Pumila sa community pantry, lumabag sa curfew, pinagmumulta

ni Lolet Abania | April 22, 2021

Ilang residente ang natikitan dahil sa paglabag sa curfew ng Quezon City Task Force Disiplina matapos na pumila sa Maginhawa Community Pantry sa Quezon City ngayong Huwebes ng madaling-araw.

Isang misis na nagkakalakal ang nagsabing dahil sa hirap ng buhay lalo na at pandemya, tatlong beses na umano silang pumilang mag-asawa sa Maginhawa Community Pantry, kung saan natikitan at pagmumultahin pa sila.

Ikinalungkot din ng iba pang mga natikitan ang nangyari sa kanila. Anila, sana ay itinaboy o pinagsabihan na lamang sila ng mga awtoridad.

Pinagmumulta ang mga nahuli ng P300 dahil sa paglabag sa curfew sa nasabing lungsod. Agad namang inako ni Mayor Joy Belmonte ang multa ng mga natikitan.

Sa isang text message, binanggit ni Belmonte na bilang konsiderasyon sa ilang residenteng natikitan na lumabag sa curfew na pumila sa Maginhawa Community Pantry, siya ang magbabayad nito.

“An ordinance has been violated, OVRs have been issue[d] so the penalty must be paid. But taking into consideration the circumstances they are in, I will be the one to pay the penalty in their behalf with a very strict warning not to repeat the violation,” ani Belmonte.

1,106 checkpoints habang lockdown

ni Lolet Abania | March 28, 2021

Mahigit sa 1,000 quarantine control points (QCPs) ang ilalatag sa Metro Manila at karatig lalawigan habang ang mga lugar na ito ay nakasailalim sa isang linggong enhanced community quarantine (ECQ), ayon sa Philippine National Police (PNP) ngayong Linggo.

Ayon kay Joint Task Force COVID Shield commander Police Lieutenant General Cesar Hawthorne Binag, may kabuuang 1,106 checkpoints habang 9,356 law enforcers ang nakatakdang italaga mula alas-6 ng gabi ngayong Linggo sa mga lugar na nasa ilalim ng mas mahigpit na lockdown. "At 6 p.m. they will be pre-positioned, but the implementation will start 12:01 a.m. [Monday]," ani Binag.

Sa inilabas ng PNP, ang mga inilatag na checkpoints at itinalagang PNP personnel sa bawat rehiyon ay ang mga sumusunod:

1. NCRPO (National Capital Region Police Office) - 929 QCPs, 2,297 police personnel

2. Police Regional Office - 3 (Central Luzon) - 162 checkpoints, 982 police personnel

3. Police Regional Office - 4A (Calabarzon) - 15 checkpoints, 498 police personnel Isinailalim ng gobyerno ang Metro Manila, Bulacan, Rizal, Cavite at Laguna sa mas mahigpit na quarantine mula March 29 hanggang April 4 matapos na makapagtala ng mahigit 9,000 bagong kaso ng COVID-19 sa isang araw.

Sinabi rin ni Binag na ang mga dating checkpoints sa panahon ng general community quarantine (GCQ) ay kabilang sa 1,106 kabuuang checkpoints na bubuhayin nila ngayong ECQ.

Ayon pa kay Binag, magtatalaga rin ng mga PNP personnel sa mga lugar na matatao gaya ng palengke, groceries at ibang establisimyento na nagbibigay ng basic services dahil marami ang mamimili ng mga essential goods.

10K pulis ikakalat sa Metro Manila

ni Lolet Abania | March 15, 2021

Ipapakalat ang 10,000 pulis sa Metro Manila upang masigurong maipapatupad ang mahigpit na uniform curfew, ayon sa Philippine National Police (PNP).

Ayon kay PNP officer-in-charge Police Lieutenant General Guillermo Eleazar, nagbigay na siya ng direktiba sa police force na ipatupad ang maximum tolerance sa lahat at patuloy na igalang ang karapatang pantao.

"To our personnel on the ground, be reminded of our two rules to avoid unnecessary confrontation to the public -- one, observe maximum tolerance; and two, respect the people's rights. We will be closely monitoring your compliance," ani Eleazar sa isang interview ngayong Linggo.

"And to the public, we also offer a formula to prevent unnecessary confrontation and spare yourself from arrest: one, respect the rules on observance of the minimum health safety standard protocols; and two, respect the authorities that are enforcing these protocols," dagdag pa ng opisyal.

Magsisimula ang curfew bukas, March 15 ng alas-10:00 ng gabi hanggang alas-5:00 ng umaga na tatagal ng dalawang linggo dahil sa biglang pagtaas ng COVID-19 cases sa buong National Capital Region (NCR).