120 eskuwelahan Face-to-face classes, start na sa Nob. 15 — DepEd

ni Lolet Abania | October 6, 2021

Sisimulan na sa Nobyembre 15, ang pilot implementation ng limitadong face-to-face classes sa gitna ng COVID-19 pandemic, ayon sa isang opisyal ng Department of Education (DepEd) sa Senate hearing ngayong Miyerkules.

“We start on November 15, the face-to-face classes and tinaon po natin doon sa pilot schools, tinaon po ‘yan natin sa umpisa ng academic quarter two ng ating school calendar,” ani DOH Usec. Nepomuceno A. Malaluan sa pagdinig ng Senate Committee on Basic Education, Arts and Culture. Base sa timeline ng DepEd, ang initial run ay tatagal hanggang Disyembre 22.

Matapos nito, magkakaroon ng assessment ang ahenisya hinggil sa pagsasagawa ng in-person classes. Ang naturang pilot study ay magtatapos naman ng Enero 31, 2022.

Kasunod nito, susuriin ng DepEd at ia-identify ang iba pang eskuwelahan para sa pagpapalawig ng pilot run, magsasagawa rin ng site inspection, dry-run at ipiprisinta ang expansion proposal kay Pangulong Rodrigo Duterte sa Pebrero 2022.

Kapag naaprubahan naman ito, plano ng DepEd na simulan ang expanded pilot run ng face-to-face classes sa Marso 7, 2022.

Matatandaang inaprubahan ni Pangulong Duterte nitong huling linggo ng Setyembre ang limited face-to-face classes sa mga lugar na may minimal risk ng impeksyon ng COVID-19.

Una nang pinayagan ang limitadong face-to-face classes sa 100 pampublikong paaralan at 20 pribadong eskuwelahan, kung saan para sa mga Kindergarten hanggang Grade 3 students.

Enrollment hanggang Sept. 13 — DepEd

ni Lolet Abania | September 3, 2021

Nakapagtala ang Department of Education (DepEd) ng kabuuang 16,038,442 o 61.2 porsiyento ng mga estudyanteng nakapag-enroll para sa School Year 2021-2022 hanggang ngayong Biyernes.

Base sa pinakabagong datos ng DepEd, may 10,794,716 estudyante ang nag-register sa pampublikong paaralan; 671,660 sa pribadong eskuwelahan; at 14,739 sa state universities at colleges, kabilang dito ang mga lokal na unibersidad at kolehiyo.

Nasa tinatayang 4,557,327 estudyante naman ang nakapag-sign-up para sa early registration ngayong school year. Ang rehiyon na may pinakamaraming enrollees ay nasa Calabarzon na umabot sa 2,481,554; kasunod ang Central Luzon na nasa 1,591,509; at National Capital Region na nasa 1,577,155.

Para naman sa Alternative Learning System (ALS), sinabi ng DepEd na may kabuuang 130,418 o 21.76% ng mga estudyante nu’ng nakaraang taon ang nakapag-enroll sa ngayon.

Sinabi naman ng DepEd na magpapatuloy pa rin ang regular enrollment ng hanggang Setyembre 13, 2021, habang inaasahang tataas pa ang bilang ng mga estudyante na sasabak muli sa online learning.

Ayon sa DepEd, nakatakda ang pagsisimula ng school year sa Setyembre 13, subalit, sinabi ng ahensiya na may mga private schools na sinimulan na nang maaga ang kanilang online classes.

Matatandaang noong nakaraang taon nang magbukas ang klase ng Oktubre 5, 2020, ang kabuuang bilang ng mga enrollees na nai-record ng DepEd ay nasa 24.7 milyon.

Batay pa sa DepEd, ito ay nasa 89% lamang ng kabuuang enrollment sa panahon ng School Year 2019-2020. Gayundin, ayon sa ahensiya, noong nakaraang taon ay tinatayang nasa 398,000 estudyante na mula sa private schools ang nag-transfer sa public schools sa gitna ng nararanasang pandemya.

24.7 M nu'ng nakaraang taon… 5.3 M nag-enroll ngayong SY 2021-2022 — DepEd

ni Lolet Abania | August 20, 2021

Nakapagtala ng mahigit sa 5 milyong estudyante mula Kindergarten hanggang Grade 12 ang nag-enrol na para sa School Year 2021-2022, ayon sa Department of Education (DepEd) ngayong Biyernes.

Sa Facebook post ng DepEd, hanggang nitong Huwebes ay umabot na sa 5,356,643 ang nai-record ng ahensiya na nakapag-enrol na mga estudyante mula sa pampubliko at pribadong paaralan.

“Umabot na sa kabuuang bilang na 5,356,643 ang mga nakapagpatalang mag-aaral na papasok sa Kindergarten hanggang Grade 12 sa mga pampubliko at pribadong paaralan sa buong bansa,” pahayag ng DepEd.

Nakatakda naman ang pagsisimula ng klase ngayong taon sa Setyembre 13.

Ayon sa DepEd, nu'ng nakaraang school year, kung saan nagbukas ang klase ng Oktubre 5, 2020, ang kabuuang bilang ng mga enrollees na kanilang nai-record ay umabot sa 24.7 milyon. Nasa 89% lamang ito ng kabuuang enrollees noong School Year 2019-2020 bago ang pandemya ng COVID-19.

Sinabi ng DepEd na ang region na may pinakamaraming enrollees ay Calabarzon na may 710,526; kasunod ang Central Luzon na nasa 450,202; at sa Western Visayas na may 436,301.

Sa ngayon, nasa kabuuang 4,557,327 estudyante ang nag-enrol sa early registration na kanilang isinagawa.

Tinatayang 734,306 estudyante ang nag-enrol sa public schools, habang 63,102 naman sa private schools.

Ayon pa sa DepEd, noong nakaraang taon, nasa 398,000 estudyante mula sa mga pribadong eskuwelahan ang nag-transfer sa mga pampublikong paaralan.

Samantala, sa ngayon, nasa 1,908 estudyante ang nag-enrol sa mga state universities and colleges (SUCs) gayundin sa mga local universities and colleges (LUCs).