Herd immunity sa NCR sa Nobyembre – Galvez

ni Lolet Abania | May 4, 2021

Inaasahan nang makakamit ng pamahalaan ang target na herd immunity sa National Capital Region (NCR) at kalapit na lalawigan sa Nobyembre, ayon sa vaccine czar na si Secretary Carlito Galvez, Jr..

“We can have herd immunity in NCR and six provinces around NCR by November. We’re looking at 180 days,” ani Galvez sa Palace press briefing ngayong Martes, kung saan katuwang dito ang mga supply chain experts ng gobyerno para sa mass vaccination program.

Inisyu ni Galvez ang statement isang araw matapos nitong ilabas ang listahan ng mga lugar na prayoridad na makatanggap ng doses ng COVID-19 vaccines dahil sa kaunting supply nito.

Kabilang sa mga lugar na dapat i-prioritize sa pagbabakuna kontra-COVID-19 ang NCR, Calabarzon at Central Luzon.

“If we can achieve herd immunity by vaccinating up to 70 percent of the residents in these areas, there is a big chance that our economy will recover and we can prevent a surge in cases,” sabi naman ni Galvez sa briefing kay Pangulong Rodrigo Duterte kagabi.

Ayon kay Galvez, kinakailangan ng gobyernong magkaroon ng 15 milyong doses ng COVID-19 vaccines kada buwan para mabakunahan ang 70 porsiyento ng populasyon at makamit ang pinapangarap na herd immunity ng bansa bago magtapos ang taon.

Sinabi pa ni Galvez, kailangan ng 25,000 hanggang 50,000 vaccinators para makatulong sa pag-administer ng gamot kontra-COVID-19.

Aniya, dapat ding maglagay ng 5,000 vaccination sites para makapagbakuna ng COVID-19 vaccines sa 100 kababayan kada araw sa bawat site.

Sa ngayon, umabot na sa 3,745,120 mula sa kabuuang 4,040,600 (92.68%) vaccine doses ng COVID-19 sa maraming vaccination sites sa bansa ang naipamahagi.

Ayon sa datos ng gobyerno, mahigit sa 1.6 milyong Pinoy na ang naturukan ng COVID-19 vaccines, kung saan nagsimula ang immunization campaign noong Marso.

P-Duterte, nabakunahan na ng Sinopharm COVID-19 vaccine

ni Ronalyn Seminiano Reonico | May 3, 2021

Nagpabakuna na laban sa COVID-19 si Pangulong Rodrigo Duterte ngayong gabi gamit ang Sinopharm vaccine ng China.

Sa Facebook Live ni Senator Bong Go, makikitang si Department of Health (DOH) Secretary Francisco Duque III ang nagbakuna kay P-Duterte.

Samantala, matatandaang sinabi ng Palasyo na isasagawa nang pribado ang pagbabakuna sa pangulo dahil sa puwet umano nito nais magpaturok.

Sabi pa noon ni Presidential Spokesperson Harry Roque, “I think so. He has said so. Sabi niya nga, dahil sa puwet siya magpapasaksak, so hindi pupuwedeng public.”

Ngunit sa FB Live ni Sen. Go, makikitang sa braso nagpaturok si P-Duterte.

Moderna, oks na sa 'Pinas

ni Ronalyn Seminiano Reonico | April 26, 2021

Nagsumite na ng aplikasyon para sa emergency use authorization (EUA) ng COVID-19 vaccine sa Pilipinas ang Moderna Inc., ayon kay Food and Drug Administration (FDA) Chief Rolando Enrique Domingo.

Aabot sa 13 million doses ng Moderna COVID-19 vaccines ang bibilhin ng pamahalaan habang 7 million doses naman ang nakatakdang bilhin ng pampribadong sector ng bansa.

Sa Mayo inaasahang darating sa Pilipinas ang 194,000 doses ng Moderna at 1 million naman sa July.

Ang mga COVID-19 vaccines na nabigyan na ng EUA ng FDA ay ang Pfizer, AstraZeneca, Sinovac, Gamaleya, at Johnson and Johnson.

Samantala, umabot na sa 1.7 million doses ng Sinovac at AstraZeneca COVID-19 vaccines ang naipamahagi ng pamahalaan sa mga vaccination sites simula noong Marso 1.