Tutok COVID-19 sa 'Pinas ngayong October 21, 2021

by BULGAR ONLINE | October 21, 2021

Para sa update, manatiling nakatutok: bulgaronline.com/tutok-covid19

Datos ng int’l health organizations... Delta subvariant, hinihintay ng DOH

ni Lolet Abania | October 21, 2021

Hinihintay pa ng Department of Health (DOH) ang mas maraming datos mula sa international health organizations hinggil sa Delta coronavirus subvariant o ang AY 4.2 subvariant, kung saan na-detect sa European nations at sa Israel.

“Naghihintay pa ng report sa international health organizations, sila naghihintay ng datos,” ani DOH Secretary Francisco Duque III sa isang interview ngayong Huwebes.

Ayon din kay Duque na ang naturang subvariant ay hindi pa na-classified bilang variant of concern at variant of interest.

Pinayuhan naman ni Dr. Edsel Salvana ang publiko na hindi kailangang mag-panic hinggil sa mga reports na lumalabas tungkol sa bagong subvariant.

Sinabi ni Salvana na nakatanggap sila ng impormasyon na sa naturang subvariant, dumarami ang nahahawa na katulad o bahagyang mas mataas kumpara sa Delta variant, kung saan itinuturing na itong most common lineage mula sa mga naging sample sequenced sa bansa.

Sa kasalukuyan, nakapagtala ang DOH ng 4,431 Delta variant cases sa bansa.

MMDA paiigtingin ang paninita sa mga lumalabag sa health protocols

ni Jasmin Joy Evangelista | October 21, 2021

Paiigtingin ng Metropolitan Manila Development Authority ang paninita sa mga lumalabag sa health protocols lalo ngayong pinapayagan nang lumabas ang mga bata kahit tuloy pa rin ang banta ng COVID-19.

"Maraming magpapatupad. It could be yung ating barangay, siguro maging yung ating traffic enforcers. Pwede pong sitahin ang mga bata para na rin po sa proteksyon nila ito. Hindi puwedeng kumalat o maglakwatsa ang mga bata nang sila-sila lang," ani MMDA chairman Benhur Abalos Jr.

Matatandaang mayroon nang mga palaruan na nag-o-operate sa isang mall sa Parañaque kung saan may mga bata na naglalaro, bagama’t iginigiit na bawal pang pumasok sa mall ang mga ito.

Nilinaw naman ng mall na outdoor ang lugar, na ayon sa pandemic task force ay puwede naman talaga.

Ipinaliwanag din ng lokal na pamahalaan na pinapayagan sa outdoor na playground ang mga menor de edad.