Aprub ni P-Du30... General public at menor-de-edad, next na babakunahan kontra-COVID-19

ni Lolet Abania | September 28, 2021

Inaprubahan na ni Pangulong Rodrigo Duterte ang pagbabakuna kontra-COVID-19 para sa general population at menor-de-edad simula sa Oktubre, ayon sa Malacañang.

Sa kanyang regular press briefing, sinabi ni Presidential Spokesperson Harry Roque na ito ay dahil sa malaking bilang ng mga doses ng COVID-19 vaccine ang dumating kamakailan sa bansa habang maraming pang inaasahang bakuna na darating sa mga susunod na linggo.

“Ang good news, inaprubahan na ni Presidente ang pagbabakuna ng general population simula po sa buwan ng Oktubre,” ani ni Roque.

Ayon pa kay Roque, aprubado na rin kay Pangulong Duterte ang pagbabakuna sa mga minors laban sa COVID-19 habang hinimok din ang mga magulang na ipalista na ang pangalan ng kanilang mga anak.

“Ating hinihikayat ngayon ay magpa-masterlisting na po ang mga magulang ng mga kabataan para mapalista na ‘yung mga kabataan ‘pag nagsimula na po tayo,” ani opisyal.

“Inaasahan natin na magsisimula rin tayo sa buwan ng Oktubre, aprubado na rin po iyan ng ating Presidente,” dagdag niya.

Sinabi ng kalihim, ito ay base sa rekomendasyon ng National Task Force Against COVID-19 chief implementer at vaccine czar Secretary Carlito Galvez Jr. “Vaccine is your best defense for yourself and your community,” saad ni Roque.

Matatandaang binigyan ng Food and Drug Administration (FDA) ng bansa ng emergency use authorization (EUA) ang Moderna at Pfizer-BioNTech vaccine na gamitin para sa mga edad 12 hanggang 17.

Ang Sinovac ay naghain na rin nito sa FDA para sa kanilang approval na gamitin ang naturang vaccines sa mga kabataan.

Nabanggit naman ni Galvez na mahigit sa 61 milyon doses ng COVID-19 vaccine ang darating sa bansa ng Setyembre at Oktubre.

Nitong Setyembre 6, ang lahat ng local government units (LGUs) ay nagbaba na ng direktiba hinggil sa pagbabakuna sa priority sectors A1 hanggang A5.

Sa ilalim ng A1 priority category, sila ang mga nasa frontline health services, A2 naman ay mga senior citizens, A3 ay persons with comorbidities, A4 ay frontline personnel na nasa essential sectors kabilang na ang mga uniformed personnel, at A5 ay ang mga indigent population.

OFWs at int’l. travelers muna... 138K nabigyan ng VaxCertPH – DICT

ni Lolet Abania | September 25, 2021

Umabot na sa daang libo ng standardized COVID-19 vaccination certificates ang inisyu sa mga indibidwal mula nang umpisahan ang VaxCertPH nitong buwan, ayon sa Department of Information and Communications Technology (DICT).

Sa Laging Handa briefing ngayong Sabado, sinabi ni DICT Undersecretary Emmanuel Caintic na ang VaxCertPH ay portal para sa pag-iisyu ng vaccination certificates sa mga fully vaccinated o bakunado nang indibidwal, kung saan ginanap ang soft launching nito sa Metro Manila at Baguio noong Setyembre 6 habang aniya, “So far… issued 138,000 vaccination certificates out of 225,000 requests.”

“Nationwide statistics ito dahil kahit nag-soft launch na tayo sa NCR at Baguio, pinrioritize natin mga OFWs (overseas Filipino workers) at international travelers,” sabi ni Caintic.

Ayon pa sa DICT official, kapag ang lahat ng local government units (LGUs) ay handa na sa kanilang ilalagay na mga booths para matulungan ang kanilang mga kababayan na walang internet access, doon magiging online nationwide ang VaxCertPH.

Nilinaw naman ni Caintic na ang VaxCertPH ay accessible na sa buong bansa subalit sa ngayon prayoridad pa lamang ng gobyerno ang mga request ng mga OFWs at international travelers.

Ang VaxCertPH ay idinebelop ng DICT at ng Department of Health, kung saan nakabase ito sa mga data na isinumite ng LGUs sa pamamagitan ng Vaccine Information Management System.

Walang vax cards, walang dine-in – Resto Ph

ni Lolet Abania | September 17, 2021

Hindi papayagan ang mga kustomer na mag-avail ng mga dine-in services sa National Capital Region (NCR) kapag walang maipakitang vaccination cards, ayon sa Restaurant Owners of the Philippines (Resto Ph).

Naging epektibo ito kahapon, ang unang araw ng pagpapatupad ng Alert Level 4 sa NCR sa gitna ng COVID-19 pandemic.

Sa ilalim ng Alert Level 4, ang outdoor o al fresco dining services sa mga restaurants at kainan ay makakapag-operate ng hanggang 30 porsiyento ng venue/seating capacity, anuman ang vaccination status ng indibidwal.

Sa kabila nito, ang indoor dining o dine-in services ay papayagan sa limitadong 10 porsiyento ng venue/seating capacity subalit para lamang ito sa mga indibidwal na fully vaccinated o bakunado na kontra-COVID-19, kabilang na rin dito na papayagan sila sa outdoor o al fresco capacity.

Ayon kay Resto Ph president Eric Teng, kailangan lamang ng mga fully vaccinated customers na magpakita ng kanilang local government unit (LGU)-issued vaccination card para mabigyan ng dine-in services.

“We reminded our members to be vigilant with enforcing the safety protocols. We post signs asking guests to present their vaccine card before being seated indoors,” ani Teng.

“Surprisingly, there are numerous guests wanting to dine indoors without vax cards, who have to be turned away, unless there are outdoor dining spaces available,” dagdag niya.

Nilinaw naman ni Teng na habang ang mga hindi pa nabakunahan na indibidwal ay hindi pa pinapayagan para sa indoor dining aniya, “unvaccinated guests are allowed to dine outdoors. They only need to be vaccinated to dine indoors.”

Gayunman, sinabi ni Teng, “overall, the day has been positive for restaurant operators.”

Laking pasalamat din ng Resto Ph sa naging desisyon ng gobyerno sa pagsasailalim sa Metro Manila sa Alert Level 4.

Matatandaang ipinahayag ni Department of Trade and Industry (DTI) Secretary Ramon Lopez na nasa P180 milyon sa revenues ang inaasahan upang mabawi ng mga restaurants, salons, at barbershops ang pagkalugi kung saan pinayagan nang mag-operate sa ilalim ng Alert Level 4 sa limitadong kapasidad.

Gayundin, sa parehong kapasidad ng limitadong indoor at outdoor dining na mga establisimyento, ang ipapatupad para sa personal care services gaya ng beauty salons at barbershops.

Samantala, sinabi ni Teng na ilan sa mga member-restaurants ng Resto Ph ay nagbibigay ng special promos para sa mga healthcare workers bilang aniya, “a gesture of gratitude and support” sa kanilang walang humpay na pagmamalasakit sa kanilang mga kababayan.