6 months old baby, aksidenteng naturukan ng COVID-19 vaccine

ni Jasmin Joy Evangelista | January 9, 2022

Aksidenteng nabakunahan ng COVID-19 vaccine ang isang anim na buwang sanggol sa Santa Maria, Bulacan.

Ayon sa ina nito, pneumococcal vaccine dapat ang ituturok sa bata.

Ayon pa rito, nilagnat ang kanyang anak matapos maturukan.

"'Yung future effect po kay baby kasi siyempre, baby pa 'to. So 'yung mga internal organs niya baka hindi kaya 'yung gamot, Puwede ba itong maging cause ng pagiging special child?" pangamba ng ina.

Kasalukuyan nang iniimbestigahan ng LGU at health officials ang insidente, habang mino-monitor din ang kondisyon ng sanggol.

Israel sinimulan na ang pagbabakuna sa mga batang edad 5-11

ni Jasmin Joy Evangelista | November 24, 2021

Sinimulan na ng Israel ang pagbibigay ng Pfizer BioNTech COVID vaccine sa mga batang edad 5-11.

Nagsimulang bumaba ang kaso ng COVID-19 sa naturang bansa nitong Setyembre ngunit nitong nakaraang dalawang linggo ay nagsimula na naman itong tumaas at patuloy pang kumakalat.

Karamihan din sa mga tinatamaan ng virus ay mga batang nasa edad 11 pababa kaya pinaiigting ng kanilang gobyerno ang pagbibigay ng bakuna sa mga kabataan.

Inaasahan ng Israeli government na matuturukan nila ng COVID-19 vaccines ang 1.2 milyong populasyon na mga batang may edad 5-12.

Matapos mabakunahan kontra-COVID-19... Walang naitalang adverse effects sa mga kabataan — FDA

ni Lolet Abania | November 14, 2021

Ipinahayag ng Food and Drug Administration (FDA) na sa ngayon ay wala pang nai-report na adverse reactions sa mga kabataang edad 12 hanggang 17 na nakatanggap na ng kanilang first dose ng COVID-19 vaccine.

Ayon kay FDA Director General Eric Domingo, ilan sa mga bata lamang, siyam dito na naturukan ng Pfizer vaccine at isa na nabigyan ng Moderna, ang nagkaroon ng allergies at nakaranas ng hyperventilation at post-vaccination body pain subalit aniya, gumaling din kinabukasan.

Kasalukuyang inaprubahan pa lamang ng FDA ang Pfizer at Moderna COVID-19 vaccines para sa mga minors na edad 12 hanggang 17.

“So far, ‘yung monitoring natin, siguro mga 400,000 na ‘yung nabakunahan na mga bata, wala naman tayong nakikita na adverse events na grabe, na talaga pong nagkaron ng problema,” sabi ni Domingo sa isang interview ngayong Linggo.

Paliwanag ni Domingo, ang mga menor-de-edad na wala naman ng tinatawag na underlying conditions ay hindi na kailangang magprisinta ng medical certificates mula sa kanilang mga doktor bago bakunahan, maliban sa mga kabataang may comorbidities.

“Hindi naman kailangan ng medical certificate para magpabakuna ng bata aged 12-17. Basta walang sakit at pupunta sa vaccination centers, puwede naman bakunahan,” sabi ni Domingo.

Matatandaang sinimulan ng gobyerno ang pediatric inoculation program noong Oktubre 15 para sa mga may comorbidities, at nitong Nobyembre 3 naman para sa lahat ng minors na nasa edad 12 hanggang 17.

Batay sa datos ng gobyerno, mayroong 12.7 milyong kabataan na nasa edad 12 hanggang 17 sa bansa, kung saan 1.2 milyon dito ay may comorbidities.

Target ng pamahalaan na makapagbakuna kontra-COVID-19 ng 80% o tinatayang 10 milyong menor-de-edad ng hanggang Disyembre 2021.