Gayuma (14)

ni Maria Angela Gonzales @Kuwentong Pag-Ibig | January 3, 2024

“Magpapalit tayo, magpapalit tayo! Ikaw ay magiging ako, samantalang ako ay magiging ikaw.” Ang mga salitang ito ang paulit-ulit na binibigkas ni Baninay. 

Alam niyang darating din ang araw na magigising si Princess dahil siya rin naman ang may kagagawan noon. Pinatulog niya ang diwa ng dalaga para magawa niyang pasukin ang katawan nito. Kaya naman nang magising si Princess hindi niya maiwasan ang makaramdam ng pananabik kay Gabriel. 

Matagal na niyang gustong yakapin ito, kaya naman iyon ang gusto niyang gawin ngayon. Nais din niya itong i-kiss, pero hindi niya magawa. Marahan siya nitong tinulak na para bang hindi siya gustong mayakap at mahalikan. 

“Magpahinga ka muna,” wika ni Gabriel na para bang nandidiri sa kanya. 

Ibig sana niyang isipin na hindi na nito mahal si Princess, kaya ganu’n na lang kung umasta ito.

Subalit, alam niya kung gaano nito kamahal ang tunay na Princess. Pakiwari tuloy niya ay nakikita nito na ibang Princess ang kanyang nasa harapan. Bahagya siyang umiling, imposible iyon dahil iisa lang naman ang mukha nila ni Princess. 

Kaya nang iwanan siya nito ay wala siyang nagawa. Kailangan pa siguro niyang galingan ang kanyang pag-arte para makumbinsi si Gabriel na siya si Princess. 

Pagkaraan ay napabangon siya. Kailangan niyang mapaibig nang husto ang binata para maging kanya na ito habambuhay. Maganda at seksi na siya kaya kinakailangan niyang gamitin ito para maangkin na niya ang kanyang pinakamamahal. 

Itutuloy…

Gayuma (13)

ni Maria Angela Gonzales @Kuwentong Pag-Ibig | December 30, 2023

Sobra niyang mahal si Gabriel, kaya naman nang imulat niya ang kanyang mga mata ay wala na siyang gustong gawin kundi yakapin ang kanyang pinakamamahal. Marahas na buntong hininga lang ang kanyang pinawalan dahil parang ayaw nitong maramdaman ang init ng kanyang yakap.

Para tuloy gusto na niyang magalit dito.

Ipinilig niya ang kanyang ulo, napakaimposible naman kasi ng kanyang nararamdaman.

Mahal na mahal niya si Gabriel kaya kahit kailan ay hindi niya magagawang magalit dito. Maaari lang siyang magdamdam.

Ngunit, dapat nga bang ganu’n ang maramdaman niya?

“Hindi!” Wika ng kanyang utak.

“Bakit ganyan ka?”

Pagtatanong ni Princess sa kanyang nobyo.

“Ha?”Inabot niya ang kamay nito.

Matagal nitong pinakatitigan iyon bago kinuha ang kanyang palad at dama niyang napuwersa rin itong lumapit sa kanya.“Parang hindi ka naman masaya na nagising na ako.

”“Ano bang sinasabi mo?” Kunwa'y naiiritang tanong nito. “Ramdam ko kasi ang panlalamig mo.

”“Hindi totoo ‘yan,” buong diin nitong sabi.“Bakit hindi mo ako halikan?”

Naghahamong tanong niya.Wala itong kibo. Nanatili lang itong nakatitig sa kanya.

Wari’y tinitingnan kung seryoso ba siya sa kanyang sinabi. Siya naman ay naging mapaghamon din ang titig. Gusto kasi niyang halikan siya nito.

Ang ini-expect niya ay pagbibigyan siya nito, pero hindi iyon ang nangyari. Bagkus, matinding pag-iling ang ginawa ni Gabriel na para bang ikamamatay nito kapag hinalikan siya.

“Magpahinga ka na muna r’yan.

”Marahas pa nitong binawi ang kamay sa pagkakahawak niya pagkaraan ay lumabas ito.

Pagkasara ng pinto, hindi niya na  napigilan ang mapasigaw sa sobrang galit.

Palpak na naman ang plano niya, nanggigigil siya, sabay tingin sa salamin at du’n niya nakita ang tunay niyang pagkatao – siya ay walang iba kundi si Baninay. 

Itutuloy…

Gayuma (12)

ni Maria Angela Gonzales @Kuwentong Pag-Ibig | December 29, 2023

‘DI alam ni Gabriel kung bakit nakaramdam siya ng pagkapaso nang yakapin niya si Princess. Daig pa niya ang nakuryente kaya agad siyang bumitaw sa pagkakayakap sa kanyang nobya. 

“What's wrong?” Nagtatakang tanong nito sa kanya. 

Lalong kumunot ang kanyang noo sa tanong nito. Hindi naman kasi ito palasalita ng Ingles kung hindi naman ito kinakausap sa wikang iyon. Ngunit, hindi ibig sabihin noon ay hindi na ito marunong makipagbalitaktakan sa wikang Ingles. Sumali sa Declamation si Princess noong high school sila. Confident ito sa pagsasalita ng banyagang wika, kaya naman ito ang tinanghal na champion, kaya lang ngayon ay parang kahit dalawang salita lang ang sinabi nito ay parang kay tigas ng dila nito. 

“Ano bang sinasabi mo?” Nagtatawa niyang tanong sa sarili. 

Napailing siya dahil hindi niya maintindihan kung bakit napansin niya ang mga detalyeng iyon. Gayung dapat ay masiyahan siya sa pagdilat nitong muli. 

“Okey na ba ang pakiramdam mo.”

“Yes, miss na miss na kita,” malambing nitong sabi. 

Yayakapin sana siya nito, pero parang awtomatiko ang kanyang pag-iwas. Agad siyang lumayo rito para hindi siya maabot. 

“Masaya ako na okey ka na. Teka, tatawagin ko ang doctor,” wika niya. 

Bumuka ang bibig nito para sana magsalita, pero agad na siyang kumilos para iwanan ito. ‘Di niya alam kung bakit ganu’n ang nararamdaman niya, pero ‘di siya komportable rito, at pakiramdam niya ay may mali.

“Ikaw ba ang naaksidente?” Natatawang tanong niya sa sarili. 

Kung umasta kasi siya ay parang kakaiba gayung wala naman siyang ipinagdarasal kundi ang magising na si Princess. Nagtataka lang siya kung bakit kahit natupad na ang gusto niyang mangyari ay parang may kulang. Parang hindi ganito ang nararamdaman niya kapag siya’y tinititigan, at kinakausap ni Princess. Para tuloy gusto niyang humalakhak. Napakaimposible naman kasing sa isang saglit ay nagbago na ang kanyang damdamin. 

Mahal niya si Princess, ngunit bakit nang magising ito ay parang hindi tumitibok ang kanyang puso para rito. Parang isa lang din ito sa mga taong madalas niyang makasalamuha. 

Itutuloy…