Sa halos 13.5M populasyon... Nasa 6-milyon residente ng Metro Manila, fully vaccinated na

ni Jasmin Joy Evangelista | September 14, 2021

Halos anim na milyon na ang fully vaccinated sa Metro Manila habang nasa 8.4 million o 85.73 percent naman ang naka-first dose na, ayon kay Metropolitan Manila Development Authority (MMDA) Chairman Benhur Abalos.

“After one month, those who would have the second dose in our projections will be about 79 percent of the population of Metro Manila," ani Abalos.

Sa December 12 naman ang projection ng fully vaccinated sa NCR ay 88.5 percent.

Samantala, maging mga hindi taga-Metro Manila ay pinababakunahan din ng mga mayor, ayon kay Abalos.

Health office nasunog... COVID-19 vaccines, bakuna sa mga bata, nadamay

ni Lolet Abania | September 11, 2021

Mahigit sa 400 doses ng bakuna laban sa COVID-19 at mga routine vaccines para sa mga bata ang nasira matapos sumiklab ang sunog sa ikalawang palapag ng Municipal Health Office (MHO) ng San Nicolas, Ilocos Norte, nitong Biyernes nang gabi.

Batay sa Facebook post ng lokal na gobyerno ng San Nicolas, nasa mahigit 400 COVID-19 vaccines at mga bakuna na nakalaan sa mga bata ang nawasak, subalit wala pang detalye kung anong brand ng COVID-19 vaccine at ilang vial ang nadamay dahil sa sunog.

Ayon sa inisyal na report ng Bureau of Fire Protection ng San Nicolas, nagsimula ang sunog sa storage room o bodega kung saan naroroon ang mga medical supplies ng health office, ng alas-7:11 ng gabi habang naapula ang apoy ng alas-7:39 ng gabi.

“’Yung isang medical refrigerator na nasa storage room, nag-malfunction ang compressor nito na posibleng pinagmulan ng sunog,” sabi ni Insp. Reynold Aguinaldo, Fire Marshal ng BFP-San Nicolas.

Wala namang naiulat na nasaktan habang inaalam pa ng BFP-San Nicolas ang halaga ng pinsala matapos ang sunog.

15M Pinoy bakunado na kontra-COVID-19 – Galvez

ni Lolet Abania | September 9, 2021

Mahigit sa 15 milyon indibidwal ang nabakunahan na kontra-COVID-19, ayon kay Vaccine Czar Secretary Carlito Galvez, ngayong Huwebes.

Ito ang sinabi ni Galvez hinggil sa updates ng vaccine rollout ng gobyerno sa ginanap na pagdinig sa House committee on economic affairs patungkol sa multi-party agreements na inihain ng mga local government units (LGUs) at pribadong sektor sa pagkuha ng mga COVID-19 vaccines.

Paliwanag ni Galvez na sa kabila ng mga hamon at umano’y hadlang na nararanasan, patuloy pa rin ang pagbabakuna ng gobyerno sa bawat Pilipino.

Ayon kay Galvez nasa kabuuang 52,792,130 doses ng COVID-19 vaccine na ang natanggap ng bansa, kung saan may kabuuang 37,176,513 doses ang na-administer sa mga kababayan.

Nasa kabuuang 15,837,799 indibidwal aniya naman, ang fully vaccinated kontra-COVID-19.

Inaasahan na rin ng Pilipinas na makatatanggap ng mahigit sa 61 milyong COVID-19 vaccines ngayong buwan at sa Oktubre habang ang mga deliveries ng bakuna ng Sinovac, Pfizer at ang US-COVAX donations ay mas naging matatag sa ngayon.

Sinabi pa ni Galvez na layon ng gobyerno na makamit ang 70% fully-vaccinated na populasyon sa Metro Manila, Central Luzon, Calabarzon, Metro Cebu, Metro Davao, Cagayan de Oro City, at iba pang risk areas hanggang sa katapusan ng Oktubre.

Dagdag pa ng kalihim, nais din ng pamahalaan na maabot ang tinatayang 50% para sa first dose ng bakuna sa natitirang rehiyon sa katapusan din ng Oktubre.