20 kabahayan natupok sa Davao City — BFP

ni Lolet Abania | January 15, 2022

Nasa tinatayang 20 kabahayan ang natupok matapos na sumiklab ang sunog sa Davao City ngayong Sabado ng umaga, ayon sa Bureau of Fire Protection.

Sa ulat ng Bucana Fire Station, gawa sa mga light materials ang marami sa mga bahay na nasunog habang mabilis na kumalat ang apoy.

Agad na isinara ang isang bahagi ng Bolton Bridge sa Barangay 76-A ng nasabing lungsod, bandang alas-9:30 ng umaga dahil sa sunog.

Batay sa mga lumabas na video mula sa mga netizens, kitang-kita ang makakapal at maiitim na usok na nanggagaling sa ilalim ng tulay habang malalaking apoy naman ang tumutupok sa mga kabahayan.

Alas-11:00 ng umaga, idineklarang fire-out ang sunog ng BFP.

Wala namang naitalang nasaktan matapos ang sunog, subalit ayon sa mga awtoridad nasa tinatayang 23 pamilya ang nawalan ng tirahan.

Ayon pa sa BFP, posibleng ang sanhi ng sunog ay faulty wiring mula sa tirahan ng isang residente ng nasabing barangay.

Gayunman, patuloy na inaalam ng mga awtoridad ang dahilan at pinagmulan ng sunog.

Kauna-unahang major operation sa police headquarters sa Davao, naging matagumpay

ni Jasmin Joy Evangelista | November 28, 2021

Matagumpay na naisagawa ang kauna-unang major operation ng Police Regional Office 11 Ambulatory Surgical Clinic sa isang 46-anyos na kasapi ng PNP na mayroong breast cancer.

Ang kauna-unahang major operation ay isinagawa sa Police Regional Office XI Ambulatory Surgical Clinic ng mga espesyalista na mula naman sa Camp Sgt. Quintin M. Merecido Hospital sa Davao City.

Nitong Nobyembre 11 lamang nang matanggap ng PRO 11 - ASC ang license to operate at accreditation mula sa Department of Health.

Lubos ang pasasalamat ng pasyente na nakatalaga sa Surigao at may ranggo na Police Senior Master Sergeant dahil natugunan na ang kanyang problema matapos maantala dahil sa pandemya at pinansyal na pangangailangan.

Pekeng sundalo tiklo sa checkpoint; gamit na motor, nakaw

ni Jasmin Joy Evangelista | November 4, 2021

Arestado ang isang lalaking construction worker matapos magkunwaring Philippine Army personnel sa isang checkpoint ng pulisya sa Davao City, nitong Miyerkules.

Ang suspek ay nakasuot ng camouflage uniform ng sundalo habang nakasakay sa kanyang motorsiklo.

Hinarang ito ng mga awtoridad para inspeksiyunin ngunit wala itong naipakitang driver’s license.

Sa halip, nagbigay ito ng pekeng AFP ID ngunit napansin ng mga pulis na walang logo ng AFP ang ibinigay nitong ID.

Nakuhanan ang suspek ng isang pekeng .45 pistol.

Napag-alaman din na nakaw pala ang gamit nitong motorsiklo.

Patong-patong na kaso ang nakatakdang harapin ng suspek.