Higit 1M katutubo bakunado na kontra-COVID-19

ni Jasmin Joy Evangelista | October 31, 2021

Mahigit 1M indigenous people na ang nabakunahan kontra-COVID-19.

Ayon sa National Commission on Indigenous People (NCIP), may mga katutubo na naapektuhan ng COVID-19 at humihingi ng tulong.

Apektado rin ang kabuhayan ng mga ito lalo na ang mga nagtatrabaho nang malayo sa kanilang pamilya matapos magsara ang kanilang mga pinapasukan.

Kaugnay nito ay pinaiiral ng NCIP ang Whole-of-Government Approach para maihatid sa mga komunidad ang tulong ng gobyerno.

“Mas pinaigting na ng ating komisyon ang pagbibigay-serbisyo dahil mas kailangan ng katutubong pamayanan ang tulong natin,” ani Dr. Angelica Cachola, medical officer ng NCIP.

Pagbabakuna sa ilang LGU sa NCR, pansamantalang ititigil ngayong Undas

ni Jasmin Joy Evangelista | October 31, 2021

Pansamantalang isasara ang ilang vaccination center sa Metro Manila ngayong panahon ng Undas na sinabayan ng long weekend.

Nag-anunsiyo ang Manila Public Information Office na wala munang mass vaccination kontra COVID-19 mula Oktubre 30 hanggang November 2.

"Ito po ay bilang bahagi ng ating paggunita ng Undas 2021. Magre-resume po ang ating mass vaccination sa ating mga vaccination sites sa Miyerkoles, November 3," anila sa isang pahayag.

Sa Valenzuela City naman, isasara ang mga vaccination site mula Oktubre 31 hanggang Nobyembre 2.

Kung nakatakdang raw na magpa-second dose ay maaaring magpabakuna sa Miyerkules.

Nilimitahan naman sa Malabon ang bukas na vaccination site. Mula alas-8 ng umaga hanggang alas-3 ng hapon binuksan ang vaccination center sa Immaculate Heart of Mary Parish sa Barangay Maysilo nitong Sabado.

Sa ngayon ay wala pang nababanggit na schedule ang iba pang lokal na pamahalaan sa Metro Manila.

DOLE, isasaayos polisiya sa non-mandatory vax ng mga empleyado — DOJ

ni Lolet Abania | October 28, 2021

Ipinahayag ng Department of Justice (DOJ) ngayong Huwebes na nilinaw nila sa Inter-Agency Task Force (IATF) ang isyu na ang mga empleyado ay hindi required o kinakailangan at piliting magpabakuna kontra-COVID-19.

“I emphasized that the COVID-19 vaccination program act of 2021 was clear on the non-compulsory nature of vaccination as an additional requirement for employment,” ani Justice chief Menardo Guevarra sa isang mensahe sa mga reporter.

“Unless amended or modified by Congress, it is the existing and applicable law,” dagdag ni Guevarra.

Ayon kay Guevarra, ibinatay lamang ito ng Department of Labor and Employment (DOLE) sa mga naging comments at nakatakda namang i-align o isaayos ang kanilang polisiya.

“Wala namang nag-express ng any different or contrary position among the IATF members. The DOLE duly noted our advice and stated that it will align its policy pronouncements accordingly,” paliwanag ni Guevarra.

Nag-isyu si Guevarra ng naturang remark, ilang araw matapos na sabihin ng DOLE na ang pag-terminate o pagtatanggal sa mga empleyado ay ipinagbabawal kung ang dahilan lamang nito na sila ay hindi bakunado.

Matatandaan namang sinabi ni DOLE Secretary Silvestre Bello III na mayroong legal basis para sa mga employer sa mga lugar na nasa ilalim ng Alert Level 3 na i-require ang kanilang mga empleyado na magpabakuna kontra-COVID-19.