State of emergency dahil sa ASF, inihirit ng DA

ni Ronalyn Seminiano Reonico | March 18, 2021

Isinumite na ng Department of Agriculture (DA) kay Pangulong Rodrigo Duterte ang rekomendasyong ideklara ang national state of emergency dahil sa African swine fever (ASF) na naging dahilan ng pagkaunti ng mga baboy at pagtaas ng presyo nito.

Ayon kay DA Secretary William Dar, "(The) ASF is a severe and fatal disease of domestic and wild pigs that is currently decimating the local hog industry of the country.

The disease has already spread to 12 regions, 40 provinces, 466 cities and municipalities, and 2,425 barangays to date.”

Saad pa ng DA sa memorandum, “Over three million heads of pig have been lost due to the disease, causing a contraction in pork supply and an unprecedented increase in the price of basic agricultural commodities.”

Samantala, noong Miyerkules, nag-launch ang DA ng P15-billion lending program para sa mga commercial hog raisers na apektado ng ASF.

Mga baboy sa Misamis Oriental, patay sa ASF

ni Ronalyn Seminiano Reonico | February 11, 2021

Kinumpirma ng Department of Agriculture (DA) na African swine fever (ASF) ang ikinamatay ng mga baboy sa ilang lugar sa Misamis Oriental.

Ayon kay DA Regional Executive Director Carlene Collado, isinailalim sa test ang blood samples ng mga baboy mula sa Barangay Hampason, Pagawan, Manticao at Initao, Misamis Oriental at nagpositibo ang mga ito sa ASF.

Samantala, mabilis namang inaksiyunan ng awtoridad ang insidente at kaagad na isinailalim sa isolation ang mga apektadong lugar at inihiwalay ang mga infected na hayop.

Saad ni Collado, "Rest assured that the Regional ASF Task Force, concerned LGUs (local government units), hog industry and other stakeholders are doing its best to isolate, eliminate and compensate; manage, contain and control this viral disease.”

27 metric tons ng baboy, dumating sa Metro Manila — DA

ni Lolet Abania | February 8, 2021

Dumating na sa Metro Manila ngayong Lunes nang umaga ang mahigit 27 metric tons ng mga baboy na nagmula sa Mindanao. Ito ang kinumpirma ni Department of Agriculture Secretary William Dar na layong matugunan ang kakulangan sa supply ng baboy sa NCR.

Ayon kay Dar, nakipag-usap siya sa Southern Cotabato Swine Producers Association kamakailan at napagkasunduang magpapadala sila ng 10,000 baboy kada linggo sa Metro Manila.

Sinabi ni Dar na ang mga baboy ay idiniretso sa bahay-katayan sa Antipolo saka dadalhin ang mga ito sa pinakamalapit na pamilihan. Nangako naman ang ahensiya na magbibigay sila ng subsidy para sa mga hog raisers.

Binanggit ni Dar na nasa P21 sa kada kilo ng baboy na transport assistance ang ibibigay nila sa mga hog raisers ng General Santos City at iba pang lugar sa Mindanao, P15 naman sa galing sa Visayas, Mimaropa, Bicol, extreme Northern Luzon habang P10 para sa mga hog raisers ng Calabarzon at Central Luzon.

Samantala, nanawagan ang Malacañang sa mga vendors sa Metro Manila na nagsagawa ng “pork holiday” sa takot na malugi dahil sa price freeze na ipinatupad ng gobyerno, na bumalik na sa kanilang operasyon at muling magtinda.

“May mga grupo na nag-declare ng pork holiday, meron din pong nanawagan ng pagkain ng alternative protein sources. Sinusuportahan po natin iyong panawagan for consuming alternative protein sources, pero nakikiusap po kami sa mga nagtitinda ng baboy na ipagpatuloy n'yo po ang pagtitinda,” ani Presidential Spokesperson Harry Roque sa isang press briefing.

Dahil sa price cap, maraming puwesto ng baboy sa palengke ng Balintawak, Divisoria at Trabajo ang nagdeklara ng pork holiday ngayong Lunes. Ipinunto ng mga vendors na hindi kakayanin ng kanilang kabuhayan at malaking pagkalugi ito para sa kanila na ipinatupad ang price cap kaya nagresulta sila sa pagsasagawa ng pork holiday.

Inamin naman ni Roque na inasahan na nila ang ganitong tugon ng mga vendors subalit hindi kailangang ito ay magtagal dahil nakatakdang magbigay ang gobyerno ng tulong-pinansiyal para sa kanila. “Anticipated naman po natin ‘yan (pork holiday), pero kinakailangan pong gawin po ‘yan (price cap),” ani Roque.