Presyo ng baboy, dapat P300 lang — DA

ni Lolet Abania | January 26, 2021

Milyun-milyong baboy ang naitalang nawala sa bansa mula sa kabuuang populasyon nito dahil sa African Swine Fever (ASF), ayon sa pahayag ng Department of Agriculture ngayong Martes.

“Mahigit four million hogs ang nawala sa system. Nagsimula ang 2020, [nasa] 12.7 million hogs, ngayon nasa eight million,” sabi ni Agriculture Assistant Secretary Noel Reyes sa isang interview.

Bukod sa culling ng mga ASF-infected na baboy, marami ring mga hog raisers ang hindi na ninanais na bumalik pa sa pag-aalaga ng mga ito dahil sa takot sa naturang sakit.

“‘Yung iba, hindi na nag-alaga ng baboy,” ani Reyes.

Ang kakulangan ng supply ng karne at buhay na baboy ang dahilan din kaya matindi ang pagtaas sa presyo nito na umaabot sa P400 kada kilo sa Metro Manila.

“‘Yung pagtaas ng presyo ng baboy ay bunsod ng epekto ng ASF mula pa noong nakaraang taon. Noong 2019 pa ‘yan, eh, kaya bumaba talaga ang populasyon,” sabi ni Reyes.

“‘Yung kakulangan na ‘yan, nag-manifest na... last year maganda pa ang presyo natin, P270 to P300, sumipa ang presyo ng holiday season, [naging] P400 noong Christmas, ngayon, hindi bumababa,” dagdag ng opisyal.

Sa kabila ng problema sa pagbaba ng populasyon ng mga baboy, ayon sa DA official, makatwiran na sa P200 farm gate price ay dapat magkaroon lamang ng profit margin na P80 hanggang P100.

Aniya, “So dapat, P300 [per kilo] pero dito sa Maynila, eh, P400 pa rin, so may nagsasamantala.”

Gayunman, para mapigilan ang lalong pagtaas ng retail prices ng baboy at manok, inirekomenda na ng DA kay Pangulong Rodrigo Duterte na magpatupad ng price freeze sa mga nasabing produkto, kung saan P270 kada kilo ang kasim at pigue, P300 kada kilo ang liempo, at P160 kada kilo ang karne ng manok.

“Kulang sa ngipin kasi ang SRP (suggested retail price), hanggang doon lang suggested, so pakiusap, sa price freeze, puwedeng kasuhan agad ang hindi sumusunod sa price level,” ayon kay Reyes.

Hinihintay pa ng DA ang magiging desisyon ng Palasyo patungkol sa rekomendasyon ng ahensiya.

P10-K insurance kada baboy, alok ng DA

ni Lolet Abania | January 21, 2021

Iminungkahi ng Department of Agriculture (DA) sa backyard at commercial na mga hog raisers na tiyaking makakuha ng insurance package para sa kanilang mga alaga upang masigurong makakarekober agad sakaling maapektuhan ng African Swine Fever (ASF).

“As the Department of Agriculture (DA) intensifies efforts to encourage hog raisers to get back to business and, ultimately, help pork production rebound, availing of an insurance coverage is a prudent safety net for existing raisers and for those in ASF-free areas who will venture into this business,” ani Agriculture Secretary William Dar sa isang statement ngayong Huwebes.

“Insurance offers stronger security in protecting one’s investments,” dagdag ni Dar.

Sinabi ni Dar na dapat samantalahin ng mga tagapag-alaga ang libreng livestock insurance na iniaalok ng Philippine Crop Insurance Corporation (PCIC) ng DA.

“Regain your businesses and protect your livelihood,” aniya pa.

Ayon sa pangulo ng PCIC na si Atty. Jovy Bernabe, isinama ng DA-PCIC, nag-iisang agricultural insurance firm sa bansa, ang ASF sa mga iko-cover ng livestock insurance na sinimulan noon pang nakaraang taon nang kumalat ang nasabing sakit sa mga hayop sa mga probinsiya.

Ang PCIC ay magbibigay ng P10,000 insurance na sakop kada isang baboy at ang premium payment ay aabot lamang ng 2.25% o P225.

