P95/kilo presyo ng sugar… Suplay ng bigas at asukal, sapat pa — DA

ni Lolet Abania | December 14, 2022

Ipinahayag ng Department of Agriculture (DA) na ang suplay ng bigas at asukal sa bansa ay sapat pa hanggang sa susunod na taon, kung saan ang halaga ng mga sugar products sa ngayon ay bumaba na sa P95 kada kilo.

Sa isang interview ngayong Miyerkules, sinabi ni DA Assistant Secretary at spokesperson Kristine Evangelista na ang supply ng asukal ay mas mabuti na ngayon kumpara noong mga nakalipas na buwan dahil ito sa milling season ng mga local producers.

“Nakikita na natin na there were months na P120 umabot ang ating refined, ngayon nasa P95 na po,” saad ni Evangelista na aniya pa, ang Sugar Regulatory Authority (SRA) ay patuloy na nakikipag-ugnayan sa mga local traders.

Ayon sa opisyal, base na rin sa supply situation, ang presyo ng asukal ay maaaring ma-stabilize hanggang sa susunod na taon.

“That is the objective. We are looking at the cost structure, now we see it at P95. Although meron tayong of course tinitingnan na pwedeng mag-P90, pero meron tayong kino-consider na factors, also taking into consideration ‘yung mga movement ng gasolina,” sabi ni Evangelista.

“At P95, maganda po ‘tong presyong ‘to and [P95 is a good price] we want to maintain this price as much as possible,” pahayag niya. Pinawi rin ni Evangelista ang pangamba ng mga konsyumer patungkol sa suplay ng bigas aniya, ito ay sapat pa hanggang sa unang quarter ng 2023.

“Based sa supply data ng Department of Agriculture, at ito ay sa pakikipag-ugnayan din ng mga ibang stakeholders tulad ng SINAG, we are sufficient pagdating po sa bigas.

Marami po tayong na-produce na local rice at base po doon, hanggang first quarter nga, marami po,” ani Evangelista.

P20 ‘di ubra P27.50 kada kilo ng bigas ang kaya — DA

ni Lolet Abania | June 21, 2022

Ipinahayag ni Department of Agriculture (DA) Secretary William Dar ngayong Martes na habang sinusuportahan niya si President-elect Ferdinand “Bongbong” Marcos Jr. sa layon nitong maibaba ang presyo ng bigas para sa mga mamamayan ng P20 kada kilo, nasa P27.50 kada kilo ang pinakamalapit na kaya nilang gawin.

“The nearest we can do by now — I can be given other figures if you have better way of doing it — P27.50 is the nearest,” saad ni Dar sa isang press conference.

Ayon kay Dar, nagsimula na ang DA na mag-conceptualize kung paano maaabot o magiging malapit sa P20/kg na target habang nakabuo rin nito mula sa mga nakalap na suhestiyon.

Ani opisyal, isa rito ang pag-adopt ng Masagana 99, isang programa ng ama ni P-BBM, ang yumaong dating Pangulong Ferdinand Marcos Sr.

Sa ilalim ng programa, nilalayon ng gobyerno na itaas ang average rice crop ng bansa na aabot sa 99 kaban per hectare, kung saan ang mga magsasaka ay gumagamit naman ng makabagong nadebelop na mga teknolohiya.

Ayon kay Dar, sa kasalukuyan ang national average para sa parehong inbred at hybrid rice ay nasa 4.5 metric tons per hectare, kung saan mas mababa sa 100 kaban.

“So that must be the aspiration there before. Now let’s go beyond that aspiration. So for inbred rice meron kaming konseptong Masagana 150,” sabi ni Dar na giit niya, ito ay katumbas sa 7.5 metric tons per hectare. Para naman sa hybrid rice, ani Dar, plano nilang magkaroon ng Masagana 200.

Samantala, sa isang television interview, sinabi ni dating DA Secretary Manny Piñol na ang pagpapababa sa presyo ng bigas sa P20 ay hindi advisable dahil aniya, makakaapekto ito sa pamumuhay ng mga Pilipinong magsasaka.

“Kung gusto ng Presidente, puwedeng gawin, but it’s not advisable, it’s not economically viable. It will cause government finance of losses, big time,” pahayag ni Piñol sa isang interview ng CNN Philippines.

“The rule of thumb is the price of rice, divided by two is the price of palay. So kung P20 ‘yung bigas mo, P10 lang ‘yung palay noong farmer eh, malulugi ‘yung farmer, hindi papayag ‘yun,” dagdag pa ni Piñol.

Biyaya sa magsasaka at mangingisda... Higit 161-M agri-fishery projects, kaloob sa Ilocos Norte – DA

ni Zel Fernandez | May 3, 2022

Malugod na ipinamahagi ng Department of Agriculture (DA) ang tinatayang P161.32 milyong halaga umano ng mga agri-fishery development projects sa iba’t ibang asosasyon ng mga magsasaka at kooperatiba sa Ilocos Norte.

Pinangunahan ni Sec. William Dar at Ilocos Norte Governor Matthew Joseph Manotoc ang paggawad at pamamahagi ng iba’t ibang post-harvest facility, irigation network services kabilang ang mga productions inputs para sa mga magsasaka at mangingisda mula sa una at ikalawang distrito ng lalawigan.

Ayon sa DA, sa pangkalahatan ng naturang proyekto, ang serbisyong irigasyon ang may pinakamalaking halaga na aabot umano sa mahigit P50 milyon.

Kaugnay nito, limang DA attached agencies ang naggantimpala ng iba’t ibang kaukulang proyekto sa mga magsasaka at mangingisda na tinatayang aabot naman sa higit P80 milyon.

Gayundin, nasa mahigit P20 milyon naman anila ang ipinamahagi mula sa Bureau of Fisheries and Aquatic Resources (BFAR), habang mahigit P600 libo naman ang nanggaling sa Philippine Rice Research Institute (PhilRice) at Philippine Crop Insurance Corporation (PCIC).

Kasunod ng mga suportang ipinagkakaloob ng ahensiya sa pagpapabuti ng pagsasaka at pangingisda sa Ilocos Norte ay nagpasalamat naman si Gov. Manotoc sa mga interbensyong ito ng DA na pakikinabangan ng kanilang sektor sa agrikultura at pangingisda.