4K paaralan, nagbalik na sa F2F classes — DepEd

ni Lolet Abania | March 2, 2022

Umabot sa kabuuang 4,315 paaralan sa buong bansa ang nakiisa sa tinatawag na “progressive expansion” phase ng face-to-face classes sa gitna ng COVID-19 pandemic, ayon sa Department of Education (DepEd).

Sa Laging Handa briefing ngayong Miyerkules, ini-report ni DepEd Secretary Leonor Briones na may 6,213 eskuwelahan sa buong bansa ang handa nang sumali sa limitadong in-person classes, kung saan napapailalim ang mga ito sa pamantayang itinakda ng DepEd.

Sa 4,315 paaralan na umabot sa kanilang pamantayan, mayroong 4,239 public and 76 private schools ang nakiisa sa pilot in-person classes hanggang nitong Marso 1, matapos na ang National Capital Region (NCR) at 38 pang mga lugar ay isinailalim na sa Alert Level 1.

Gayunman, kahit na nagbukas na uli ang mga paaralan sa F2F classes, sinabi ni Briones na mananatiling ipatutupad ang blended learning para magawang maka-adapt ng mga bata sa mga teknolohiyang umiiral.

“Hindi na kagaya nu’ng unang panahon na mostly face-to-face. Ito ngayon, ‘di natin bibitiwan ang digital technology, ang science, ang mathematics, and so on, but meron talagang face-to-face component dahil mahalaga ‘yan sa pag-socialize at pagturo ng bata. Pareho silang importante para tayo makahabol and will be on par with the other countries,” paliwanag ni Briones.

“If you mean full face-to-face na anim, walong oras na ang teacher at mga bata nagkakaharap, hindi ‘yan posibleng mangyayari. Lahat na bansa na binabantayan namin, lalo na na ‘yung mga bansa na bilib na bilib talaga tayo, wala na ‘yung nation na full face-to-face. May blended component talaga,” sabi pa ng opisyal.

Binigyan-diin naman ng kalihim, na umaasa sila ng pagkakaroon ng 100% attendance ng mga estudyante anumang uri ng pagtuturo mapa-blended, online o physical classes.

Para sa face-to-face classes, ayon kay Briones, iminumungkahi nila na gawin na lamang itong half day o kalahating araw para maiwasan ng mga bata ang pagkain-kain at magdagdag ng panganib ng COVID-19 infections.

Matatandaan nitong Pebrero, inawtorisa ng DepEd ang lahat ng regional directors na simulan ang “progressive expansion” phase ng F2F classes para sa public at private schools, kasunod ng pag-apruba ni Pangulong Rodrigo Duterte sa rekomendasyon ng DepEd na palawigin ang in-person classes sa mga lugar na nasa ilalim ng Alert Level 2 at pababa.

Mandato ng COVID-19 vax sa mga titser, pinag-uusapan na — DOH

ni Lolet Abania | March 2, 2022

Pinag-iisipan na ng Department of Health (DOH) ang posibilidad na mandatory para sa mga guro na magpabakuna kontra-COVID-19, sa gitna ng isinasagawang expansion phase ng face-to-face classes ng Department of Education (DepEd) at ang pagsasailalim sa 39 lugar sa buong bansa sa Alert Level 1.

Sa isang interview kay DOH Secretary Francisco Duque III ngayong Miyerkules, sinabi nitong tinitingnan nila kung posibleng imandato ang COVID-19 vaccination sa mga guro, aniya, “Yes, pinag-uusapan nga ‘yan.”

“In fact in some of our IATF (Inter-Agency Task Force) meetings, si Secretary Leonor Briones has been very, very front about it na malaking problema kung may mga teachers na anti-vaxxers, ayaw magpabakuna. ‘Yan naman ay tinitingnan na natin,” sabi ni Duque.

Gayunman ayon sa opisyal, maraming guro na sa ngayon ang nagnanais na rin na magpabakuna kontra-COVID-19, habang aniya, ang vaccine hesitancy rate sa bansa ay bumaba na sa 8%.

“I think that’s a good indication or a sign that people already now increasingly believe in the protection that the vaccines provide and they can take advantage of this,” dagdag pa ni Duque.

Sa ngayon, ang pagpapatuloy ng face-to-face classes ay nasa ilalim na ng kanilang expanded phase. Nitong Lunes, ipinahayag ng DepEd na may kabuuang 1,726 paaralan ang nagsimula na rin ng kanilang limitadong F2F classes.

Sa isinasagawang expansion phase, mga bakunadong guro lamang ang maaaring mag-participate sa F2F classes habang mga vaccinated learners naman ang “preferred” o piniling makiisa rito.

Gayundin, dahil sa pagbaba sa Alert Level 1 sa ilang mga lugar sa bansa, inaasahan na rin ng DepEd na maraming mga paaralan pa ang magiging bukas sa limitadong in-person classes.

PTAs, bawal magsagawa ng campaign activities sa paaralan — DepEd

ni Lolet Abania | February 25, 2022

Mariing pinaalalahanan ng Department of Education (DepEd) ang mga school-based organization gaya ng Parents Teachers Association (PTA) na dapat na sundin nito ang kanilang mga polisiya at guidelines, habang iginiit na ipinagbabawal ang magsagawa o makiugnay sa mga partisan political activities sa loob ng bakuran ng mga paaralan.

Sa inilabas na statement ngayong Biyernes ng ahensiya, ang PTA “shall adhere to all existing policies and implementing guidelines issued or hereinafter may be issued by the DepEd.”

“DepEd Order No. 54, series of 2009 also states that all PTA activities within the school premises or which involve the school, its personnel or students shall be with prior consultation and approval of the school head,” batay sa statement ng DepEd.

Ayon sa ahensiya, ang PTA ay dapat na magsilbi bilang support group at katuwang ng mga paaralan, na ang ibig ipakahulugan nito ay pagiging anila, “cooperative and open dialogue with stakeholders to promote the welfare of the students.”

“We continue to recognize and value the partnership of the community, our parents, our teachers, and our school administration in ensuring the delivery of quality basic education for all of our learners,” pahayag ng DepEd.

Una nang pinaalalahanan ng DepEd ang kanilang mga opisyal, mga guro at non-teaching personnel na iwasan na ang makiugnay sa mga partisan political activities bago pa ang May 2022 elections.

Sinabi pa ng ahensiya na masisiguro nito na ang mga empleyado ay naka-focus lamang sa serbisyo publiko at mapapangalagaan sila mula sa tinatawag na “unpredictability” ng pulitika.