Para sa maliliit na backyard hog raisers, bibigyan sila ng libreng insurance kung sila ay nasa listahan ng Registry System for Basic Sectors in Agriculture (RSBSA).

Paliwanag ni Bernabe, ang insurance coverage ay iba sa tinatawag na ASF indemnification claims, kung saan ang mga benepisyaryo ay karapat-dapat na mabigyan ng P5,000 assistance kada baboy na na-culled.

Sinabi rin ni Bernabe na sa mga hog raisers na nais kumuha ng nasabing insurance, maaaring mag-online sa DA-PCIC website, o pumunta sa alinmang 13 regional offices, 58 provincial extension offices at 20 service desks.

Maaari ring humingi ng assistance sa provincial, city o municipal agricultural officer o sinumang opisyal ng kanilang lokalidad.

'Pinas, bird flu-free na — DA

ni Lolet Abania | January 19, 2021

Ligtas na ang Pilipinas mula sa Avian Influenza (AI) o tinatawag na bird flu, ayon sa pahayag ng Department of Agriculture (DA) ngayong Martes. Sa isang statement ng DA, idineklara ng World Organization for Animal Health (Office International des Epizooties-OIE) na noong Enero 8, 2021, ang bansa ay ligtas na mula sa natitirang A(H5N6) strain ng AI o bird flu.

Sinikap ng pamahalaan na maresolbahan ang pagkalat ng AI na may strain na A(H5N6) sa isang commercial poultry farm sa Pampanga at backyard poultry farms sa isang bayan sa Rizal sa loob ng humigit-kumulang na isang taon matapos na ang nasabing virus na nakaapekto sa mga hayop ay pumasok sa bansa.

“I congratulate the DA-BAI (Bureau of Animal Industry) and the local governments of Pampanga and Rizal, whose swift action resulted in limiting the further spread of the AI A(H5N6) strain to other areas,” sabi ni Department of Agriculture (DA) Secretary William Dar.

Aniya pa, magandang balita ito dahil ang mga poultry meat na pinakamainam na pinanggagalingan ng protein na pagkain ng mga Pinoy gaya ng baboy at baka ay bird flu-free na. Sa ibinigay na report sa OIE, ayon sa DA-BAI lumabas na ang mga apektadong poultry farms ay wala nang AI virus mula sa isinagawang monitoring at surveillance.

"We had not detected any case of AI A(H5N6) among the poultry and other bird population in the last 90 days after the completion of cleaning and disinfection in the affected farms, surveillance and monitoring, and completion of the 35-day restocking period with sentinel animals in Pampanga and Rizal," ani DA-BAI Ronnie Domingo.

Matatandaang noong July 10, 2020, kinumpirma ng DA-BAI Animal Disease Diagnosis and Reference Laboratory ang pagtama ng A(H5N6) strain sa mga hayop sa bansa matapos na ipaalam ng may-ari ng commercial layer farm sa opisina ng Pampanga provincial veterinary ang pagkakaroon ng kakaibang kulay ng mga itlog at pagkakasakit at pagdami ng mga namamatay na alaga niyang manok.

Isa pang kaso ang na-detect sa Rizal, na ini-report ng isang magsasaka noong August 26, 2020 sa opisina ng municipal veterinary ng Taytay. Lumabas din sa pagsusuri ng DA noong August 10, 2020, ang mga clinical signs ng mga hayop na namatay ay may sakit na AI.

Agad na nagsagawa ang DA, katuwang ang mga farm owners at Department of Health ng sanitary control at containment operations upang mapigilan ang pagkalat ng bird flu sa ibang lugar.

"We appreciate the rapid response and collaboration of the local government units of Pampanga and Rizal and DA Regional Field Offices III and IV-A," sabi ni Domingo.

Patuloy na pinapayuhan ng DA-BAI ang mga poultry farmers at industry stakeholders na maging mapagmatyag at agad i-report sa mga farm veterinarians o pinakamalapit na government veterinary and agriculture office sakaling muling magkaroon ng ganitong insidente sa kanilang mga alagang hayop.