UV lamps nabibili online, wa' epek kontra-COVID-19 — DOH

ni Lolet Abania | August 18, 2021

Ipinahayag ng Department of Health (DOH) na ilan sa mga UV lamps, gaya ng nabibili mula sa mga online stores, ay hindi nakapagbibigay ng proteksiyon laban sa COVID-19.

Subalit ayon kay DOH Undersecretary Maria Rosario Vergeire, ang mga UV lamps ay mabuti lamang sa mga healthcare settings o sa mga ospital. “Meron pong klase ng UV lamp na ginagamit po talaga sa mga hospital settings at mga klinika,” paliwanag ni Vergeire sa isang online forum ngayong Miyerkules.

Sinabi ni Vergeire na ang mga items na binibili online, gaya ng handheld wands o iba pang katulad ng UV lamps ay wala talagang naidudulot na proteksiyon kontra-COVID-19.

Hindi rin inirekomenda ng DOH ang paggamit ng mga personal air purifiers dahil sa kawalan nito ng siyentipikong ebidensiya na epektibo laban sa naturang sakit.

Ayon sa kalihim, may iba pang non-pharmacological interventions na hindi rin suportado ng mga eksperto gaya ng foot baths at misting tents kaya wala ring epekto na panlaban sa virus.

Mariin namang inirerekomenda ng mga eksperto ang mga surgical masks, face shields o goggles, at standard personal protective equipment (PPE) para sa mga health workers kahit na hindi direktang nag-aalaga ng COVID-19 patients o mga suspected cases lamang. Payo pa ng mga eksperto na gumamit din ng mga nararapat na agents sa paglilinis at disinfection ng mga lugar.

Giit din ng mga eksperto sa publiko ang pagsusuot ng mga face mask at face shield, paggamit ng mga high efficiency particulate filters, mga N95 mask at protective physical barriers na makatutulong sa pag-iwas sa pagkahawa sa COVID-19.

Inirekomenda naman ng DOH ang palaging paggamit ng mga surgical mask, lalo na kapag nasa mga lugar na mataas ang bilang ng mga kaso ng COVID-19.

Suplay ng tangke ng oxygen, tagilid — Duque

ni Ronalyn Seminiano Reonico | August 14, 2021

Siniguro ng Department of Health (DOH) na sapat ang suplay ng oxygen sa bansa ngunit ayon kay Secretary Francisco Duque III, posible umanong magkaroon ng kakulangan sa suplay ng tangke.

Aniya sa isang panayam, “Okay naman (ang oxygen supply) kasi palagi kaming nagpupulong ni Secretary Ramon Lopez ng DTI dahil siya ang nakikipag-ugnayan sa mga oxygen manufacturing companies.

“Ang sinasabi nila nu’ng huli kaming nag-usap, kung 203 tons of oxygen per day ang nagagamit, kaya nilang triplehin o kaya nilang gawing 605 tonnage per day ang isu-supply nila.”

Samantala, nanawagan din si Duque sa publiko na huwag mag-hoard ng mga oxygen tanks dahil posible umanong magkaproblema sa suplay ng mga tangke.

Aniya pa, “Inaantay ko pa rin ang pag-aangkat ng karagdagang tangke na walang kargang oxygen. ‘Yung tangke lang. Kasi ‘yung oxygen, meron, eh. Pero baka sa tangke, magkaproblema.”

Samantala, panawagan din ni Duque sa publiko, “Nananawagan ako sa ating mga kababayan na huwag kayong mag-hoard ng mga oxygen, unless meron kayong prescription ng mga doktor. Hayaan n’yo po 'yung mga tangke na umikot, hindi puwedeng nakaistasyon sa bahay ninyo ang mga tangke. Kailangan pong may sirkulasyon ang mga tangke na tuluy-tuloy na kapag naubos, ire-refill.”

COVID-19 positivity rate sa ‘Pinas, umakyat na sa 20.3%

ni Ronalyn Seminiano Reonico | August 10, 2021

Umakyat na sa 20.3 percent ang COVID-19 positivity rate sa bansa kung saan ayon sa Department of Health (DOH), isa sa limang katao ang nagpositibo sa Coronavirus.

Ayon sa DOH, isinagawa ang 51,296 tests noong Agosto 6 kung saan 20.3% ang nagpositibo. Ito ang highest positivity rate na naitala simula noong Abril 10.

Samantala, noong Lunes ay nakapagtala ang DOH ng 8,900 na karagdagang kaso ng COVID-19 at pumalo na sa 1,667,714 ang kabuuang bilang ng Coronavirus cases sa Pilipinas.

Sa 78,480 aktibong kaso ng COVID-19 sa bansa, 94% ang nasa mild condition, 2.1% ang asymptomatic, 1.7% ang severe, at 1% naman ang nasa kritikal na kondisyon.

Umakyat din naman sa 1,560,106 ang bilang ng mga nakarekober sa COVID-19 matapos maitala ng DOH ang 7,937 bilang ng mga pasyenteng gumaling na.

Noon namang Agosto 8, naitala ng DOH ang 287 bilang ng mga pumanaw sa COVID-19 at nadagdagan pa ito ng anim kahapon at sa kabuuan ay pumalo na sa 29,128 ang death toll.