nila ang tatlo sa apat na suspek na sangkot sa pagbebenta ng COVID-19 vaccines.

Isang entrapment operation ang ikinasa ng NBI Task Force Against Illegal Drugs (NBI-TFAID) kung saan nadakip ang isang nurse, isang medical technologist at isang Chinese na nagbebenta umano ng Sinovac vaccines.

Nakatanggap ng impormasyon ang NBI hinggil sa pagbebenta ng grupo ng nasabing bakuna. Isang poseur buyer ang bumili sa mga suspek ng 300 doses ng CoronaVac na nagkakahalaga ng P840,000.

Ayon pa sa NBI, kadalasang buyer nito ay mga Chinese.

Inaalam na rin ng ahensiya kung saan nanggaling ang supply nila ng naturang bakuna. Nagpahayag naman ng kalungkutan si DOH Undersecretary Maria Rosario Vergeire nang mabatid ang insidente.

“Bakit kailangang magkaroon ng ganitong pagkakataon na people are taking advantage of what we have right now?” ani Vergeire sa briefing ngayong Biyernes.

Hinimok naman ng kalihim ang publiko na tumanggap lamang ng COVID-19 vaccine mula sa gobyerno at hindi sa iba pa.

“‘Wag po kayong bibili sa ibang mga tao dahil wala po silang pagkukunan ng bakunang ‘yan, because it is just national government which can access these vaccines for now,” paliwanag ni Vergeire.

“Kahit isang dose lang po ng bakuna ang nasasayang dahil sa mga ganitong pamamalakad ay napakaimportante na po para sa atin,” dagdag niya.

Ang tatlong naarestong indibidwal ay sasampahan ng kaso dahil sa paglabag sa Food and Drug Administration Act.

Sulfur sa pagsabog ng Bulkang Taal, delikado sa mata at balat

ni Ronalyn Seminiano Reonico | July 2, 2021

Nagbabala ang Department of Health (DOH) sa publiko lalo na sa mga residenteng nakatira malapit sa Bulkang Taal sa panganib na maaaring idulot ng sulfur dioxide na ibinubuga nito.

Pinayuhan ng DOH ang mga residente na magsuot ng protective gear kapag lalabas ng bahay dahil ayon kay Health Undersecretary Maria Rosario Vergeire, maaaring magdulot ng eyes, skin at respiratory system irritation ang sulfur dioxide mula sa bulkan.

Ani Vergeire, “Ang mga panganib na dulot ng pagkilos nitong bulkan ay may kaakibat din pong panganib sa ating kalusugan.”

Aniya pa, “Magsuot po kayo ng dust mask o N95 mask, proteksiyon sa mata tulad ng goggles, at proteksiyon sa balat kung kayo ay lalabas ng bahay.

“Higit sa lahat, manatili po tayong alerto sa mga kaganapang ito at sumunod po tayo sa mga warning o abiso ng inyong LGU (local government unit).”

Samantala, ayon kay Presidential Spokesperson Harry Roque, patuloy pa rin ang pagpapalikas sa mga residente ng high-risk barangays katulad ng Laurel at Agoncillo at sa iba pang munisipalidad ng Batangas.

Saad pa ni Roque, “LGUs are leading the efforts on the ground through their Disaster Risk Reduction and Management Offices with the support of counterparts in the line agencies.

“The Department of Social Welfare and Development (DSWD) Region 4-A is on heightened alert and has stockpiles of relief support consisting of food packs amounting to 1.4-M pesos and non-food items worth 11-M pesos.”

Nagsagawa naman umano ng Joint Task Force Taal ang Armed Forces of the Philippines Southern Luzon Command upang tumulong sa mga operasyon ng Regional Disaster Risk Reduction and Management Council at LGUs.

Alerto rin ang Philippine National Police (PNP) at nagpadala na ng mga sasakyan ang Philippine Coast Guard (PCG) Logistics Systems Command na magagamit sa humanitarian assistance.

Saad pa ni Roque, “We ask residents in the areas surrounding the volcano lake to remain vigilant, take precautionary measures, cooperate with their local authorities should the need for evacuation arise.”

Pagbabakuna ng Sinovac, stop muna — DOH

ni Lolet Abania | June 29, 2021

Maaari lamang maipagpatuloy ang paggamit ng COVID-19 vaccine ng Sinovac sa Taguig City at iba pang mga lugar kapag ang Chinese drugmaker ay nakapagsumite na ng certificate of analysis (COA) para sa pinakabago nilang shipment na dumating sa bansa.

Paliwanag ni Department of Health (DOH) Undersecretary Maria Rosario Vergeire, ang COA ay nagsesertipika na ang nai-deliver na vaccines ay nasa maganda at mabuting kalidad.

Ang pinakabagong shipment ng 1 milyon doses ng Sinovac vaccines ay dumating sa bansa kahapon, Lunes. “The COA coming from the manufacturer, especially for Sinovac, usually comes in later,” ani Vergeire sa briefing ngayong Martes.

“Kailangang inaantay natin ‘yan bago ma-administer o ibigay sa ating mga kababayan [ang bakuna].” Samantala, ang lokal na pamahalaan ng Taguig ay nag-anunsiyo ngayong umaga na pansamantalang suspendido ang paggamit ng Sinovac vaccines habang hinihintay ang approval ng DOH sa nasabing doses na kasalukuyang naka-store sa cold chain facility ng siyudad.

Tiniyak naman ni Vergeire sa publiko na ang Sinovac vaccine ay nananatiling epektibo sa isang indibidwal kahit pa ang dapat na second dose ay hindi natanggap ng eksaktong 28 araw matapos ang first shot.

“Ayon po sa ating vaccine expert panel, you can have your second dose about three to six months after,” sabi ng kalihim.

“Pero ‘wag ninyo namang patatagalin… In order for you to get that full protection, kailangan may second dose ka at agad-agad, ‘pag ikaw ay naka-schedule na, kunin mo na,” dagdag ni Vergeire.