House-to-house bakuna, aprub sa DOH

ni Lolet Abania | July 31, 2021

Sa inaasahang pagsasailalim ng National Capital Region sa enhanced community quarantine (ECQ) sa Agosto 6 hanggang 20, inaprubahan ng Department of Health (DOH) ang mas ligtas na paraan ng pagbabakuna, ang house-to-house vaccinations.

Ayon kay DOH Undersecretary Maria Rosario Vergeire, mas higit na makatutulong sa mga kababayan ang bahay-bahay na pagbabakuna para matiyak na mababakunahan ang mga komunidad kontra-COVID-19 habang magiging mas ligtas din ang mga indibidwal dahil sa may mga mag-iikot na lamang na mga health workers sa halip na pumila sila sa mga vaccination sites.

“Sa tingin namin, maganda ‘yan na strategy, kasi una sa lahat, hindi magkukumpul-kumpol ang mga tao. Ang iikot po, ang [mga magbabakuna] at hindi na kailangang pumunta ng mga tao sa ibang lugar para magpabakuna,” ani Vergeire sa press briefing ngayong Sabado nang umaga.

Maliban dito, magkakaroon pa rin ng pagbabakuna sa mga vaccination sites subalit bubuo ang ahensiya ng mas ligtas na pamamaraan gaya ng pagkakaroon ng scheduling upang maiwasan ang pagdami ng mga tao habang isasagawa ito sa mas malalaking sites para masunod ang physical distancing.

“Gagawa tayo ng safe vaccination sites kung saan sisiguraduhin natin na hindi tayo magkukumpulan kapag tayo ay magpapabakuna na. There will be scheduling, we will be using bigger vaccination sites. Mas madali po ang mobilization ng [babakunahan] and [magbabakuna] para makapagpabakuna tayo ng mas marami,” sabi ni Vergeire.

Una nang sinabi na ipapatupad ang ECQ sa NCR simula sa Agosto 6 hanggang 20 sa gitna ng panganib ng mas nakahahawang Delta variant ng COVID-19.

Gayunman, ayon sa Malacañang, magpapatuloy ang pagbabakuna sa mga lugar kahit na isinailalim sa ECQ.

Dagdag na 97 kaso ng Delta variant, naitala

ni Lolet Abania | July 29, 2021

Nakapagtala ang Department of Health (DOH) ngayong Huwebes ng 97 karagdagang kaso ng mas nakahahawang Delta COVID-19 variant kaya umabot na sa 216 ang kabuuang kaso.

Ayon sa DOH, ang 88 sa bagong nai-report ay local cases, 6 ay returning overseas Filipinos (ROFs), habang ang 3 iba pang kaso ay bineberipika pa. Sa anim na ROFs, 2 ay seafarers mula sa MT Clyde and Barge Claudia, kung saan ang naturang barko ay kasalukuyang nakahimpil sa lalawigan ng Albay, habang 4 ay crew members ng MV Vega na dumating mula sa Indonesia.

Sinabi pa ng DOH, ang 94 sa pinakabagong Delta variant cases ay nakarekober na, habang ang tatlo ay namatay. “The DOH is coordinating with the respective local government units to determine other information, such as exposure and vaccination status,” batay sa pahayag ng DOH.

Samantala, 83 ang nadagdag sa Alpha variant cases habang 127 sa Beta variant cases na na-detect sa pinakabagong genome sequencing run, kung saan may kabuuang 1,858 Alpha cases at 2,146 Beta cases na sa 'Pinas. Sa pinakabagong kaso ng Alpha variant, 58 ay local at 25 naman ang bineberipika.

Nakarekober na sa sakit ang 70 cases habang bineberipika pa ng mga awtoridad ang 13 iba pa. Sa kabuuang 127 bagong Beta cases, 87 ay local at 40 naman ang patuloy na bineberipika. Isang kaso rito ay nananatiling active, 86 ang nakarekober at ang kasalukuyang estado ng 29 ay bineberipika pa.

Nakapagtala naman ang DOH ng 22 dagdag na kaso ng P.3 variant na unang na-detect sa Pilipinas. “Following the detection of additional cases with variants of concern, it is imperative for local government units to immediately crush clusters of infection and observed increases in cases in their respective jurisdictions to reduce transmission,” ayon sa ahensiya.

6 rehiyon, binabantayan ng DOH sa biglang pagtaas ng COVID

ni Lolet Abania | July 26, 2021

Anim na rehiyon ang mino-monitor ngayon ng Department of Health (DOH) matapos na magpakita ng tinatawag na “trend reversal”, mula sa negatibo ay naging positibo sa 2-linggong case growth rate na nagresulta sa pagtaas ng COVID-19 infections.

Ayon kay DOH Undersecretary Maria Rosario Vergeire, ang anim na region na kanilang mino-monitor ay Metro Manila, Cagayan Valley, Central Luzon, Calabarzon, Central Visayas, at Northern Mindanao.

Paliwanag ni Vergeire, ang reproduction number ay bilang ng mga tao na bawat isang kaso nito na maaaring maka-infect, kung saan nakapagtala ng 1.009 sa Metro Manila, 0.95 sa Cagayan Valley, 1.12 sa Central Luzon, 0.98 sa Calabarzon, 1 sa Central Visayas, at 0.91 sa Northern Mindanao.

Kapag ang reproduction number ay 1 o mas mataas pa, ibig sabihin, nagpapatuloy ang COVID-19 transmission.

Sa buong bansa, lumabas na tumaas ang mga kaso ng COVID-19 ng 1% nito lamang Hulyo 11 hanggang 24, subalit aniya, dapat na maging maingat sa paggamit ng salitang “surge” para ilarawan ang pagtaas ng infections.

“Ang surge, meron ‘yang definition sa epidemiology which is not what’s happening right now. Tumataas mga kaso — that, we can verify,” paliwanag ni Vergeire.

Ayon din kay Vergeire, ang Cordillera at Ilocos regions ay nakapagtala naman ng isang positive 2-linggong case growth rate nitong anim na linggo lamang, habang ang Northern Mindanao at Davao region ay maingat nilang binabantayan dahil sa mataas na ICU utilization rate.

Mino-monitor din ng DOH ang 26 probinsiya na nakapagtala ng mataas na average daily attack rate at low-risk hanggang moderate-risk sa 2-linggo case growth rate subalit hindi na binanggit ng ahensiya ang mga lugar.

Nakaalerto naman ang mga awtoridad matapos na kumpirmahin ng DOH ang local transmission ng mas nakahahawang Delta variant.

Sa ngayon, nasa 119 kaso na ang tinamaan ng Delta variant, habang 12 ang nananatiling active case.