Banat ni DFA Sec. Locsin sa China, pinalagan ni Spox Wenbin

ni Ronalyn Seminiano Reonico | May 4, 2021

Hindi pinalagpas ng China ang naging matapang na pahayag ni Department of Foreign Affairs (DFA) Secretary Teodoro Locsin, Jr. kamakailan laban sa naturang bansa dahil sa patuloy na presensiya ng mga Chinese vessels sa West Philippine Sea (WPS).

Pahayag ni Foreign Ministry Spokesperson Wang Wenbin sa regular press briefing sa Beijing, "Facts have proven time and time again that megaphone diplomacy can only undermine mutual trust rather than change reality.

"We hope that [a] certain individual from the Philippine side will mind basic manners and act in ways that suit his status.”

Noong Lunes, matatandaang nag-tweet si Locin ng: “China, my friend, how politely can I put it? Let me see… O… GET THE F*** OUT. What are you doing to our friendship? You. Not us. We’re trying. You. You’re like an ugly oaf forcing your attentions on a handsome guy who wants to be a friend; not to father a Chinese province."

Ayon kay Presidential Spokesperson Harry Roque, humingi ng paumanhin si Locsin sa Chinese ambassador, ngunit paglilinaw ng Foreign Affairs secretary, tanging kay China's Foreign Minister Wang Yi lamang siya nag-sorry.

Saad pa ni Locsin, “To my friend Wang Yi only. Nobody else.”

Nilinaw naman ni Wenbin na mananatili ang kanilang pagtulong sa Pilipinas sa kabila ng mga isyu sa WPS.

Saad pa ni Wenbin, "China has always been and will remain committed to properly handling differences and advancing cooperation with the Philippines through friendly consultation, and will continue to provide assistance within its capacity to the Philippines in its efforts to fight the epidemic and resume economic development.”

Pagdye-jet ski sa WPS vs. China P-Du30: Joke lang 'yun!

ni Mary Gutierrez Almirañez | May 4, 2021

Nilinaw ni Pangulong Rodrigo Duterte na wala siyang ipinangako sa mga naging talumpati nu’ng nakalipas na 2016 national election hinggil sa pagbawi niya ng West Philippine Sea (WPS) sa China, batay sa kanyang public address kagabi, Mayo 3.

Aniya, “I never, never, in my campaign as President promise the people that I would retake the West Philippine Sea. I did not promise that I would pressure China.”

Taliwas ito sa naging pahayag niya, kung saan matatandaang sinabi niya sa isang televised debate noong 2016 na, “Pupunta ako sa China. ‘Pag ayaw nila, then I will ask the Navy to bring me to the nearest boundary diyan sa Spratlys, Scarborough. Bababa ako, sasakay ako ng jet ski, dala-dala ko 'yung flag ng Filipino at pupunta ako doon sa airport nila, tapos itanim ko. Then I would say, ‘This is ours and do what you want with me. Bahala na kayo.’”

Sa kahiwalay na talumpati ay sinabi niyang isa lamang iyong biro at hindi siya makapaniwalang pinaniwalaan iyon ng mga Pilipino.

Paglilinaw pa ni Pangulong Duterte, "When I said I would go to China on a jet ski, that's nonsense. I don't even have… It's just talk. I'm surprised you believed it."

Ipinaliwanag niyang nawala ang West Philippine Sea sa ‘Pinas sa kasagsagan ng termino ni dating Pangulong Benigno Aquino III kaya hindi siya ang dapat sisihin sa nangyayari ngayon.

Tinakot din niyang susuntukin si dating Department of Foreign Affairs (DFA) Secretary Albert del Rosario kung hindi ito titigil sa pagiging ‘rude’ sa China.

Giit niya, “Itong Albert na ito, ako pa ang sinisisi. Makita kita, suntukin kita, eh. Buang ka… Pagdating ko, 'and’yan na iyong barko ng Tsina, atin ang wala.”

Dagdag pa niya, “Just because we have a conflict with China, does not mean to say that we have to be rude and disrespectful. As a matter of fact, we have too many things to thank China for, the help in the past and itong mga tulong nila ngayon.”

Sa ngayon ay China ang may pinakamalaking naitulong sa ‘Pinas pagdating sa distribusyon ng mga bakuna kontra COVID-19. Tinatayang bilyun-bilyong halaga na rin ang ipinautang ng China sa ‘Pinas upang tulungan ang bansa na makabangon sa lumalaganap na pandemya.

Biyaherong galing India, bawal sa ‘Pinas

ni Mary Gutierrez Almirañez | April 26, 2021

Napagkasunduan ng Department of Foreign Affairs (DFA) at Department of Health (DOH) na pagbawalang makapasok sa ‘Pinas ang mga biyaherong galing India upang maiwasan ang banta ng COVID-19, ayon kay DOH Undersecretary Maria Rosario Vergeire ngayong araw, Abril 26.

Aniya, “Pinag-uusapan na po namin ngayon with DFA so that we can recommend to IATF if ever we will find that cause para po talagang i-ban muna temporarily just for us to prevent further spread of the disease here in the country.”

Kahapon ay naging record breaking ang naitalang 349,691 na nagpositibo sa India sa loob lamang ng 24 oras.

Lumalaganap na rin sa iba’t ibang bansa ang Indian variant ng COVID-19 kaya upang mapigilan ang pagpasok nito sa ‘Pinas ay inirerekomenda na ng DOH at DFA ang travel restriction na inaasahang sasang-ayunan ng Inter-Agency Task Force (IATF).

Giit pa ni Vergeire, “Up until now, we can say that we still have not detected it here although we are still looking at our records, baka meron tayong nakita before.”

Sa ngayon ay United Kingdom variant, South African variant, Brazilian variant at P.3 variant ng COVID-19 pa lamang ang mga nade-detect sa bansa.