DOH, nanawagan para sa donasyon ng dugo

ni Lolet Abania | January 28, 2022

Nananawagan ang Department of Health (DOH) sa mga eligible na indibidwal na mag-donate ng kanilang dugo sa gitna ng kakulangan sa suplay nito sa mga blood centers.

Ayon kay DOH Undersecretary Maria Rosario Vergeire, maaaring ma-access ng mga indibidwal ang listahan ng mga blood donation centers sa pamamagitan ng website: https://tinyurl.com/DONATEBLOODPH.

“Bukod sa makakatulong ang inyong dugo sa pagligtas ng buhay, marami din po benepisyo para sa inyo ang pagdo-donate ng dugo,” sabi ni Vergeire sa isang Palace briefing ngayong Biyernes.

“Kabilang na diyan po ang pagbaba ng risk of heart attack, pagtulong sa pagpapanatiling malusog ang inyong atay, at nakakatulong din po ma-improve ang inyong cardiovascular health,” paliwanag ng kalihim.

Ayon sa DOH, ang mga indibidwal na nasa pagitan ng edad 16 at 65-anyos, na tumitimbang ng hindi bababa sa 50 kilograms ay eligible na mabigay ng kanilang dugo.

Gayundin, hindi dapat sila sumailalim sa minor o major surgeries, bagong tattoos, body piercings, o tumanggap ng anti-rabies/anti-tetanus vaccine nitong nakalipas na taon.

Binanggit rin ng DOH na hindi dapat sila nasangkot sa tinatawag na “high-risk behaviors” gaya ng casual sex o mayroong multiple sexual partners, bukod sa iba pang kadahilanan.

“Sa ngayon po mayroon tayong kakulangan sa supply ng dugo sa atin pong mga blood centers. Nananawagan po kami sa ating publiko na kung kayo po ay eligible, kayo po ay maaaring mag-donate ng dugo para po sa mga nangangailangan nating kababayan,” giit pa ni Vergeire.

3 pa nasawi sa Omicron variant — DOH

ni Lolet Abania | January 26, 2022

Nakapagtala ang Department of Health (DOH) ng tatlo pang nasawi mula sa mga Omicron variant cases sa bansa, kaya umabot na sa kabuuang lima ang namatay sa naturang sakit.

Sa isang mensahe sa mga reporters ngayong Miyerkules, sinabi ni DOH Undersecretary Maria Rosario Vergeire na lahat silang lima ay mga indibidwal na may comorbidities.

“Three are seniors and all have comorbidities. One partially vaccinated, one unvaccinated, and the remaining 3 are still for verification,” sabi ni Vergeire.

Una nang iginiit ng DOH na ang mga senior citizens, may mga comorbidities, at mga hindi bakunadong indibidwal ay nananatiling may panganib sa Omicron, ang mas nakahahawang variant ng COVID-19.

“While Omicron mostly presents with asymptomatic and mild disease, our data shows that those most at risk for fatalities are still the elderly and those with comorbidities and unvaccinated,” ayon sa unang pahayag ng DOH.

Ang naunang dalawang nasawi ay mula sa nakumpirmang Omicron cases, kung saan sila ay mga unvaccinated senior citizens na may pre-existing medical conditions.

Gayunman, ayon sa DOH, matapos ang kanilang beripikasyon, isa sa naunang dalawang nasawi ay partially vaccinated o nakatanggap ng unang dose ng COVID-19 vaccine.

Sa ngayon, nakapagtala na ang bansa ng kabuuang 535 Omicron cases.

DOH: 7 laboratoryo nationwide, itatayo sa mga piling ospital

ni Lolet Abania | January 25, 2022

Pitong subnational laboratories ang itatayo sa mga piling regional hospitals sa buong bansa bilang bahagi ng pagsisikap na mapahusay ang kapasidad ng bansa na maka-detect ng mga vaccine-preventable diseases, ayon kay Department of Health (DOH) Usec. Maria Rosario Vergeire.

Kabilang sa mga ospital na pagtatayuan ng mga laboratoryo ay ; Jose B. Lingad Memorial Regional Hospital; Western Visayas Medical Center; Vicente Sotto Memorial Medical Center; Zamboanga Medical Center; Southern Philippines Medical Center; at Cotabato Medical Center.

“So ito po mga regional hospitals natin ito and we found it fit and appropriate na mag-umpisa tayo dito kasi meron na talaga silang proseso, sistema, at istruktura,” ani Vergeire sa isang media briefing ngayong Martes.

Ayon kay Vergeire, magbibigay din ang ahensiya ng karagdagang equipment at supplies.

“Nakapag-commit po at tutulungan tayo ng World Health Organization (WHO) para sa necessary equipments and supplies nitong pitong subnational labs,” sabi pa ni Vergeire, kung saan aniya, ang WHO ay magpo-provide naman ng P36 milyong halaga.

Gayundin, sinabi ng kalihim na makatutulong ito sa healthcare system ng bansa.

“Bagamat may pandemya, mabuti rin mabigyan natin ng pansin ang mga sakit kagaya ng measles, rubella, at iba pa,” saad ni Vergeire.