6,425 active cases, naitala.. 777 bagong kaso ng COVID-19 — DOH

ni Lolet Abania | June 25, 2022

Nakapagtala ang Department of Health (DOH) ngayong Sabado ng 777 bagong mga kaso ng COVID-19, ang pinakamataas na single-day tally simula noong Marso.

Dahil dito, umabot na sa 3,700,028 cases ang nationwide tally habang ang bilang ng active cases ay umakyat naman sa 6,425 mula sa 6,068 nitong Biyernes, batay sa latest data ng DOH. Ani DOH, ang nai-record na bilang ng mga bagong kaso ngayong Sabado ay nalampasan pa ang tally nitong Biyernes na 770.

Ang mga top regions na may mga COVID-19 cases nitong nakalipas na dalawang linggo ay National Capital Region (NCR) na nasa 3,455 kaso, kasunod ang Calabarzon na may 1,211, ang Western Visayas na may 601, Central Luzon na nasa 460, at Central Visayas na nasa 310 cases.

Umakyat naman ang mga nakarekober na sa virus sa 3,633,096 cases, habang ang mga nasawi ay nananatiling 60,507.

Hanggang nitong Hunyo 23, ang bed occupancy rate sa bansa ay nasa 17.9%, na may 5,304 beds na okupado at nasa 24,325 naman ang bakante.

Ini-report din ng DOH na may kabuuang 19,068 indibidwal ang na-test nitong Hunyo 24, habang nasa 322 testing laboratories ang nag-submit na ng data.

5 lugar sa NCR, idineklarang moderate risk ng COVID-19 — DOH

ni Lolet Abania | June 25, 2022

Limang lugar sa National Capital Region (NCR) ang idineklara ng Department of Health (DOH) na nasa moderate risk matapos ang patuloy na pagtaas ng bilang ng mga COVID-19 cases.

Sa interview sa Laging Handa briefing ngayong Sabado, inanunsiyo ni DOH spokesperson at Undersecretary Maria Rosario Vergeire ang mga sumusunod na lugar na isinailalim ngayon sa moderate risk classification:

• Pasig

• San Juan

• Quezon City

• Marikina

• Pateros

Ayon sa DOH, ang isang lugar na naka-classified bilang moderate risk kung ito ay may positive two-week growth rate sa bilang ng mga COVID-19 cases at average daily attack rate (ADAR) sa pagitan ng 1 hanggang 7.

Ang ADAR ay insidente na nagpapakita ng average number ng mga bagong kaso sa isang period kada 100,000 katao.

“Kapag tiningnan natin, ang kanilang mga growth rate ay lumalagpas ng 200% kasi nanggagaling sa mababang numero, biglang nagkaroon ng kaso kaya tumaas ang growth rate,” paliwanag ni Vergeire.

Gayunman, sinabi ni Vergeire na isa lamang sa limang nabanggit na lugar ang mayroong bahagyang pagtaas sa kanilang hospital utilization na may mild at asymptomatic admissions.

“Even though these five areas are under moderate risk classification, only one of them had a slight increase in hospital admissions and the rest are less than 50%,” pahayag ni Vergeire na pinaghalong Filipino at Ingles.

Subalit aniya, sa kabila na ang NCR ay mayroong tinatawag na “slightly high” positivity rate ng mahigit sa 5%, hindi pa nakikita ng DOH na kailangan na ng rehiyon na i-escalate ito sa mas mataas na alert level dahil mas tinitinggan ng gobyerno ang mga naire-record na hospital admissions. “Escalation to Alert Level 2, hindi pa ho natin nakikita,” ani Vergeire.

“Even though the positivity rate is increasing, as long as we can maintain our hospitals not getting overwhelmed, as long as there are less severe and critical [cases], our system is okay,” dagdag niya.

Ayon pa sa opisyal, hindi rin kailangan na maalarma sa pagtaas ng kaso ng COVID-19. “Hindi po kailangan mabahala, pero kailangan vigilant tayong lahat,” sabi ni Vergeire.

Nitong Miyerkules, sinabi ng DOH na ang Pilipinas ay nasa low risk pa rin ng COVID-19 kahit pa nakapag- record ng kapansin-pansing pagtaas ng coronavirus cases.

Paliwanag ni Vergeire, ang low risk ay ang ADAR na nananatiling mas mababa sa 1 kada 100,000 populasyon.

Hirit sa next admin.. Mandatong pagsusuot ng face mask, i-extend — DOH

ni Lolet Abania | June 23, 2022

Iminungkahi ni outgoing Department of Health (DOH) Secretary Francisco Duque III na palawigin ang mandatong pagsusuot ng face mask na ipinatutupad sa bansa dahil ito sa mga naitatalang kapansing-pansing pagtaas ng mga kaso ng COVID-19.

“Well, kung ako tatanungin mo, I will recommend that it should be extended because there’s already an increasing number of cases,” pahayag ni Duque sa isang interview ng CNN Philippines ngayong Huwebes.

Bukod sa COVID-19, ayon kay Duque, makatutulong ang face mask para maiwasan ang iba pang sakit gaya ng influenza, bacterial pneumonia, monkeypox, at asthma.

“So dapat ipagpatuloy na lang dahil maraming value add naman ang masking. Hindi lang laban sa COVID-19. Maraming laban sa influenza, bacterial pneumonia, ang dami pang mga sakit,” saad ni Duque.

Sa kabila ng pagtaas ng mga kaso ng COVID-19 nitong nakalipas na mga araw, ayon sa DOH, nananatili ang bansa na nasa low-risk classification na may average daily attack rate ng mas mababa sa 1 kada 100,000 population.

Una nang sinabi ni Pangulong Rodrigo Duterte na ang mandatong pagsusuot ng face masks ay hindi babawiin hanggang sa katapusan ng kanyang termino sa Hunyo 30.

Samantala, sinabi rin ni Duque sa parehong interview na umaasa siyang ang susunod na administrasyon ay magiging mas bukas sa isang polisiya na magma-mandate sa COVID-19 vaccination subalit may mga exceptions.

Binigyan-diin naman ni Duque na ang pagtaas ng mga kaso ay posibleng aniya, dahil sa maraming tao ang hindi na nagko-comply sa minimum health standards, hindi lahat ng qualified individual ay tumatanggap ng kanilang booster shot, at ang pagpasok ng mas nakahahawang mga subvariants ng Omicron.

Gayundin aniya, maaaring resulta ng tinatawag na waning immunity ng COVID-19 vaccines. “Ang problema natin talaga is wala tayong vaccine mandate. I broached that idea but that was thumbed down by Congress,” sabi ni Duque.

“So we’ll see if next Congress might be more receptive to a possible policy… mandating vaccination but with clear exceptions. Hindi naman lahat talaga pwedeng bakunahan,” dagdag ng opisyal.