Para sa mga Pilipinong lalabas ng bansa… COVID-19 digital vaccination certificate, inilunsad na

ni Jasmin Joy Evangelista | September 7, 2021

Maaari nang bisitahin ang ‘VaxCertPH’ na isang online portal kung saan maaaring makuha ang digital COVID-19 vaccination certificate ng mga fully vaccinated na indibidwal.

Layon ng VaxCertPH na magkaroon ng digital vaccination certificate na tatanggapin sa ibang bansa.

Initial roll-out pa lang ang inaprubahan ng IATF, kung saan prayoridad ang mga overseas Filipino workers (OFWs) at outbound Filipinos mula sa Metro Manila at Baguio City.

"Bibigyang-prayoridad sa unang phase ng pagpapatupad ng VaxCertPH ang overseas Filipino workers, at mga Pilipinong aalis po paibang bansa, kung saan ang place of residence ay Metro Manila at Baguio City. Bubuksan ito sa general public at iba pang mga bagay at a later time," ani Presidential Spokesperson Harry Roque.

Kabilang sa mga impormasyon na lalabas sa certificate ang lugar at petsa ng pagbabakuna, at ang brand ng ginamit na bakuna at QR Code.

Ito ay maaaring i-access sa vaxcert.doh.gov.ph.

Kung nagpabakuna pero hindi available ang vaccination record sa website, maaaring i-upload ang larawan ng vaccination card at government-issued ID para ma-update ang record nito.

183K bagong dating na Pfizer-BioNTech, ituturok agad para 'di masira

ni Jasmin Joy Evangelista | September 3, 2021

Dumating na kagabi ang nasa 183,000 pang karagdagang doses ng Pfizer-BioNTech vaccine na donasyon mula sa COVAX Facility.

Ang mga ito ay ipapadala sa mga lugar na hindi pa nakatatanggap ng Pfizer vaccine at kailangan umanong matuto ng ibang lugar na mag-handle ng mga sensitibong bakuna laban sa COVID-19, ayon kay Asec. Wilben Mayor ng Office of the Presidential Adviser on the Peace Process (OPAPP).

Malaking bahagi ng mga paparating na bakuna ay Pfizer kaya kailangang i-train ang mga LGUs na magbabakuna nito.

Isinagawa na rin aniya ang point-to-point inoculation lalo sa mga areas na walang cold storage facility.

Ibig sabihin, pagdating ng bakuna, ituturok na agad ang mga ito at hindi na iiimbak pa.

Samantala, 29 million na mga COVID-19 vaccine doses ang inaasahan na darating sa bansa ngayong Setyembre.

Bawal ang walk-in… Magpapabakunang 'dayo' lang, puwede na

ni Lolet Abania | August 30, 2021

Ipinahayag ni Metropolitan Manila Development Authority Chairperson Benhur Abalos na ilan sa mga lokal na gobyerno sa National Capital Region ang tumatanggap na ng mga residente sa kalapit na probinsiya para sa pagbabakuna kontra-COVID-19.

Ayon kay Abalos, ilan sa mga local government units (LGUs) sa Metro Manila ang pumayag na mabigyan ang mga residenteng mula sa Cavite, Bulacan, Rizal at Laguna ng COVID-19 vaccine kapag mayroong sobrang supply ng mga doses ng bakuna.

“Priority is NCR. Kapag may sobra ay for plus areas, Cavite, Bulacan, Rizal, and Laguna,” ani Abalos sa isang message ngayong Lunes.

Sa ngayon, ang Mandaluyong, Pateros, Marikina at San Juan government ang tumatanggap ng mga residenteng galing sa karatig-lalawigan para bakunahan kontra-COVID-19 dahil sa malapit na nilang makumpleto ang kanilang inoculation program.

Sinabi pa ni Abalos na ang natitirang LGUs sa NCR ay malapit na ring magtapos ng kanilang vaccination program at maa-accommodate na rin ang ibang residente na nasa labas ng Metro Manila.

Paalala naman ni Abalos para sa mga indibidwal na nagnanais na magpabakuna kontra-COVID-19 sa NCR, kinakailangang magpa-schedule muna bago pumunta sa vaccination site at magpaturok dahil hindi nila pinapayagan ang mga walk-ins.

Ayon kay Abalos, maaari silang mag-register sa pamamagitan ng pagpapa-scan ng QR code na ibinibigay ng mga NCR-LGUs.

Una nang inianunsiyo ng MMDA chairman na napagkasunduan na ng lahat ng NCR LGUs na maaari nang magsagawa ng pagbabakuna sa mga indibidwal na galing sa kalapit na siyudad para tumaas ang bilang ng vaccination rollout ng bansa.