1,273 na kaso ng Delta variants sa 'Pinas

ni Lolet Abania | August 23, 2021

Pumalo na sa 1,273 ang tinamaan ng mas nakahahawang Delta variant ng COVID-19 matapos na makapagtala ang Department of Health (DOH) ngayong Lunes ng 466 bagong kaso nito sa bansa.

Ayon sa DOH, sa nabanggit na bilang, 442 kaso rito ay local, 14 ay returning overseas Filipinos (ROFs), at ang 10 ay bineberipika pa sa ngayon.

Ang mga local cases ay na-detect sa mga lugar sa Metro Manila - 201 cases, Central Luzon - 69 cases, Cagayan Valley -7 cases, Calabarzon - 49 cases, Mimaropa - 14 cases, Bicol Region - 4 cases, Western Visayas - 52 cases, Central Visayas - 19 cases, Northern Mindanao - 6 cases, Davao Region - 11 cases, SOCCSKSARGEN - 7 cases, Ilocos Region - 3 cases.

Sinabi pa ng DOH na sa 466 bagong kaso, isa lamang ang nananatiling active, walo naman ang nasawi at 457 ang nakarekober na.

“All other details are being validated by the regional and local health offices,” ayon sa statement ng ahensiya.

Una nang inianunsiyo ng DOH ngayong Lunes na mayroon nang community transmission ng Delta variant sa Metro Manila at Calabarzon, kung saan may tinatawag na ‘clustering of cases’ at walang mga link sa mga nahawahang indibidwal.

“Analysis of the latest sequencing results for the determination of community transmission is ongoing for other regions,” sabi ng DOH.

12.87 M Pinoy fully vaccinated na — NTF

ni Lolet Abania | August 19, 2021

Nasa tinatayang 41 porsiyento na ng eligible population sa Metro Manila ang fully vaccinated laban sa COVID-19 hanggang nitong Agosto 18.

Ayon kay National Task Force Against COVID-19 deputy chief implementer Vince Dizon sa Palace news conference ngayong Huwebes, may kabuuang 3.2 milyong vaccine doses na ang kanilang na-administer sa National Capital Region ngayong Agosto o nasa 178,000 jabs ang average kada araw.

Tiwala rin si Dizon na ang target na inoculation rate na 50% ay makakamit ng bansa hanggang sa Agosto 31.

Ayon sa Department of Health (DOH), mula noong Marso 1, 2021 ay nakapag-administer na ang pamahalaan ng 29,127,240 shots, kung saan nasa 16,250,043 ang nakatanggap ng unang doses habang ang bilang ng mga fully vaccinated na Pilipino ay nasa 12.87 milyon hanggang Agosto 18.

Samantala, sinabi ni Dizon na nakapagsasagawa naman ang bansa ng average na 60,000 COVID-19 tests kada araw mula ito noong Agosto 11 hanggang 17 at umaabot din ang mga tests ng 67,000 sa loob ng isang araw.

Subalit, ayon sa testing czar, hindi pa ito sapat habang plano niyang kausapin ang Philippine Health Insurance Corp. (PhilHealth) hinggil sa reimbursement ng mga gastusin ng mga accredited testing laboratories.

“We will communicate with PhilHealth in the coming days to facilitate the reimbursement so that these laboratories will be able to purchase supplies and conduct tests more quickly,” ani Dizon.

P700K high-end laptops ng DOH, kanselado

ni Ronalyn Seminiano Reonico | August 19, 2021

Kinansela ng Department of Health (DOH) ang pagbili ng apat na set ng high-end laptops na nagkakahalagang P700,000 na dapat ay gagamitin para sa “data analysis” team ng ahensiya.

Pahayag ni DOH Knowledge Management and Information Technology Service Director Enrique Tayag sa isinagawang Blue Ribbon Committee hearing para sa pandemic response funds ng ahensiya, “Kinansel na po namin ‘yan, sapagkat naghahanap kami ng funds para sa kailangan ng aming CHD (Centers for Health Development), particularly diyan sa Baguio General Hospital and Medical Center kasi kailangan po nila ng IT support.”

Aniya pa, “‘Yan ay gagamitin sana ng aming mga developers. Hindi naman puwede na ‘yung ordinaryong laptop lamang.

“‘Yung opisina ko kasi, kailangan namin, kami ‘yung gumagawa ng mga registry. Halimbawa, ‘yung bakuna registry, kailangan naming mailagay at ma-visualize para maiparating sa mga policy makers kung ano ‘yung datos at kailangan.”

Samantala, hindi sinabi ni Tayag kung ano ang brand ng mga naturang laptops dahil hindi naman umano natuloy ang pagbili ng ahensiya ngunit aniya, “May analytics, so kailangan namin talaga ng mas upgraded na computer. Kung hindi kasi, kung ordinaryo lang, mabagal, eh, inaantay ‘yung analytics.”