Bilyonaryong Mafia ang Mahal Ko (5)

ni Maria Angela Gonzales @Kuwentong Pag-Ibig | Pebrero 11, 2024

Pakiramdam ni Via, mayroong granadang ibinato sa kanya at para bang nagkapira-piraso siya nang mga sandaling iyon. Ngunit, buong-buo pa siya at malinaw niyang narinig ang mga sinabi ng kanyang stepfather.

“Ako?” Naninigurado nitong tanong.

“Oo, ikaw nga. Ang sabi ni Big Boss, buburahin lang niya ang utang ko kapag binigay na kita sa kanya. Hindi lang ako nagsalita sa harap niya, pero hindi ako sumasang-ayon. Kaya, kailangan na nating umalis ngayon. Hindi ko itatakas ang sarili ko, ang gusto ko lang ay maligtas ka sa kapahamakan.”

Ramdam na ramdam niya ang katapatan sa boses ng kanyang stepfather, kaya parang gusto niyang umiyak. Kahit kasi hindi niya ito tunay na ama, tinrato pa rin siya nitong kadugo. Samantalang ang tunay niyang tatay ay hindi siya nakasisigurado kung alam nga ba nito ang kanyang presensya.

“Kahit na umalis tayo, maaari niya pa rin tayong sundan. Paano kung masyadong masama ang Big Boss na tinutukoy mo? Tiyak na ‘di niya magugustuhan ang binabalak mo. Baka hindi lang ikaw ang singilin niya, paano kung madamay din ang iyong mga kapatid? Mahinang tanong niya.

“Nakahanda ako, ako ang may kasalanan kaya ako lang ang dapat na magdusa.”

“Hindi ko rin gugustuhin na mapahamak ka. Hindi mo man ako kadugo, pero minahal mo ako nang higit pa sa tunay na anak kaya hindi ko rin hahayaan na may masamang mangyari sa iyo.”

“Ano’ng ibig mong sabihin?” Manghang tanong nito.

“Haharapin ko ang sinasabi n’yong Big Boss,” desidido niyang sabi.

“Para?”

“Tatanggapin ko ang gusto niya. Tiyak naman kasi na kahit saan tayo magtago hindi niya pa rin tayo tatantanan, kaya mas maigi pang gawin natin kung ano ang gusto niya.” Mariin nitong sabi.

“Hindi mo alam ang sinasabi mo.”

“Alam ko ho.”

“Mapapahamak ka.”

“Umalis man tayo o hindi mapapahamak pa rin tayo, kaya maigi pang piliin ko na lang na iligtas kayo,” mariin niyang sabi dahil ibig niyang ipakita sa kanyang stepfather na buong-buo ang kanyang loob.

Itutuloy…

Bilyonaryong Mafia ang Mahal Ko (2)

ni Maria Angela Gonzales @Kuwentong Pag-Ibig | Pebrero 7, 2024

Malalim na buntong hininga ang kanyang pinawalan habang nakatitig sa screen ng kanilang telebisyon na may sukat na 32 inches. 

Talaga naman kasing nakakainggit kapag nagkakaroon ng nakakakilig na eksena ang mga bida sa Korean telenovela. 

Kahit naman kasi 21-anyos na siya, naniniwala pa rin siya sa happily ever after. Iyon kasi ang sabi ng kanyang ina noong nabubuhay pa ito na sa takdang panahon, matatagpuan niya rin umano ang lalaking karapat-dapat para sa kanya. 

Ngunit, paano? Parang napakaimposible namang makatagpo siya ng isang prinsipe na sobrang guwapo kung siya ay naninirahan lamang sa isang squatter area. 

Hindi naman kasi siya palalabas, maliban na lamang kung may trabaho siya. Ngunit, paano na ngayon? Wala na rin siyang trabaho. Pinatalsik siya sa  trabaho dahil panay ang pagpapa-cute sa kanya ng boyfriend ng kanyang amo. 

Kahit naman kasi namamasukan lang siya bilang waitress, maganda at kaakit-akit pa rin ang kanyang pangangatawan, kaya hindi rin nakapagtataka kung bakit madaming nagkakagusto sa kanya. 

Dapat nga ba niya iyon ikatuwa? Hindi, dahil kahit wala siyang ginagawang masama, siya ang laging nasisisi. Hindi naman kasi niya ginusto na mainlab sa kanya ang mga lalaking taken na.

