Palit-bakunang expired — DOH.. 300K COVID-19 vaccines darating sa Hunyo 20

ni Lolet Abania | June 7, 2022

Nasa tinatayang 300,000 COVID-19 vaccines mula sa COVAX Facility ang nakatakdang dumating sa Hunyo 20, bilang kapalit sa mga expired doses ng bansa, ayon sa Department of Health (DOH) ngayong Martes.

“We are still ongoing with our negotiations with them but by June 20, may initial na tayong replacements coming from COVAX and this will be worth 300,000 vaccines,” ani DOH Undersecretary Maria Rosario Vergeire sa isang media briefing.

“So tapos sa mga susunod pa na negosasyon may mga madadagdag pa na papalitan nila,” dagdag ng opisyal. Una nang sinabi ni DOH Secretary Francisco Duque III na ilang 3.6 milyong expired COVID-19 vaccine doses ay nakatakdang palitan ng COVAX Facility.

Ayon kay Duque, nakipag-usap na sila sa mga COVAX representatives at hiniling sa mga ito na i-replace hindi lamang ang mga donasyong vaccine na malapit nang mag-expire kundi pati na rin ang mga na-procure na ng bansa.

10 bagong kaso ng BA.5 at BA.2.12.1 subvariants ng Omicron, naitala — DOH

ni Lolet Abania | June 7, 2022

Nakapagtala ang bansa ng 10 karagdagang kaso ng mas nakahahawang Omicron subvariants BA.5 at BA.2.12.1, ayon sa Department of Health (DOH) ngayong Martes.

Sinabi ni DOH Undersecretary Maria Rosario Vergeire na sa latest sequencing na ginawa mula sa 190 samples lumabas na may 114 bagong kaso ng Omicron, kung saan tatlo rito ay BA.5 cases at pito ang BA.2.12.1 cases.

Sa tatlong BA.5 cases, dalawa ay mula sa Calabarzon habang ang isa ay bineberipika pa. Ayon kay Vergeire, bineberipika naman ang lokasyon ng indibidwal pero fully vaccinated na ito laban sa COVID-19, habang ang isang kaso mula sa Calabarzon ay unvaccinated.

“Sa kasalukuyan unknown pa ang exposure ng mga individuals dahil we are still undergoing verification regarding their travel history,” saad ni Vergeire sa isang media briefing ngayong Martes. Inaalam na rin ng mga awtoridad ang kanilang mga sintomas at naging close contacts.

Gayunman, sinabi ni Vergeire na ang mga kaso ay itinuturing ngayong nakarekober na. Aniya, dalawa sa mga samples ay nakolekta noong Mayo 23 habang isa ay nakolekta naman noong Mayo 12. Dahil dito, ang kabuuang bilang ng kaso ng BA.5 sa bansa ay lima matapos na ma-detect ang dalawang naunang BA.5 cases sa Central Luzon.

Samantala, sa pitong kaso ng BA.2.12.1 subvariant, tatlo ay mula sa National Capital Region (NCR), isa sa Ilocos Region, isa mula sa Cagayan Valley, isa sa Calabarzon, at isa mula sa Bicol Region.

Sinabi ni Vergeire na tatlo rito ay fully vaccinated, tatlo ang hindi pa nabakunahan, at isa ay bineberipika pa. Ayon pa ng opisyal, na sa naitalang Omicron cases, 103 ay local cases, tatlo ay returning overseas Filipino (ROF), habang walo ay bineberipika pa.

Hirit sa Marcos administration.. Face mask mandate, ituloy pa rin — DOH

ni Lolet Abania | June 4, 2022

Iminungkahi ni Department of Health (DOH) Secretary Francisco Duque III sa papasok na administrasyong Marcos na huwag munang alisin ang ipinatutupad na face mask mandate kahit pa bumaba na ang bilang ng COVID-19 cases nang mas mababa sa 200 na naitala kamakailan.

Sa isang radio interview ngayong Sabado, sinabi ni Duque na maliban sa pagbabakuna ng tinatayang 70 milyong indibidwal laban sa COVID-19, ipapasa ng administrasyong Duterte sa susunod na administrasyon ang malawakang masking compliance ng mga Pilipino.

Batay ani Duque sa John Hopkins University, ang populasyon ng masking mandate compliance ay nasa 91% hanggang 96%.

“Huwag natin tanggalin ito muna. Premature eh,” diin ni Duque. “Let’s keep it at that. ‘Wag muna natin tanggalin ang ating mga mask lalo na nag-full capacity na ang transport sector, nag-full capacity na ang establishments,” sabi pa niya.

Giit naman ni Duque na sa kabila ng iba’t ibang super-spreader events sa katatapos na elections period at pagsulpot ng mga subvariants ng Omicron, hindi nagkaroon ng surge sa bilang ng mga daily cases ng virus.

“Nag-plateau tayo, mababa na ang mga kaso. Hopefully ay bumaba pa ito below 100 [cases] per day. Nakikita naman natin nasa less than 200 [per day] nitong mga nakaraang mga linggo,” saad ni Duque.

“Ibig sabihin niyan ‘yung masking mandate natin, pagsunod ng Pilipino sa minimum public health standards ay napakamataas,” pahayag pa niya.

Umaasa naman ni Duque na ipagpapatuloy pa rin ng susunod na administrasyon ang face mask mandate. Una nang sinabi ni Pangulong Rodrigo Duterte na ang mandatong pagsusuot ng face masks ay ili-lift o aalisin sa Pilipinas kapag natapos na ang kanyang termino.

“Ipagpatuloy na lang ng susunod na administrasyon … ‘wag tanggalin completely,” pahayag ni Duque.