Sa taas-presyo ng chicken feed.. Suplay ng itlog, posibleng kulangin — DA

ni Lolet Abania | December 11, 2021

Ipinahayag ng Department of Agriculture (DA) na posibleng magkaroon ng kakulangan sa suplay ng itlog dahil anila ito sa pagtaas ng presyo ng mga pagkain ng manok.

“Inaasahan natin na magkakaroon ng paghihigpit sa supply dahil tumataas ang [presyo ng] patuka,” ani DA Assistant Secretary at spokesperson Noel Reyes sa isang interview ngayong Sabado. Una nang sinabi ng United Broiler Raisers Association (UBRA) na posibleng magkaroon ng shortage sa suplay ng itlog dahil ang presyo ng mais, kung saan ginagamit sa paggawa ng chicken feed ay tumaas, mula sa dating P14 na naging P22 per kilogram.

Ayon sa UBRA, tumaas din ang presyo ng soybean na P55 per kilogram mula sa dating P27 lamang. Dahil sa naturang price hikes, babala ng UBRA na sa loob ng anim na buwan, maaaring magkaroon ng kakulangan sa suplay ng mga itlog kapag ang presyo ng chicken feed ay patuloy na tumaas.

Ayon kay Reyes, sa ngayon ang medium-sized na itlog ay nagkakahalaga ng average P6.50 bawat isa. Gayunman, giit ng DA official na ang suplay ng manok ay nananatiling sapat habang aniya, ang presyo nito ay nasa P160 hanggang P180 per kilogram depende sa laki ng manok.

Gayundin, sinabi ni Reyes na ang suplay ng mga gulay ay sapat para sa Kapaskuhan.

“Marami tayong lowland and highland vegetables,” sabi ni Reyes.

Subalit ayon kay Reyes, ang “andap” o frost na tumama sa mga gulay sa mga highlands ay naging hamon sa kanila, aniya “pero hindi ito masyadong makakaapekto [sa supply].”

Paliwanag ni Reyes, ang DA sa Cordillera Administrative Region ay nagbigay na ng sprayers sa mga magsasaka para ma-dissolve ang frost sa kanilang mga pananim.

Puslit na mga gulay, ‘wag bilhin — DA

ni Lolet Abania | September 28, 2021

Nagbabala ang Department of Agriculture (DA) sa publiko hinggil sa pagbili ng mga puslit na gulay dahil sa posibleng pagkakaroon ng pesticide residue nito, habang iniutos ng ahensiya ang pagkumpiska sa lahat ng shipments na pumapasok sa bansa na walang mga kaukulang permit.

Ayon kay Department of Agriculture (DA) Secretary William Dar, inaanalisa na ng Bureau of Plant Industry (BPI) ang mga gulay na sinasabing ipinuslit sa bansa mula sa China.

“The best thing we can do meanwhile is not to buy kasi hindi natin alam ‘yung laman ng vegetables in terms of pesticide residue,” sabi ni Dar sa mga reporters sa isang virtual briefing ngayong Martes. Wala pang inisyu ang BPI ng anumang license to import ng mga karot, repolyo at luya sa mga pamilihan sa bansa, habang ayon kay Dar ang unit ay nag-isyu pa lamang ng mga permit sa frozen at processed vegetables na para sa mga embassies at hotels.

Agad na inalerto ng mga magsasaka sa Benguet ang DA at Bureau of Customs (BOC) hinggil sa mga smuggled carrots, kung saan nai-report na bumabaha ng mga ito sa mga palengke habang patuloy na nakikipagkumpetensiya sa mga local variety sa mas mababang presyo.

Hindi naman binanggit ni Dar ang tinatayang dami ng mga puslit na mga gulay dahil aniya, hindi ito nagdaan sa tamang channels kaya mahirap itong ma-estimate.

Giit pa ng DA chief, na bagaman ang ilang mga imported vegetables ay maaaring makilala sa hitsura nito, ang pinakamabuting paraan pa rin para matukoy ito ay sa pamamagitan ng testing. Una nang inatasan ni Dar ang BPI na analisahin ang mga shipment dahil sa pesticide residue, habang nagbabala rin sa publiko na ang mga imported shipment ay posibleng mayroong residue na hindi puwedeng kainin.

“We will advise the public na ‘wag tangkilikin ito, itong mga smuggled items,” sabi pa ni Dar. Naglabas na rin ng direktiba si Dar sa BPI, kung saan kumpiskahin ang lahat ng mga gulay na ipinupuslit, subalit ayon kay BPI director George Culaste mahirap itong mapatunayan.

“‘Pagka ‘yung nagbebenta na, medyo mahirap po nating kumpiskahin ‘yun kasi more on allegations. ‘Yung nagpapalusot supposedly, ‘yun ang huhulihin natin at the time na pinapalusot nila, huhulihin talaga natin ‘yan,” paliwanag ni Culaste sa naturang briefing.

Ayon kay Culaste, nakikipag-ugnayan na ang BPI sa Bureau of Customs (BOC) hinggil sa mga misdeclared goods na hindi nagdaan sa proper inspection, gayundin ang mga shipment na hinihinalang naglalaman ng mga smuggled agricultural items.

Taas-presyo sa gulay dahil sa sunud-sunod na pag-ulan

ni Lolet Abania | July 25, 2021

Pumalo na sa P80 kada kilo ang presyo ng ilang gulay sa mga palengke sa Metro Manila sanhi ng sunud-sunod na malalakas na pag-ulan nitong mga nakaraang araw. Sa Commonwealth Market sa Quezon City, naiulat na ang mga presyo ng gulay gaya ng repolyo ay nasa P80 kada kilo mula sa dating P40-P50, carrots ay P60 kada kilo na dating P40, patatas ay P50 kada kilo na dating P35, kamatis ay P80 kada kilo na dating P60, red/green bell pepper ay P140 kada kilo dating P100, pipino at talong ay P60 kada kilo na dating P35, ampalaya at sitaw ay P60 kada kilo na dating P40.

Ayon sa mga tindera, mula pa noong Biyernes hanggang ngayong Linggo ay tumaas ng P40 ang presyo ng mga gulay sanhi ng mga pag-ulang dulot ng Habagat. Maraming dumarating anila na mga gulay, subalit dahil hindi nabibili agad sanhi ng mataas na presyo, nalalanta at nasisira na lamang ito.

Sinabi naman ng mga magsasaka sa Benguet, marami sa mga gulay na kanilang itinanim ay nasisira kapag tag-ulan. Hindi naman nila umano kaagad maani ito gaya ng mga patatas hanggang masama pa rin ang panahon.

Ayon sa Department of Agriculture (DA), karaniwan na sa ganitong mga buwan ang pagkasira ng mga gulay dahil sa nararanasang mga pag-ulan at mga bagyo. Anila, posibleng matagalan pa umano bago bumaba ang mga presyo ng gulay sa mga pamilihan, lalo na kung patuloy ang mga pag-ulan at bagyo pang darating.

“Maybe August if we have good weather then meron, meron na tayong mga improvement sa presyo ng ating gulay,” ani Agriculture Assistant Secretary Kristine Evangelista. Bukod sa mga pag-ulan, isa pang tinitingnan dahilan ng ahensiya sa taas-presyo ng gulay ay ang transportasyon nito, kung saan halos sunud-sunod din ang pagtaas ng produktong petrolyo. Gayunman, tiniyak ng DA na sapat ang supply ng mga gulay sa bansa dahil may malaking produksiyon ng gulay o agricultural commodities na maaaring pagkuhanan nito.