Siya nga pala si Olivia Castro, Via for short.  

Wala na ang kanyang ina at ama. Pero, mayroon naman siyang Tatay Pedro. 

Si Pedro Pedral ang naging asawa ng kanyang nanay. Hindi man ito ang kanyang tunay na ama, pero nagawa nitong magampanan ang pagiging mabuting asawa at ama sa kanila. 

Kaya, paano siya hindi maniniwala sa pag-ibig kung nakita niya iyon sa ina at sa kanyang Tatay Pedro.

Pagkaraan ay napailing siya dahil mula nang mamatay ang kanyang ina dahil sa aksidente. 

Kahit hindi kasama ang Tatay Pedro, para na rin itong namatay dahil unti-unting itong nagbago. 

“Aalis na tayo sa lugar na ito,” malakas na sabi ng kanyang Tatay Pedro.  

“Bakit po?”

“Dahil papatayin nila ako kapag hindi ko nabayaran ang utang ko,” anitong nanginginig ang boses sabay hagulgol. 

Itutuloy…

Bilyonaryong Mafia ang Mahal Ko (1)

ni Maria Angela Gonzales @Kuwentong Pag-Ibig | Pebrero 6, 2024

UNANG LABAS. 

Si Nhel Zamora ay ang klase ng tao na ‘di nagpapautang, pero may dahilan kaya niya pinautang nang pinautang si Pedro Pedral. 

Ibig niya kasi itong malubog sa utang, at nais din niyang makiusap ito sa kanya para maisagawa niya ang kanyang paghihiganti. 

Kahit na lumaki siyang mayaman, hindi sapat iyon para maging masaya ang kanyang buhay. Mahirap maging masaya, lalo na kung may kulang sa pagkatao mo, at iyon ay ang pagkakaroon niya ng ama.

Hindi man sinabi ng kanyang ina kung ano’ng kinahinatnan ng kanilang love story, narinig naman niya iyon sa kanilang mga katulong.“Napaaway na naman ang alaga ko,” wika ng kanyang Yaya Mameng.“Nakita ko nga may pasa na naman ang alaga mo,” wika naman ng isa pa nilang katulong na si Asunta. 

Sila ay mayroong tatlong kasambahay, pero kabilang na roon ang kanyang yaya na walang ibang ginawa kundi tutukan ang kanyang mga pangangailangan. 

“Ano bang nangyari?” Tanong naman ni Bebang - ang pinakatsismosa sa tatlo. 

“Tinukso na putok sa buho,” wika niya.Nanlaki ang kanyang mga mata nang narinig niya iyon. Hindi naman niya kasi sinabi ang dahilan kung bakit siya napaaway kaya ikinagulat niyang alam iyon ng kanyang yaya.“Nasaan ba kasi ang tatay ni Nhel?” Tanong ni Bebang.“Tsismosa ka talaga,” sagot naman ni Asunta.

“Nalunod yata sa isang mangkok na sabaw,” sambit naman ni Yaya Mameng. 

Si Yaya Mameng ang nag-alaga sa kanyang ina noong bata ito, kaya hindi na rin ito nagkaroon pa ng oras para makapag-asawa at magkaroon ng sariling pamilya.“Paanong nangyari iyon?” 

“Ayaw sa kanya ng mga magulang ni Marie,” 

Ang tinutukoy nilang Marie ay ang Ina ni Nhel Zamora. 

“Dahil mahirap lang ito?” Pagtatanong ni Asunta.“Hindi lang dahil sa mahirap, kundi dahil ambisyoso ito. Pinaibig niya lang nang husto si Marie at binuntis dahil nais niyang makaahon sa kahirapan. Hindi iyon pinayagan nina Senyor at Senyora. Sabi ng mga ito, mas gugustuhin pa nilang maging disgrasyada ang kanilang anak, kaysa maloko ni Pedro Pedral na wala rin namang pakialam. Dahil ‘di na ito bumalik pa nu’ng itaboy ito ng mga magulang ni Marie.”Marami pang pinag-usapan ang trio tsismosa, pero ang pinakatumatak sa kanyang isipan ay ang pangalan ng lalaking iyon na si Pedro Pedral.

Itutuloy…