Academic break sa Dagupan City.. 1K estudyante at 250 school staff, nakararanas ng COVID symptoms

ni Lolet Abania | January 17, 2022

Inanunsiyo ng Dagupan City government ngayong Lunes na magpapatupad sila ng 1-linggong academic break matapos na mahigit sa 1,000 estudyante at 250 school personnel ang nai-report na nakararanas ng COVID-19 symptoms.

Batay sa Executive Order (EO) No. 03 Series of 2022 na nilagdaan ni Dagupan City Mayor Marc Brian Lim, lahat ng online at physical classes mula sa elementary hanggang senior high school sa lahat ng pampubliko at pribadong institusyon sa lungsod ay suspendido mula Enero 18 hanggang 25, 2022.

Inisyu ang nasabing EO makaraang apat pang Schools Division Office personnel at apat na titser sa siyudad ang magpositibo sa RT-PCR test. Nananatili namang pending ang resulta ng test ng iba pa.

Una nang sinabi ng independent monitoring group na OCTA Research nitong Biyernes na ang Dagupan, kasama ang anim na iba pang lugar, kabilang ang National Capital Region, ay nasa critical risk na ng COVID-19.

Ayon kay OCTA Research fellow Dr. Guido David, ang average daily attack rate kada 100,000 populasyon ay “very high” o napakataas sa Dagupan na nasa 29.60%, habang ang naitala sa kanilang infection o reproduction number ay nasa 4.58%.

Nakasaad naman sa EO, “The academic health break would allow students and school personnel a respite from physical and mental fatigue caused by the pandemic.”

Gayundin, makapagbibigay ito sa mga academic institutions ng, “sufficient time in determining the much needed recalibrating of minimum public health protocol to help protect the students and their staff from COVID-19,” batay pa sa EO.

Samantala, ang suspensyon ng mga klase para sa tertiary level ay ipinauubaya na nila sa deskrisyon ng mga school authorities ng mga kolehiyo at unibersidad sa lungsod.

510 health workers ng Tala Hospital, naka-home quarantine dahil sa COVID-19

ni Lolet Abania | January 17, 2022

Nasa tinatayang 510 health workers ng Dr. Jose N. Rodriguez Memorial Hospital and Sanitarium o Tala Hospital sa Tala, Caloocan City, ang sumailalim sa home quarantine dahil sa COVID-19.

Ginawa ni Tala Hospital medical director Dr. Alfonso Famaran, Jr. ang anunsiyo isang araw matapos na makapag-record ang Department of Health (DOH) ng 37,154 bagong kaso ng COVID-19 nitong Enero 16, mas mababa ng kaunti sa naitalang record-high na 39,004 bagong COVID-19 cases naman noong Enero 15.

“We have 510 health workers under quarantine out of the 1,300 we have,” ani Famaran sa Laging Handa public briefing ngayong Lunes.

Gayunman, sinabi ni Famaran na ang DOH at ang PNP General Hospital ay nagpadala na sa kanila ng 229 dagdag na health workers para mapunan ang mga staff ng ospital sa gitna ng pagtaas ng COVID-19 cases.

“We received augmentation for our health personnel and [so] our hospital operations remain unhampered,” sabi ni Famaran.

Batay sa guidelines ng DOH, ang Dr. Jose N. Rodriguez Memorial Hospital ay isang COVID-19 referral hospital at dahil dito prayoridad ng ospital ang mga COVID-19 cases, kung saan mga pasyenteng severe o critical, o iyong may mga comorbidities, matatandang mayroon o walang comorbidities, at high-risk na mga buntis.

Ayon kay Famaran, sa kasalukuyan ang ospital ay gumagamot ng 297 COVID-19 patients, kung saan umookupa ng 53% ng kanilang COVID-19 bed capacity.

“It (getting infected with COVID-19) is really due to non-compliance of minimum public health standards. Mainly [lack of social distancing], and failing to wear face mask,” giit ni Famaran.

“We really have to strictly follow the minimum public health standards,” dagdag pa ng opisyal.

Gayunman, dahil sa sitwasyon ngayon, sinabi ni Famaran na magandang development ang pinaiksing quarantine na hanggang limang araw na lamang para sa mga fully vaccinated health workers na infected o na-expose sa COVID-19.

“That shortened quarantine is a big help for us since it allows us to have our health workers at an earlier date,” sabi pa ni Famaran.

Cagayan Governor Mamba at asawa nito, positibo sa COVID-19

ni Jasmin Joy Evangelista | January 17, 2022

Nagpositibo sa COVID-19 sina Cagayan Governor Manuel Mamba at asawa nitong si Mabel at kasalukuyang naka-confine sa Cagayan Valley Medical Center (CVMC) nitong Linggo.

Sa kanyang video message na ibinahagi ng Cagayan Provincial Information Office, sinabi ni Mamba na na-swab silang mag-asawa noong Biyernes, January 14.

Sa kanilang reverse transcription-polymerase chain reaction (RT-CPR) tests ay lumabas na sila ay positibo sa Covid noong Sabado, January 15.

Naka-confine ang mag-asawa sa isang isolated room sa CVMC dahil parehong may comorbidities, hypertensive and diabetic. Ang kaso nila ay mild lamang.

Parehong fully vaccinated ang gobernadora at kanyang may bahay at nakatanggap na rin ng booster shots.

Pinaalalahanan din ni Mamba ang kanyang close contacts na mag-isolate.

“We seek patience from you for not being able to answer your calls and texts as we are confined. Please pray for us,” ani Mamba.

Si Mamba ay kumakandidato sa kanyang ikatlo at huling termino laban kay Dr. Zarah Lara, habang ang kanyang asawa na isang abogado ay tumatakbo laban kay incumbent Rep. Joseph Lara, asawa ni Zarah, bilang third district representative.