891 empleyado ng SPMC sa Davao, may COVID

ni Lolet Abania | January 29, 2022

Halos 900 empleyado ng Southern Philippines Medical Center (SPMC) sa Davao, ang nagpositibo sa test sa COVID-19 ngayong buwan.

Ito ang kinumpirma ng medical chief ng SPMC na si Dr. Ricardo Audan na karamihan sa 891 empleyado na tinamaan ng virus ay sumailalim sa home isolation, habang 30 lamang ang na-admit sa healthcare facility. “I think it’s the work of Omicron.

Ang mabuti lang dito, ’yung lahat ng nag-positive, fully vaccinated. And I think, karamihan din, naka-booster na,” sabi ni Audan sa isang interview. Sinabi ni Audan na dahil sa kakulangan ng mga staff ng ospital, binawasan ng SPMC ang quarantine period ng mga infected na empleyado na mula sa 7 araw ay ginawang 5 araw na lamang.

“Bale sinunod din namin ’yung guidelines ng IATF na 7 days fully vaccinated, ginawa na naming 5 days (ang quarantine) kasi talagang medyo ma-paralyze ang operation. But then, hindi kami nag-close, patuloy pa rin ‘yung serbisyo namin sa mga tao,” sabi ni Audan.

Gayundin, humingi na ang pamunuan ng ospital ng karagdagang personnel mula sa Department of Health (DOH), subalit ani Audan, ang ahensiya ay wala ring sapat na staff para ibigay sa kanila.

Ayon kay Audan, sumulat na rin ang ospital kay National Task Force Against COVID-19 chief implementer Carlito Galvez Jr., hinggil sa request nila na mga health workers na mula sa Armed Forces of the Philippines (AFP) at sa Bureau of Fire Protection (BFP).

Una nang natugunan ng mga naturang ahensiya ang kakulangan ng staff sa SPMC nang maitala ang unang surge ng COVID-19 sa Davao Region noong nakaraang taon. Subalit, bumalik din ang mga personnel na ito matapos na lumuwag ang sitwasyon sa lugar.

Samantala, parehong ang ICU at ward bed utilization rates sa SPMC ay umabot na sa 100 percent, kung saan ang lahat ng kanilang 87 ICU beds at 473 ward beds ay okupado na.

“Wala kaming problema mag-expand. In fact, mayroon kaming waiting na another 60 beds for expansion. The problem is ’yung staffing talaga,” sabi pa ni Audan.

Ang SPMC, isa sa pinakamalalaking mga ospital sa bansa, ay pangunahing ginagamot ang mga moderate hanggang critical COVID-19 cases dahil na rin ito sa pagdami ng mga pasyenteng tinatamaan ng coronavirus.

Gayundin, pansamantalang isinara ng ospital ang kanilang outpatient department na face-to-face services, habang pinayuhan ang mga pasyenteng mag-virtual consultation na lamang sa ngayon.

1 patay, 180 bahay nasunog sa Davao City

ni Lolet Abania | May 6, 2021

Isang senior citizen ang namatay habang nasa 180 kabahayan ang natupok matapos sumiklab ang sunog sa Davao City, kagabi.

Kinilala ang 84-anyos na biktima na si Diosdada Alferez.

Sa ulat ng Bureau of Fire Protection (BFP) Davao City, nagsimula ang sunog sa tirahan ng isang Charice Acupiado sa isang residential area sa Barangay Tibungco dakong alas-10:00 ng gabi nang Miyerkules.

Itinaas sa ika-5 alarma ang sunog habang naapula ang apoy alas-2:34 ng madaling-araw ngayong Huwebes.

Ayon pa sa BFP, isang nakasinding kandila ang naiwan na naging sanhi ng sunog.

Tinatayang nasa P630,000 ang halaga ng napinsala dahil sa sunog.

7,200 doses ng Sinovac, dumating na sa Davao

ni Mary Gutierrez Almirañez | March 30, 2021

Dumating na sa Davao City International Airport ang karagdagang 7,200 doses ng Sinovac COVID-19 vaccines, ayon sa Department of Health XI ngayong umaga, Marso 30.

Batay sa ulat, umabot na sa mahigit 60,000 doses ng Sinovac at AstraZeneca ang kabuuang bilang na kanilang natanggap, kung saan tinatayang 28,350 frontliners na ang nabakunahan ng unang dose sa 166 vaccination sites sa iba't ibang bahagi ng Davao region.

Giit pa ni Mayor Sara Duterte-Carpio, "Of course dili na siya okay. Giingnan na nato atong vaccine cluster to strictly follow the priority list, especially kanang 1A ug 1B kay mao na siya ang mu-cover sa mga frontliners."

Aniya, sinabihan nila ang vaccine cluster head na istriktong sundin ang mga nasa priority list, partikular na ang 1A at 1B na prayoridad mabakunahan. Sa ngayon ay maaari na ring pumunta ang ibang residente sa distrito at barangay health centers para sa pre-registration ng mga nais magpabakuna.