3 UK variant ng COVID-19 mula sa Davao Region

ni Lolet Abania | February 14, 2021

Tatlong indibidwal ang naitalang nagpositibo sa test sa UK variant ng COVID-19 sa Davao Region, ayon sa Department of Health (DOH).

Dalawa sa tatlong pasyente ay mula sa Davao de Oro na isang 33-anyos na lalaki ng Compostela at isang 54-anyos naman na babae na taga-New Bataan. Ang isa pa rito ay ang unang nai-report na 10-anyos na batang lalaki na galing sa Davao Region.

Agad na nagpulong ang Department of Health Region 11 at ang local government units ngayong Linggo upang magsagawa ng pagresponde sa kaso ng UK COVID-19 variant sa naturang lugar.

Gayundin, ang mga awtoridad ay nagsasagawa na ng contact tracing upang maiwasan ang pagkalat ng nasabing sakit.

Samantala, inanunsiyo naman ng DOH Central Visayas na 60 sa 70 mga samples na ipinadala ng ahensiya sa Philippine Genome Center para sa genomic sequencing noong nakaraang linggo ay nagnegatibo na sa test sa B.1.1.7 variant o UK COVID-19.

Gayunman, ang natitirang sampu ay patuloy na nagsasagawa ng sequencing.

Kasama na ang tatlong ito sa 44 naitalang kaso ng UK variant ng COVID-19 sa bansa.

Lindol sa Davao del Sur... Mga pasyente inilikas; nagmo-malling nagtakbuhan palabas

ni Lolet Abania | February 6, 2021

Halos magkasunod na pagyanig ang tumama sa Davao del Sur ngayong Linggo, ayon sa Phivolcs.

Ang unang pagyanig ay 4.8-magnitude na lindol na naramdaman ng alas-7:28 ng umaga habang ang ikalawang pagyanig ay 6.1-magnitude na mas malakas ng alas-12:22 ng tanghali.

Dahil sa naganap na pagyanig, kinailangang agad ilikas ang ilang mga pasyente sa mga ospital sa Kidapawan City, ayon sa city disaster risk reduction management office (CDRRMO).

"Tayo ay nag-evacuate ng mga ospital sa lungsod," ani Psalmer Bernalte, ng Kidapawan CDRRMO sa isang interview.

Dagdag pa ni Bernalte, magsasagawa rin sila ng preemptive evacuation sa tinatayang 100 pamilya na nakatira malapit sa Mt. Apo upang masiguro ang kanilang kaligtasan sakaling magkaroon ng landslides dahil sa posibleng mas malakas pang lindol at aftershocks ang maganap.

Nagsilabasan naman ang mga namimili at niyanig ang mga paninda sa mga mall sa ilang probinsiya ng Mindanao.

May mga hinimatay at nagsisigawang customers sa Mall of Ace Centerpoint sa Koronadal City, South Cotabato dahil sa takot dulot ng malakas na pagyanig.

Nagsitakbuhan palabas ang mga nagmo-malling sa SM General Santos City habang pinahintay muna sila sa open area ng mall.

Ayon kay municipal information officer Anthony Allada, ramdam sa bayan ng Magsaysay, Davao del Sur ang malakas na pagyanig na nagpagalaw ng ilang gamit at mga pader. Naitala sa nasabing bayan ang epicenter ng dalawang lindol.

1,252 health workers sa Davao, may COVID-19

ni Lolet Abania | December 4, 2020

Umabot na sa 1,252 health workers sa Region 11 o Davao Region ang infected ng COVID-19, ayon sa Department of Health (DOH)-Region 11.

"During the pandemic naman, sila rin talaga 'yung nagdyu-duty sa hospital, clearing the COVID-19, even mga suspects pa lang po, probable, inaalagaan na po nila and they are in constant exposure to these patients," sabi ni DOH Regional Director Annabelle Yumang sa Laging Handa public briefing ngayong Biyernes.

Ayon kay Yumang, ang mga nagpositibong health workers ay nananatili na sa mga hotels upang mapigilan ang pagkalat ng virus at hindi na makahawa pa sa kanilang pamilya.

Dagdag ng opisyal, ang mga compensation benefits ng mga frontliners ay ibinibigay sa mga pamilya nito lalo na sa mga namatay dahil sa COVID-19.

"Ongoing na po ngayon 'yung compensation to other health workers na mabigyan po sila, lalo na 'yung mga mild to moderate cases," sabi ni Yumang.

Nagbigay naman ng pahayag si Yumang tungkol sa estado ng Davao Region matapos na sabihin ng mga eksperto mula sa UP OCTA Research na ang nasabing lugar ay isa sa mga epicenters ng COVID-19 pandemic kabilang ang National Capital Region at Calabarzon.

"Sa ngayon po, 'yung private hospitals naman natin, lalo na rito sa Davao City, nakapag-increase na po sila to 196 beds na po ang na-allocate for COVID," ani Yumang.

"Ongoing pa rin 'yung pagkausap natin with the private hospitals and we are supporting the private hospitals through deploying some of the nurses kasi sumusulat na po sila sa amin na 'yung mga needs nila are really the human resources. Ito po ngayon ang ginagawa natin dito sa region," sabi pa ng opisyal.