BA.2.12.1 Omicron subvariant, 22 na.. 5 bagong kaso na-detect sa Western Visayas — DOH

ni Lolet Abania | May 31, 2022

Limang karagdagang kaso ng Omicron subvariant BA.2.12.1 ang na-detect sa bansa sa Western Visayas region, ayon sa Department of Health (DOH).

Ito ang inanunsiyo ni Health Promotion and Communication Service Director Dr. Beverly Ho sa DOH briefing ngayong Martes na aniya, nabatid na tatlo sa mga bagong kaso ay fully vaccinated na mga returning overseas Filipinos (ROFs) mula sa United States.

Ayon sa DOH, na-detect din ang Omicron subvariant mula sa dalawang local cases na parehong fully vaccinated. Dahil dito, umabot na ngayon sa kabuuang bilang na 22 cases ang Omicron subvariant BA.2.12.1 sa bansa matapos na madagdag ang limang bagong kaso nito.

Mga locally-acquired ang 18 rito, kung saan 2 sa National Capital Region, 12 mula sa Puerto Princesa sa Palawan, at 4 sa Western Visayas. Habang ang 4 na infected ng virus ay mga ROFs na naninirahan sa Western Visayas.

Matatandaan na noong Mayo 17, kinumpirma ni DOH Undersecretary Maria Rosario Vergeire na ang bansa ay naka-detect na rin ng local transmission ng Omicron subvariant BA.2.12.1, na may bagong kaso naman na natukoy sa Western Visayas region.

DOH: 3 close contacts ng unang kaso ng Omicron subvariant BA.4, asymptomatic

ni Lolet Abania | May 24, 2022

Asymptomatic lahat ang tatlong naging close contacts ng kauna-unahang kaso ng Omicron subvariant BA.4 na isang Pilipino na nanggaling sa Middle East, ayon sa Department of Health (DOH) ngayong Martes.

Sinabi ni Dr. Alethea de Guzman, officer-in-charge ng DOH Epidemiology Bureau, ang pasyente, na hindi pa nabakunahan kontra COVID-19 at asymptomatic, ay may travel history mula sa Qatar at South Africa.

Ayon kay De Guzman, nakumpleto naman ng returning Filipino worker ang kanyang mandatory quarantine na 14-day isolation mula Mayo 4 hanggang 18, bago pa naging close contact ang tatlong miyembro ng kanyang household, kung saan lahat sila ay asymptomatic at fully vaccinated na rin.

Ayon naman sa DOH, ang testing status ng mga close contacts ay kanila nang bineberipika. Una nang klinasipika ng European Center for Disease Prevention and Control (ECDPC) ang BA.4 bilang variant of concern (VOC), kung saan ito ay maaaring mas transmissible o “cause worse illness.”

Batay sa mga pag-aaral, ang sublineage ay maaaring hindi mag-cause ng severe COVID-19 symptoms kumpara sa ibang Omicron subvariants subalit posibleng mapuno ang mga ospital ulit dahil sa kanyang transmissibility.

Dengue cases sa Central Visayas, tumaas — DOH

ni Lolet Abania | May 24, 2022

Nakapagtala ang Department of Health (DOH) ng pagtaas ng bilang ng dengue cases sa Central Visayas ngayong taon.

Ayon sa DOH Region 7, umabot sa 3,177 ang mga kaso ng dengue sa lugar na nai-record mula Enero 1 hanggang Mayo 7. Ang Cebu Province, ang nangunguna na may pinakamaraming dengue cases na 1,132 na naitala, kasunod ang Cebu City na may 708, Bohol na may 468 at Lapu-Lapu City na may 444 kaso.

Hanggang noong Mayo 7, nasa 31 naman ang nasawi sa naturang sakit sa buong rehiyon. Naitala ang mga ito sa Cebu City na 11 ang namatay, 10 sa Cebu Province, 6 sa Lapu-Lapu City, dalawa sa Negros Oriental at dalawa sa Mandaue City.

Sinabi ni Dr. Mary Jean Loreche, tagapagsalita ng DOH-Region 7, ang mga nagdaang pag-ulan at bagyo ang ilan sa mga tinitingnan nilang dahilan ng pagtaas ng kaso ng dengue sa naturang rehiyon.

“Lahat ‘yan has affected actually the accumulation of these waters that are stagnant,” saad ni Loreche sa isang radio interview ngayong Martes.

Paalala naman ni Loreche sa publiko na paigtingin pa ang isinasagawang 4S strategy kontra dengue. Ang 4S strategy ay Search and destroy mosquito-breeding sites; Self-protection measures; Seek early consultation of symptoms; at Support spraying or fogging upang mapigilan ang pagdami ng mga kaso dengue.