5,781 kabataan nabakunahan na kontra-COVID-19 — Galvez

ni Lolet Abania | October 22, 2021

Mahigit sa 5,000 kabataan edad 15 hanggang 17-anyos na may comorbidities ang nabakunahan na laban sa COVID-19, ayon kay vaccine czar Carlito Galvez Jr. ngayong Biyernes.

Sa isang mensahe, sinabi ni Galvez na nasa kabuuang 5,781 menor-de-edad ang naturukan kontra-COVID sa inisyal na itinalagang walong ospital para sa programang pediatric vaccination ng bansa.

“Masaya kami dahil sa datos ng Department of Health (DOH), as of October 21... they have already vaccinated 5,781 ang mga kabataang may edad 15 hanggang 17 ang ating nabakunahan,” ani Galvez.

Sinabi rin ni Galvez na may karagdagang 13 ospital ang magsasagawa pa ng pediatric vaccination.

“Simula ngayong araw na ito, 13 na ospital pa ang papayagan magpabakuna sa may edad na 15 hanggang 17 na mayroong may comorbidities,” sabi ng opisyal.

“Gusto naming bigyan-diin ang importansya ng pagbabakuna sa mga kabataan. Ito ang magbibigay daan upang makabalik sila sa mga eskuwelahan at mas mabilis na mabuksan ang ating ekonomiya,” dagdag pa ni Galvez.

Sa taya ng DOH nasa 1.2 milyong kabataan na may comorbidities edad 12 hanggang 17-anyos sa buong bnasa.

Sinabi rin ng ahensiya na ang mga menor-de-edad na magpapabakuna ay kinakailangang kumuha ng clearance mula sa kanilang mga doktor at dapat ding magbigay ng kanilang consent at pagsang-ayon.

Samantala, ayon sa DOH ang mga eligible para sa pagbabakuna laban sa COVID-19 na mga kabataan na may comorbidities ay may medical conditions gaya ng medical complexity, genetic condition, neurologic conditions, metabolic o endocrine diseases, cardiovascular diseases, obesity, HIV Infection, tuberculosis, chronic respiratory disease, renal disorders, at hepatobiliary disease, at iyong mga immunocompromised dahil sa sakit o treatment.

Employers, puwedeng i-require COVID-19 jabs... Pagtanggal sa ‘di bakunadong empleyado, bawal – DOLE

ni Lolet Abania | October 21, 2021

Nilinaw ng isang opisyal ng Department of Labor and Employment (DOLE) na ang pag-terminate o pagtatanggal sa mga empleyado ay ipinagbabawal, kung ang dahilan lamang nito ay hindi bakunado kontra-COVID-19.

“Kung ang termination niya ang sole basis ay unvaccinated hindi po, bawal po ‘yan,” ani DOLE Undersecretary Ana Dione sa Laging Handa briefing ngayong Huwebes.

“Unvaccinated as basis of termination, palagi nating inuulit na ‘yan po ay discrimination,” sabi pa ni Dione.

Subalit, una nang ipinahayag ni DOLE Secretary Silvestre Bello III ngayon ding Huwebes na mayroon na ngayong legal na batayan ang mga employers na nasa ilalim ng Alert Level 3 na i-require ang kanilang mga empleyado na magpabakuna laban sa COVID-19.

Patungkol sa legal basis, ibinase ito ni Bello sa isang television interview hinggil sa resolution ng Inter-Agency Task Force for the Management of Emerging Infectious Diseases (IATF) sa mga lugar na nasa ilalim ng Alert Level 3.

“Correct. Because now there is an obligation on the part of the employer na dapat vaccinated ang mga empleyado niya, so he can require ‘yung mga empleyado na magpabakuna because now there is a legal basis,” paliwanag ni Bello sa isang interview.

Ito ang naging pahayag ni Bello nang tanungin kung ang mga employers ay maaaring mag-terminate o magtanggal ng hindi bakunadong mga empleyado, lalo na ngayon na ang expansion ng kapasidad para mag-operate ay pinapayagan lamang sa maraming establisimyento kung ang lahat ng kanilang manggagawa ay fully vaccinated na.

Sa ilalim ng Alert Level 3, ang mga establisimyento ay papayagang mag-operate ng 30% ng indoor venue capacity para lamang sa fully vaccinated individuals at 50% ng outdoor venue capacity na dapat ang lahat ng mga empleyado nito ay fully vaccinated.

Sinabi pa ni Bello na sa ngayon ang mga employers ay maaari nang i-withhold o hawakan ang suweldo ng kanilang empleyado sa ilalim ng IATF resolution para sa Alert Level 3.

“May IATF resolution na nagsasabi na ‘yung Alert Level 3 puwedeng mag-operate ang restaurant pero ang restaurant kailangan vaccinated na ang mga empleyado at customer,” sabi ni Bello.

“’Yun meron nang batas, so that is now an exemption kasi meron ng IATF. There is a basis now to hold the payment because it will have a violation of IATF resolution,” sabi ni Bello.

Bago ang IATF resolution, ayon kay Bello ang “no vaccine, no work” at “no vaccine, no pay” policies ay illegal.

Gayunman, giit ni Bello na isang batas lamang ang kailangan para ang vaccination ay maging mandatory na sa lahat, kabilang dito ang mga workers.

Aniya pa, hindi siya pabor sa mandatory vaccination hangga’t ang bansa ay walang sapat na suplay ng bakuna.

“It’s not prudent to make it mandatory,” sabi ni Bello.

Dahil sa temperatura at transportasyon... 12,970 doses ng COVID-19 vaccine, nasayang — DOH

ni Lolet Abania | October 18, 2021

Nasa kabuuang 12,970 doses ng COVID-19 vaccine ang naitapon dahil sa mga isyu tungkol sa temperatura, transportasyon, at labelling, ayon sa Department of Health (DOH) ngayong Lunes.

“Most of the reasons ay itong temperature excursions, no? Mayroong nagkaroon ng sunog sa Cotabato at saka doon sa Ilocos Norte dati kung saan ang ilang bakuna natin ay nadamay,” ani DOH Undersecretary Maria Rosario Vergeire sa media briefing.

“Meron tayong nabalitaan noon na mayroong nagkaroon ng wastage dahil doon transport. Nagkaroon ng doon sa bangka na sinasakyan nila, may issue tayo doon na parang nalubog ‘yung mga vaccine,” dagdag niya.

Ayon kay Vergeire, ang mga vaccines na hindi na-labeled o iyong mga may label na nasira ay naitapon din.

“’Yung iba naman may reports may mga particulate matters doon sa bakuna… kapag ganoon ang itsura ng bakuna, hindi na natin ‘yan ginagamit. So dini-discard,” sabi ng kalihim.

Samantala, sa pinakabagong datos ng National Task Force Against COVID-19, nakatanggap na ang Pilipinas ng 90.61 milyong doses ng COVID-19 vaccine simula noong February.

Sa naturang bilang, 51.48 milyon doses ang na-administered ng gobyerno.

May kabuuang 23.98 milyong Pilipino naman ang fully vaccinated kontra-COVID-19.