Pramis ni PBBM... Walang guro na magre-retire na Teacher 1

ni Mylene Alfonso @News | April 28, 2026

Photo: Bongbong Marcos / FB

Muling tiniyak ni Pangulong Ferdinand Marcos, Jr. ang kanyang pangako na sisiguraduhin ng administrasyon na walang gurong magreretiro sa entry-level rank o Teacher 1.

Ito ay makaraang pangunahan ni PBBM ang mass oath-taking ng mahigit 8,000 bagong na-promote na mga guro at school heads mula sa Western Visayas, na itinuturing na pinakamalaking pagtitipon sa ilalim ng Expanded Career Progression (ECP) System ng kasalukuyang administrasyon.

Idinaos ang makasaysayang aktibidad sa Villareal Stadium sa Roxas City, Capiz, kasunod ng mga naunang mass oath-taking ng humigit-kumulang 3,300 guro at school heads sa Cebu, 2,600 sa Davao, at 2,100 sa Eastern Visayas.

“Kailangan natin ipatupad ang mga napakahalagang pangako na ating binigay sa inyo. Kaya't sinabi ko, hindi na tayo papayag na mayroong guro na magre-retire na Teacher I. Dahil hindi naman talaga tama 'yun,” wika ni Marcos sa kanyang talumpati.

“Mayroon pa kaming nakabinbin na promotions na kasalukuyan nating isinasakatuparan upang matiyak na walang guro na maiiwanan,” ayon sa Pangulo.

Mula Agosto 2025 hanggang sa kasalukuyan, umabot na sa 79,230 guro at school heads sa buong bansa ang nakinabang sa promosyon sa ilalim ng ECP System. Sa naturang bilang, mahigit 8,500 ay mula sa Western Visayas, kabilang ang 124 na mga gurong malapit nang magretiro.

3-term school calendar, ipatutupad na — DepEd... Pasukan, magsisimula sa Hunyo 8

ni Mai Ancheta @News | April 21, 2026

Photo:File / DepEd Philippines

Opisyal nang inanunsyo ng Department of Education (DepEd) ang petsa ng pasukan para sa school year 2026-2027.

Magbubukas ang klase sa Hunyo 8, 2026 at matatapos ito sa Abril 8, 2027 sa ilalim ng 3-term structure, na mayroong kabuuang 201 araw ng klase sa buong bansa.

Papalitan na ng tatlong semestre ang dating nakagawian na quarterly system upang magamit nang husto ang panahon ng pagtuturo at suportahan ang ARAL program.

Ang unang termino ay mula Hunyo hanggang Setyembre 16, 2026, kung saan ang regular na klase ay magsisimula sa Hunyo 15.

Ang ikalawang termino ay mula Setyembre 16 hanggang Disyembre 18, 2026; at ang ikatlong termino ay Enero 4 hanggang Abril 8, 2027.

Ayon sa DepEd, layon ng bagong sistema na mabawasan ang pagkaantala sa pag-aaral, mas mapapahusay ang pangangasiwa sa usad ng pagtuturo at masusuportahan ang mga estudyante na makabawi sa pamamagitan ng Academic Recovery for Accessible Learning (ARAL) program.

Maaaring tularan ng mga pribadong paaralan at unibersidad ang bagong calendar o kahalintulad na istruktura habang tinutugunan ang kailangang bilang ng school days.

Lahat ng kinder, libre pagkain araw-araw — Angara

ni Madel Moratillo @News | July 22, 2025

Photo File: Libreng pagkain sa kinder - DepEd Philippines

Pinalawak na ng Department of Education (DepEd) ang kanilang School-Based Feeding Program.

Dahil d'yan, lahat ng kindergarten sa mga pampublikong paaralan sa bansa ay makakatanggap na ng masustansyang pagkain araw-araw. 

Ang programa ay inilunsad kahapon sa Juan Sumulong Elementary School sa Antipolo City. 

Layon ng programa na magbigay ng hot meals at fortified food products araw-araw sa 3.4 milyong learners kabilang ang lahat ng kindergarten pupils at undernourished na mga bata sa Grade 1 hanggang 6. 

Sabi ni DepEd Secretary Sonny Angara, kapag may sapat na nutrisyon ang mga bata, mas madali silang matuto. 

Sa datos ng DepEd, sa Cagayan Valley (Region II) at Davao (Region XI), bumaba sa 80% ang bilang ng mga undernourished na kindergarten.