Itinaas sa Alert Level 4.. Mandatory repatriation ng mga Pinoy sa Ukraine, ipapatupad — DFA

ni Lolet Abania | March 7, 2022

Itinaas na ng Department of Foreign Affairs (DFA) ngayong Lunes ang crisis alert level sa Ukraine sa Alert Level 4 habang tumitindi ang pananakop ng Russia sa naturang bansa.

Sa ilalim ng Alert Level 4, ipapatupad ng DFA ang mandatory evacuation ng mga Pilipino sa Ukraine, kung saan gastos ito ng gobyerno.

“Due to the rapidly deteriorating security situation in Ukraine, the Department of Foreign Affairs has raised the crisis alert level for all areas in Ukraine to Alert Level 4 (Mandatory Repatriation),” batay sa inilabas na pahayag ng DFA ngayong Lunes.

Gayundin, ang mga Pinoy sa Ukraine ay aasistihan ng Philippine Embassy in Poland.

“Filipinos in Ukraine will be assisted by the Philippine Embassy in Poland and the Rapid Response Team, which are currently assisting Filipino nationals for repatriation and relocation,” ayon sa DFA. Marami na ring Pilipino ang nakabalik na ng bansa habang ang iba ay nakuhang makatakas doon patungo sa kalapit na mga bansa.

Una nang sinabi ng DFA na may nananatili pa na tinatayang 116 Pinoy sa Ukraine. Ayon kay DFA Undersecretary Sarah Arriola, hanggang nitong Huwebes, 93 Pilipino na ang umalis ng Ukraine mula sa 209 na naitalang bilang ng ahensiya. Aniya, may 45 Pinoy pa ang nananatili naman sa Kiev.

21 Pinoy seafarers sa Ukraine, safe na sa Moldova — DFA

ni Lolet Abania | March 2, 2022

Dalawampu’t isang Filipino seafarers ang ligtas nang nakarating sa Republic of Moldova na nagmula sa Ukraine, batay sa ulat ng Department of Foreign Affairs (DFA) ngayong Miyerkules.

Ayon sa DFA, naibiyahe ang all-Filipino crew ng MV S-Breeze, mula sa Chornomosk, Ukraine sa tulong ni Philippine Honorary Consul in Moldova na si Victor Gaina at sa pakikipag-ugnayan ng Philippine Embassy in Budapest. Sa report, dumating ang mga Pinoy seafarers sa Moldova ng dalawang batch, noong Pebrero 27 at nitong Marso 1.

Ang mga seafarers ng bulk carrier MV S-Breeze ay naka-drydock para sa ginagawang repair ng barko sa Ilyichevsk Ship Yard sa Port of Odessa, Ukraine simula pa noong Enero 27.

Ayon sa DFA, ang mga crew ay nag-i-stay sa mga accommodations ng naturang barko subalit humiling ng repatriation ang mga ito dahil na rin sa lumalalang labanan sa pagitan ng Russia at Ukraine. Sinabi pa ng ahensiya na tinatayang nasa 27 Pinoy na ang nailikas mula sa Ukraine patungong Moldova.

“Both the Philippine Embassy in Budapest and the PH Consulate in Chisinau assured that they will arrange the repatriation of the seafarers to Manila at the soonest possible time,” pahayag ng DFA.

Samantala, tinatayang 13 Pinoy mula sa Ukraine ang dumating sa bansa nitong Martes ng gabi. Sila ay bahagi ng 40 evacuees na umalis ng Kyiv patungong Lviv at tinanggap ni DFA Secretary Teodoro Locsin Jr. sa Poland border.

22 Pinoy na nasa Ukraine, nakatakdang i-repatriate — DFA

ni Lolet Abania | February 27, 2022

Dalawampu’t dalawang Filipinos na apektado ng invasion ng Russia sa Ukraine ang naghihintay na ng kanilang repatriation sa bansa, ayon sa Department of Foreign Affairs (DFA).

Sa isang tweet ngayong Linggo ni DFA Undersecretary Sarah Lou Arriola, sinabi nitong sa kabuuang bilang na Pinoy, apat ang nasa western city ng Lviv sa Ukraine, habang 13 ay nasa Warsaw, Poland, at 5 naman sa Moldova.

Ayon pa kay Arriola, anim na Pinoy na ang nakabalik sa bansa. Kinumpirma naman ni Arriola sa isang interview na ang 13 na nasa Poland ay naghahanda nang umuwi ng Pilipinas. Aniya, ang mga naturang Pinoy ay tumawid sa Polish border mula sa Ukraine at nakasama na ni DFA Secretary Teodoro Locsin, Jr.

Ipinahayag din ni Arriola na 181 Filipinos ang lumipad patungong Lviv mula sa capital city Kyiv, kung saan maraming nagaganap na sagupaan.

Ilang Pinoy naman aniya, ang ayaw na iwanan ang nasabing bansa dahil sa mga asawang nilang Ukrainians. Ayon pa kay Arriola, mayroon ding mga Pinoy household service workers sa Kyiv na nagsabing mag-e-evacuate sila kasama ang kanilang mga employers.

Ngayong Linggo (oras sa Manila), ipinahayag ni Ukranian President Volodymyr Zelenskiy na ang mga tropa ng kanilang bansa ay patuloy na lalaban sa mga Russian forces.

Una nang sinabi ng DFA na ang mga nangangailangan ng repatriation assistance ay pinapayuhang kontakin o tawagan ang Philippine Embassy sa Poland sa pamamagitan ng mga sumusunod na detalye:

• Email: (warsaw.pe@dfa.gov.ph)

• Emergency Mobile Number +48 604 357 396

• Office Mobile Number +48 694 491 663

• Philippine Honorary Consulate General in Kyiv, Ukraine -- Mobile Number +380 67 932 2588

Maaaring makontak ang DFA sa kanilang Facebook page.