Dine-in resto, tourist spots at outdoor sports, oks na sa NCR Plus at iba pang lugar

ni Mary Gutierrez Almirañez | May 14, 2021

Inilabas na ng Inter-Agency Task Force (IATF) ang mga bagong guidelines na ipatutupad sa ilalim ng general community quarantine (GCQ) ‘with heightened restrictions’ sa NCR Plus Bubble at iba pang lugar simula May 15 hanggang 31, ayon sa inianunsiyo ni Presidential Spokesperson Harry Roque kagabi.

Kabilang sa pinahihintulutan ay ang mga sumusunod:

• 20% capacity sa mga indoor dine-in services at 50% capacity sa outdoor o al fresco dining

• 30% capacity sa mga outdoor tourist attraction

• 30% capacity sa mga personal care services, katulad ng salon, parlor at beauty clinic

• 10% capacity sa mga libing at religious gathering

• Pinapayagan na rin ang outdoor sports, maliban sa may physical contact na kompetisyon

Mananatili pa rin namang bawal ang mga sumusunod:

• entertainment venues katulad ng bars, concert halls, theaters

• recreational venues, katulad ng internet cafes, billiard halls, arcades

• amusement parks, fairs, playgrounds, kiddie rides

• indoor sports courts

• indoor tourist attractions

• venues ng meeting, conference, exhibitions

Higit sa lahat, bawal magtanggal ng face mask at face shield kapag nasa pampublikong lugar. Bawal ding lumabas ang mga menor-de-edad at 65-anyos pataas, lalo na kung hindi authorized person outside residency (APOR).

Patuloy pa ring inoobserbahan ang social distancing sa kahit saang lugar at ang limited capacity sa mga pampublikong transportasyon.

Maliban sa Metro Manila, Bulacan, Rizal, Cavite, at Laguna ay isasailalim din sa GCQ ang Apayao, Baguio City, Benguet, Kalinga, Mountain Province, Abra, Cagayan, Isabela, Nueva Vizcaya, Batangas, Quezon, Puerto Princesa, Iligan City, Davao City, at Lanao del Sur hanggang sa katapusan ng Mayo.

Mananatili naman sa modified enhanced community quarantine (MECQ) ang Santiago City, Quirino, Ifugao, at Zamboanga City.

1 patay, 180 bahay nasunog sa Davao City

ni Lolet Abania | May 6, 2021

Isang senior citizen ang namatay habang nasa 180 kabahayan ang natupok matapos sumiklab ang sunog sa Davao City, kagabi.

Kinilala ang 84-anyos na biktima na si Diosdada Alferez.

Sa ulat ng Bureau of Fire Protection (BFP) Davao City, nagsimula ang sunog sa tirahan ng isang Charice Acupiado sa isang residential area sa Barangay Tibungco dakong alas-10:00 ng gabi nang Miyerkules.

Itinaas sa ika-5 alarma ang sunog habang naapula ang apoy alas-2:34 ng madaling-araw ngayong Huwebes.

Ayon pa sa BFP, isang nakasinding kandila ang naiwan na naging sanhi ng sunog.

Tinatayang nasa P630,000 ang halaga ng napinsala dahil sa sunog.

2 holdaper ng cellphone at P720, patay

ni Mary Gutierrez Almirañez | April 17, 2021

Patay ang dalawang itinuturong holdaper dahil sa panghoholdap ng cellphone at P720 mula sa isang babae sa Sitio Glabaca, Barangay Lizada Toril, Davao City, batay sa isinagawang hot-pursuit operation ng Toril Police Station kagabi, Abril 16.

Ayon sa ulat, ikinasa ng mga awtoridad ang operasyon matapos makilala ng biktimang si Julie Ann Panganiban ang mga holdaper na sina Napoloeon Butuan at Warren Gayak.

Salaysay pa ng mga awtoridad, nang matunton nila ang kinaroroonan ng dalawa ay bigla umanong bumunot ng baril si Napoloeon at nagsimulang magpaputok, subalit nakaiwas ang pulis.

Samantala, ang kasama naman nitong si Warren ay kumuha umano ng katana saka sinugod ang isa pang pulis. Sa huli’y napabagsak din nila ang dalawang holdaper.

Kaagad naman nilang dinala sa Davao Mediquest Hospital ang mga nabaril na holdaper ngunit idineklarang dead on arrival.

Narekober sa crime scene ang .38 revolver, mga basyo ng bala, isang katana at ilang personal na gamit. Naibalik din kay Panganiban ang nanakaw niyang cellphone at pera.