10 ahensya, humirit ng mas malaking confi fund — DBM

ni Mai Ancheta @News | August 11, 2023

Sampung ahensya ng gobyerno ang humirit sa Department of Budget and Management (DBM) para taasan ang kanilang confidential at intelligence fund sa ilalim ng panukalang pambansang budget para sa 2024.

Tinukoy ni DBM Sec. Amenah Pangandaman ang mga ahensiyang humiling ng dagdag na intelligence at confidential funds partikular ang Department of Information and Communications Technology na humihiling ng P300 million; Department of National Defense, P60M; Presidential Security Group, P60M; Department of Agriculture, P50M; Bureau of Customs, P30.5M; Armed Forces of the Philippines, P60M; National Security Council, P30M; Office of the Ombudsman, P20.46M, at Office of the Presidential Adviser for Peace, Reconciliation and Unity, P6M.

Ang kabuuang halaga ng hinihinging confidential at intelligence fund ng nabanggit na mga ahensiya para sa susunod na taon ay P10.14 billion, kasama na rito ang P4.5M para sa Office of the President at P500M para sa Office of the Vice President.

Binigyang-diin ni Pangandaman sa mga mambabatas na kumukuwestiyon sa confidential at intelligence fund na ito ay gagamitin sa pambansang seguridad at kaligtasan ng bansa.

P7.68B cash ayuda, oks na — DBM

ni Mylene Alfonso | May 19, 2023

Inaprubahan ni Department of Budget and Management (DBM) Secretary Amenah Pangandaman noong Mayo 16, ang pagpapalabas ng Special Allotment Release Orders (SARO) na may kabuuang halaga na nasa P7,684,844,352 para pondohan ang implementasyon ng Targeted Cash Transfer (TCT) Program ng Department of Social Welfare and Development (DSWD).

Nasa 7,597,546 bilang ng mga benepisyaryo ang inaasahang makikinabang mula sa TCT.

“Hindi po natin pababayaan ang mga kababayan nating nangangailangan. Alinsunod sa direktiba ni Pangulong Ferdinand R. Marcos, Jr., tutulong tayong siguruhin na ang ating mga kababayan, lalo na 'yung mga vulnerable o 'yung mga kailangang mabigyan ng kalinga at suporta,” ayon kay Pangandaman.

Ang P7.68 bilyong pondo na inaprubahan ay sasakop sa natitirang dalawang buwan ng TCT.

Nagbibigay ang programa sa mga benepisyaryo ng P500 kada buwan, kasama na rito ang administrative cost at bank charges.

Midyear bonus ng gov't. employees, oks na

ni Mylene Alfonso | May 15, 2023

Nakatakdang tumanggap ng kanilang midyear bonus simula ngayong araw ng Lunes, Mayo 15, ang lahat ng mga kwalipikadong tauhan ng gobyerno.

Ito ang inanunsyo ng Department of Budget and Management (DBM) kung saan ang midyear bonus ay katumbas ng isang buwang basic pay simula Mayo 15, at ibibigay sa mga karapat-dapat na lingkod-bayan na nakapagbigay ng hindi bababa sa kabuuan o pinagsama-samang apat na buwang serbisyo mula Hulyo 1, 2022 hanggang Mayo 15, 2023.

Ang mga empleyado ay dapat nakakuha rin ng hindi bababa sa satisfactory performance rating.

Sinabi ni DBM Secretary Amenah Pangandaman na ibibigay ang midyear bonus mula sa alokasyon ng partikular na ahensya sa ilalim ng 2023 General Appropriations Act (GAA).

"Alam naman po natin na isa ito sa mga inaabangan ng ating mga kapwa kawani ng gobyerno na talagang makatutulong sa kanilang araw-araw na pangangailangan," sabi ni Pangandaman.

"So, we are reminding all government agencies and offices to ensure the timely release of bonuses to their employees or as stipulated in our existing rules and regulations, simula May 15 po 'yan [starting May 15]," saad pa ng kalihim.

Nabatid na ang midyear bonus ay ibibigay sa lahat ng posisyon para sa civilian personnel, regular o casual, o contractual, appointive o elective, fulltime o part-time, na ngayon ay umiiral sa mga Executive, Legislative, at Judicial branches, Constitutional Commissions at iba pang Constitutional Offices, State Universities and Colleges (SUCs), at Government-Owned or Controlled Corporations (GOCCs) na sakop ng Compensation and Position Classification System (CPCS), at sa local government units (LGUs).

Kabilang din sa makatatanggap ng midyear bonus ay ang mga military personnel ng Armed Forces of the Philippines sa ilalim ng the Department of National Defense at uniformed personnel ng Philippine National Police, Philippine Public Safety College, Bureau of Fire Protection, at Bureau of Jail Management and Penology sa ilalim ng Department of Interior and Local

Government, Bureau of Corrections ng Department of Justice, Philippine Coast Guard sa ilalim ng Department of Transportation, at National Mapping and Resource Information Authority sa ilalim ng Department of Environment and Natural Resources.

Binanggit din ng DBM na ang pagbibigay ng midyear bonuses para sa mga tauhan ng mga sakop na GOCCs ay dapat desisyunan ng kani-kanilang mga governing board.

Samantala, ipapasiya naman ng kani-kanilang sanggunian ang para sa mga personnel ng mga lalawigan, lungsod, munisipalidad at barangay.