F2F classes, tuloy na uli sa NCR

ni Lolet Abania | February 9, 2022

Nagbalik na sa kanilang mga classrooms ang ilang mga estudyante sa elementary at high school sa Metro Manila ngayong Miyerkules, habang ang mga paaralan ay nagpatuloy na rin sa kanilang in-person classes sa ilalim ng Alert Level 2.

Kasabay ng pagre-resume ng klase ay ang pagsisimula naman ng “expansion phase” ng in-person classes sa National Capital Region (NCR) sa ilalim ng mga paaralan na pinayagang magsagawa na rin ng face-to-face sessions.

Una nang ipinahayag ng Department of Education (DepEd) na ang 28 eskuwelahan na nakiisa sa “pilot phase” ay maaari nang ipagpatuloy ang kanilang in-person classes. Hindi naman agad masabi ng ahensiya kung ilang paaralan ang muling magbubukas sa ilalim ng expansion phase.

Sa ulat, sinalubong ng Disiplina Village Bignay Elementary School (DVBES) sa Valenzuela City ang kanilang mga estudyanteng papasok ulit, kung saan nasimulan na ng paaralan ang pilot face-to-face classes. Ipinagpatuloy na ng paaralan ang kanilang F2F classes matapos na ang National Capital Region (NCR) ay isailalim sa Alert Level 2 mula Pebrero 1 hanggang 15.

Naghanda ang DVBES ng maraming classrooms para sa mga estudyante ng Kinder at Grades 1 hanggang 3. Nasa tinatayang 16 na estudyante kada year level, ang pinapayagang mag-participate sa pilot face-to-face classes.

Ayon sa mga guro ng naturang paaralan, plano na rin nilang i-resume ang F2F classes para sa mga estudyante ng Grades 4 hanggang 6. Samantala, isa sa mga eskuwelahan na nagsimula na ulit ng kanilang in-person classes sa ilalim ng expansion phase ay ang Pio del Pilar Elementary School sa Manila, kung saan ang mga estudyante at mga guro ay makikitang labis ang excitement sa kanilang pagbabalik, matapos ang halos 2 taon ng tinatawag na remote learning dahil sa pandemya.

Tiniyak naman ni Principal Susan Ramos ng Pio del Pilar Elementary School, na handa ang paaralan para i-isolate ang sinuman na magkakasakit o makararanas ng COVID-19 symptoms.

“’Pag may symptoms ang bata, ipapa-test namin siya. I-isolate kaagad siya. Mayroon kaming clinic,” sabi ni Ramos. Ayon sa DepEd, ang expansion phase ay ikalawa mula sa three-part plan ng ahensiya para sa gradwal na pagbubukas muli ng basic education schools sa gitna ng pandemya ng COVID-19.

304 public schools, sasabak sa expansion phase ng F2F classes — DepEd

ni Lolet Abania | February 4, 2022

Ipinahayag ng Department of Education (DepEd) ngayong Biyernes na nasa tinatayang 304 pampublikong paaralan sa mga lugar na nasa ilalim ng Alert Level 2, ang handa nang sumabak sa papapalawig ng face-to-face classes.

Sa isang virtual press conference, ayon kay DepEd Assistant Secretary Malcolm Garma, tinatayang nasa 6,347 public schools na nakabilang sa expansion phase ng limitadong F2F classes ang aniya, “underwent assessment and are deemed ready”.

Gayunman, nilinaw ni Garma na nasa tinatayang 304 pampublikong paaralan lamang ang handa nang simulan ang implementasyon ng limitadong face-to-face classes dahil ang lokasyon ng mga lugar nito ay nasa ilalim ng Alert Level 2.

Sa nasabing bilang ng eskuwelahan, mayroong 12 public schools sa Region 2; 106 public schools sa Region 3; 54 public schools sa Region IV-A; 9 public schools sa Region VIII; at 123 public schools sa National Capital Region (NCR).

Batay sa nakasaad sa expansion phase aniya, “schools must be validated as compliant with the standards of the School Safety Assessment Tool (SSAT) and located in areas under Alert Levels 1 and 2 based on the periodic risk assessment by the DOH.”

Gayundin, ang mga napabilang na paaralan para sa expansion phase ay maaari ring magdagdag ng ibang grade levels, base sa kapasidad ng eskuwelahan.

Una nang sinabi ni DepEd Secretary Leonor Briones na ang mga estudyante na makikiisa sa face-to-face classes ay dapat mayroong written consent ng kanilang mga magulang.

“Only vaccinated teachers may participate in the face-to-face classes, and vaccinated learners shall be preferred,” sabi pa ni Briones.

Mula Enero 15-22.. Mga klase sinuspinde ng DepEd-NCR

ni Lolet Abania | January 14, 2022

Sinuspinde na ng Department of Education-National Capital Region ang mga klase nito mula Enero 15 hanggang 22, 2022 upang mabawasan ang pasanin ng mga titser at estudyante, kasabay pa ng pagtaas ng mga kaso ng COVID-19.

Batay sa DepEd Regional Memorandum No. 017 s. 2022, na nilagdaan ngayong Biyernes ay nakasaad na ang mga klase sa NCR ay magbabalik mula Enero 24 hanggang 29, subalit para lamang sa asynchronous distance learning modalities.

“The Deped NCR suspends the conduct of classes starting Saturday, January 15, 2022, and on Monday, January 17 until Saturday, January 22, 2022,” base sa ibinabang memorandum.

Gayunman, ayon sa DepEd-NCR, kailangang gamitin ng mga estudyante ang kanilang “midyear break”, kung saan naka-iskedyul ito mula Enero 31 hanggang Pebrero 5, upang makumpleto ang kanilang backlogs sa mga learning outputs.

Gayundin, ang mga guro ay inaasahang dadalo sa kanilang mga aktibidad, kabilang na ang in-service trainings at iba pang kinakailangang pag-aaral sa panahon ng sinasabing break.

Ang mga estudyante naman ay dapat mag-submit ng kanilang learning outputs sa pagitan ng mga petsang Pebrero 7 at 12 sa pamamagitan ng online platforms.

Ang Quarter 2 examinations ay nakatakdang isagawa sa Pebrero 7 at 8.

Noong Miyerkules, hinimok ng DepEd ang mga regional at schools division offices na i-exercise ang kanilang deskrisyon sa pagsusupinde ng mga klase at iba pang teaching-related activities ngayong Enero sa gitna ng pagtaas ng mga kaso ng COVID-19.

Ipinunto rin ng DepEd dito, ang nakaaalarma pagsirit ng COVID-19 cases na anila, mahalaga ang kapakanan ng mga guro at mga estudyante.