Local transmission ng Omicron subvariant BA.2.12.1, na-detect na — DOH

ni Lolet Abania | May 17, 2022

May na-detect nang local transmission ng Omicron subvariant BA.2.12.1 sa bansa. Ayon kay Department of Health (DOH) Undersecretary Maria Rosario Vergeire, tatlong bagong kaso ng subvariant ang na-detect sa Western Visayas region.

Sa press briefing ngayong Martes, sinabi ni Vergeire na isa sa tatlo ay fully vaccinated na returning overseas Filipino (ROF) mula sa United States, habang ang dalawa ay local cases.

Sinabi ni Vergeire na sa dalawang local cases, ang isa ay fully vaccinated habang bineberipika pa ang isa. Umabot naman sa kabuuang bilang na 17 ang BA.2.12.1 cases sa bansa.

Ayon sa DOH, sa naturang bilang, 16 ay local cases – dalawa sa National Capital Region, 12 sa Puerto Princesa City, at dalawang iba pa sa Western Visayas. Isa pang kaso ay ROF na naninirahan sa Western Visayas.

Sa naturang briefing, ipinaliwanag naman ni Vergeire na ang local transmission ay hindi kapareho ng community transmission.

“Hindi pa ho ito community transmission kung saan malawakan na ang pagkalat kung kaya’t hindi na matre-trace ang linkages ng bawat kaso,” sabi ng opisyal.

Binanggit din ni Vergeire na nakikipagtulungan na ang DOH sa mga local governments upang mapaigting ang tinatawag na four-door strategy laban sa COVID-19.

“Pinapaalala po namin sa ating publiko ang pagpapairal ng disiplina sa pagsunod sa minimum public health standards, lalo’t higit dapat magpabakuna at tumanggap na ng booster shots upang manatiling protektado,” giit pa ni Vergeire.

77 M indibidwal, target na maturukan laban sa COVID-19 hanggang Hunyo — DOH

ni Lolet Abania | May 14, 2022

Target na ngayon ng gobyerno para sa kanilang COVID-19 vaccination program na makapagbakuna ng nasa 77 milyong indibidwal o 85% ng eligible population sa pagtatapos ng Hunyo, ayon sa Department of Health (DOH).

“Our target would be 77 million individuals by the end of June. This is 85% of our targeted eligible population which is 90 million,” ani DOH Undersecretary at spokesperson Maria Rosario Vergeire sa Laging Handa briefing ngayong Sabado.

“Currently that is our working target. We already were able to vaccinate 68.5 million Filipinos. We expect only a little number, we hope to reach them by the end of June,” dagdag ng opisyal.

Ini-report naman ni Vergeire na may 7,407 indibidwal ang nakatanggap ng COVID-19 vaccine sa mga vaccination sites malapit sa mga polling precincts noong Mayo 9, Election Day.

“This is something small kung ikukumpara natin sa pang-araw-araw nating accomplishment pero maganda na rin po kasi nakita natin na 'yung ating mga kababayan interesado at willing magpabakuna kahit na pagkatapos pa ng eleksyon na ubod ng init ng araw,” pahayag ni Vergeire.

Kaugnay nito, ang Bangsamoro Autonomous Region in Muslim Mindanao (BARMM) ay kasalukuyang nagsasagawa ng special vaccination days dahil ito sa kanilang mababang vaccination turnout. Gayundin, ang DOH ay nag-a-assist sa Quezon sa Region 4-A, at Regions 4-B, 5, 7, at 12 upang madagdagan ang antas ng pagbabakuna kontra-COVID-19 sa mga naturang lugar.

3 brands na lang ititira.. COVID-19 vax stocks, gagamitin na — DOH

ni Lolet Abania | April 11, 2022

Hindi na kukuha ng partikular na COVID-19 vaccine brands ang gobyerno mula sa ibang mga bansa habang sinisinop na ngayon ang listahan ng mga natitirang bakuna para gamitin at nakatakdang bawasan na ito sa dalawa hanggang tatlong brands na lamang, ayon sa Department of Health (DOH).

Sa isang interview ngayong Lunes kay DOH Undersecretary Maria Rosario Vergeire, tinanong ang opisyal kung itinutulak ng DOH sa Food and Drug Administration (FDA) na tanggalin na ang partikular na vaccine brands mula sa Emergency Use Authorization (EUA) para maengganyo ang mas marami na magpabakuna laban sa COVID-19, ipinaliwanag niya na gagawin lamang nila ito kapag ang mga vaccines ay nakatanggap na ng kanilang Certificate of Product Registration (CPR).

“Meaning, it has finished and it has been evaluated that it can have this CPR. Once we have that and it is already included in our law for vaccines, then the EUA will cease to be authorized or cease to exist,” saad ni Vergeire. Aniya, kapag nangyari ito, ang gobyerno ay may isang taon para sa transition sa CPR.

“What we are doing right now is we are trying to streamline our vaccine brands whereby we are not ordering anymore some of the vaccine brands. We are just using it up, finishing the existing stocks,” ani opisyal. “Moving forward, we will just have two to three brands in the country,” dagdag ni Vergeire.

Ang EUA ay isang awtorisasyon na inisyu para sa mga unregistered drugs at vaccines sa isang public health emergency gaya ng COVID-19 pandemic.

Sa kasalukuyan, ang FDA ay inaprubahan ang EUA para sa Pfizer, AstraZeneca, Moderna, Janssen, Coronavac, Sputnik V, Covaxin, Sinopharm, at Covovax COVID-19 vaccines.

Una nang nai-report ni Presidential Adviser for Entrepreneurship Jose “Joey” Concepcion III na tinatayang 27 million shots na na-acquire ng gobyerno ay mag-e-expire sa Hulyo kapag hindi ito nagamit.

Gayunman, ayon kay Vergeire sa parehong interview, mas mababa na lamang sa 10% ng kabuuang bilang ng COVID-19 vaccines na nakuha ng gobyerno ang kinokonsiderang naaksaya o nasayang dahil sa tinatawag na logistical issues.