P12 M fuel subsidy, naibigay sa mga corn farmers at mangingisda – DA

ni Lolet Abania | April 24, 2022

Nakapagpamahagi na ang Department of Agriculture (DA) ng P12 milyon mula sa P1.1-billion fuel subsidy para sa mga magsasaka ng mais at mangingisda sa buong bansa na layong mabawasan nito ang epekto ng sunud-sunod na pagtaas ng presyo ng langis sa kanila.

Sa isang interview ngayong Linggo, sinabi ni DA Assistant Secretary Noel Reyes na ang mga nakarehistrong magsasaka sa ilalim ng Registry System for the Basic Sectors in Agriculture (RSBSA) at mga mangingisda sa ilalim naman ng Bureau of Fisheries and Aquatic Resources (BFAR) ay binigyan ng P3,000 fuel subsidy.

“Ang priority muna ‘yung mga nakalista na. So, we’re still encouraging others to have their names registered sa RSBSA. Patuloy naman po ‘yung registration dahil nakaka-P12 million pa lang kami sa buong bansa,” saad ni Reyes.

Paliwanag ni Reyes, ang P1.1 bilyong alokasyon para sa programa ay napondohan sa pamamagitan ng P500 milyong halaga mula sa 2022 budget, at ang natitirang P600 milyon ay mula naman sa inaprubahan kamakailan ng Department of Budget and Management (DBM).

Ayon kay Reyes, tinatayang 300,000 magsasaka ng mais at mangingisda ang mabebenepisyuhan mula sa naturang programa.

Samantala, in-exempt ng Commission on Elections (Comelec) ang subsidy programs ng DA para sa mga eligible na mga magsasaka at mangingisda mula sa election spending ban, kung saan kinumpirma ito ni Comelec Commissioner George Garcia nitong Miyerkules.

Tinanong naman si Reyes kung ang alokasyon ng nasabing fuel subsidy ay magpapatuloy ngayong buwan, aniya, “Oo, itong katapusan. Itong remaining days and towards the elections. Hanggang matapos, basically. Hanggang maibigay lahat.”

Maliban sa fuel subsidy, sinabi ni Reyes na ang DA ay nagbigay din ng P5,000 aid sa ilalim ng Rice Farmers Financial Assistance, na exempted din mula sa election spending ban.

Para sa mga magsasaka at mangingisda… DFA: 662.5 milyon ayuda sa nasalanta ni ‘Agaton’

ni Zel Fernandez | April 23, 2022

Matapos ang pananalasa ng Bagyong Agaton, partikular sa bahaging Visayas at Mindanao, agad na nagpahiwatig ng suporta ang pamahalaan sa lahat ng mga pamayanan na lubhang naapektuhan ng kalamidad, katuwang ang Department of Agriculture (DA).

Batay sa panayam kay Department of Agriculture (DA) - Philippines Asec. Arnel De Mesa, mayroong P662.5 milyon na halaga ng ayuda ang kanilang inihanda para sa mga magsasaka at mangingisdang labis na naapektuhan ni ‘Agaton’ sa mga isla ng Visayas at Mindanao.

Ayon sa DA, mula sa binanggit na ayuda ay nakalaan ang P40,000 sa animal stocks, drugs, at biologics para sa livestock at poultry sa rehiyon ng CARAGA, habang bibigyan naman ng kani-kanyang pondo ang iba pang rehiyon base sa kanilang pangangailangan.

Mula rin sa nasabing pondo manggagaling umano ang P500-M budget para sa Quick Response Fund na gagamitin sa rehabilitasyon ng mga apektadong lugar, P42-M halaga ng mga palay, P16.76-M katumbas ng mga pananim na mais, P3.61-M halaga ng mga gulay at P100-M sa ilalim ng Survival and Recovery Assistance Program of the Agricultural Credit Policy Council (ACPC) for Western Visayas.

Inaasahang makatutulong ito sa mga apektadong pamilya na makabangon muli, kasabay ng pagbibigay-pansin sa tulong pinansiyal na kakailanganin upang maisalba ang kanilang kabuhayan.

Samantala, matatandaan na nauna nang nagpahayag ang NDRRMC na umabot na sa halagang P64,028,560 assistance ang naibigay sa mga apektadong lugar.

BOC, DA at DTI, joint force… Smuggled carrots, nasabat sa Divisoria

ni Zel Fernandez | April 20, 2022

Sampung kahon ng smuggled na carrots ang nasabat sa pag-iinspeksiyon ng mga operatiba sa Divisoria, kagabi.

Tinatayang aabot sa halagang ₱8,000 ang mga smuggled carrots na nakumpiska ng Bureau of Customs, kasunod ng isinagawa nitong joint operations kasama ang Department of Agriculture at Department of Trade and Industry sa mga natitinda ng agricultural products sa Divisoria.

Sa mas pinaigting pang kampanya laban sa smuggling, ipinaliwanag ng DA na matagal na nilang tinututukan ang mga nagpupuslit ng mga imported agricultural products upang matulungan ang mga lokal na magsasakang nahihirapang makapagbenta ng kanilang mga aning gulay dahil sa matinding kumpetensiya sa merkado dulot ng mga imported goods.

“Marami na kaming nahuli sa pantalan hanggang dito sa second border. ‘Pag sinabi nating second border, du’n na sa mga cold storage mismo, sinusuyod natin ang mga cold storage,” pahayag ni Serapio Garabiles, Jr., inspection officer ng Department of Agriculture.

Ayon sa BOC, ipinupuslit umano ang mga imported na gulay kasama ng mga aprubadong produkto kaya minsan ay nakalulusot ito sa inspeksiyon sa mga pantalan.

Babala pa ng DA at BOC, hindi sila titigil sa pagsawata sa mga iligal na nagpupuslit ng mga gulay sa bansa upang higit pang maprotektahan ang mga lokal na magsasaka at mga mamimili, “tandaan ninyo ‘yan pati ang mga smuggler inaalam na namin. Dalawang beses na kaming nag-operate sa palengke, pagbibigay ‘to ng warning na hindi kami titigil. Ang pangatlong operation namin may kulong na”, ani Garabiles.

Dagdag naman ni Chief Alvin Enciso, MICP Customs Intelligence and Investigation Service, “pwede ho kayong tumakbo pero hahabulin at hahabulin po namin kayo. Sayang lang ho ‘yung gagastusin n’yo para mailabas. Pagdating mo sa mga palengke, sa mga warehouses, hahabulin pa rin ho namin ‘yon”.

Sasampahan sana ng kaso ang mga mahuhuling may-ari ng mga kumpiskadong produkto ngunit wala nang umangkin sa mga ito.