1.2K COVID-19 daily cases sa katapusan ng Hunyo, posible — DOH

ni Lolet Abania | June 18, 2022

Posibleng umabot sa 800 hanggang 1,200 kada araw ang maitatalang COVID-19 cases sa bansa sa katapusan ng Hunyo, kung ang pinakabagong serye ng pagtaas nito ay napapanatili, ayon sa Department of Health ngayong Sabado.

“Ang meron tayo, projections that by the end of June, maaari na aabot tayo to 800 to 1,200 cases per day kung magtutuloy-tuloy ang mga kaso natin sa ngayon,” sabi ni DOH Undersecretary at Spokesperson Maria Rosario Vergeire sa Laging Handa briefing.

“These projections are not cast in stone. These are just used for us to prepare,” giit niya. Subalit, iba ang pananaw ni Vergeire sa tinuran ni DOH Secretary Francisco Duque III nitong Biyernes, kung saan sinabi ni Duque na inaasahan niya ang posible aniyang, “minor and short-lived COVID-19 surge.”

“Let us not call it a surge. When you talk about a surge, it is a sudden increase in the number of cases,” paliwanag ni Vergeire.

“If we look at it, just like what I said, yes it is increasing but it is not sudden and the additional cases are not that numerous,” pahayag ni Vergeire sa pinaghalong Ingles at Filipino.

16 bagong kaso ng Omicron subvariants BA.5 at BA.2.12.1, naitala — DOH

ni Lolet Abania | June 15, 2022

Nasa 16 na bagong kaso ng mas nakahahawang Omicron subvariants BA.5 at BA.2.12.1 ang na-detect sa bansa, ayon sa Department of Health (DOH) ngayong Miyerkules.

Sinabi ni DOH Undersecretary Maria Rosario Vergeire na sa pinakabagong sequencing na isinagawa ay lumabas na may 6 na bagong kaso ng BA.5 habang 10 bagong kaso naman ng BA.2.12.1.

Sa nai-record na BA.5 cases, dalawa ay mula sa National Capital Region (NCR), habang tig-1 mula sa Cagayan Valley, Western Visayas, Northern Mindanao, at isa na ang address nito ay bineberipika pa.

Para sa naitalang BA.2.12.1 cases, apat ay mula sa NCR, dalawa mula sa Calabarzon, at tig-1 mula sa Cagayan Valley, Bicol Region, Western Visayas, at ang isa ay returning overseas Filipino (ROF).

Dating POA president, inendorso bilang DOH chief

ni Lolet Abania | June 14, 2022

Inendorso ng Philippine Orthopaedic Association (POA) ang kanilang dating presidente para maging susunod na kalihim ng Department of Health (DOH).

Sa isang statement of support, sinabi ni POA president Frederic Joseph Diyco na pinamunuan ni Dr. Jose Pujalte ang POA sa kabila ng mga hamon at kaguluhan sa panahon ng kanyang termino bilang pangulo ng kanilang organisasyon.

“As Medical Chief of the Philippine Orthopedic Center, he has steered the institution to newer heights through vast improvements and projects making this the Apex Center for Orthopedics in the country,” ani Diyco.

“With his vast experience, the POA believes that having Dr. Pujalte at the helm of the Department of Health will ensure continuous improvement in the health system of the Philippines,” dagdag ni Diyco.

Samantala, wala pang napipili si President-elect Ferdinand Marcos Jr. para maging DOH secretary sa ilalim ng kanyang administrasyon.

Sinabi naman ni outgoing DOH Secretary Francisco Duque III na lahat ng potential secretaries ay mahuhusay at kwalipikado sa posisyon, subalit tumanggi itong magbigay ng pangalan.