TUTOK COVID-19

by BULGAR ONLINE | March 28, 2022

Para sa update, manatiling nakatutok: bulgaronline.com/tutok-covid19

Omicron sub-variant, posibleng nasa ‘Pinas na — DOH

ni Lolet Abania | March 16, 2022

Ipinahayag ni Department of Health (DOH) Secretary Francisco Duque III na ang Omicron sub-variant na lubhang nakaapekto sa Hong Kong ay posibleng nakapasok na sa Pilipinas.

Ito ang naging tugon ni Duque nang tanungin ni Pangulong Rodrigo Duterte hinggil sa posibilidad ng BA.2.2 sub-variant na aniya, “bumisita” sa bansa.

“There is a possibility, Mr. President,” ani Duque sa Talk to the People na ipinalabas ngayong Miyerkules.

Gayunman, sinabi ni Duque na hindi siya nakatitiyak kung ang sub-variant ay labis na makakaapekto sa bansa katulad ng naunang surge na dahil sa BA.2 variant. “So hindi pa natin masabi kung ito ho ba ay magdudulot ng ganu’ng ka-seryosong pangyayari katulad sa Hong Kong,” dagdag ng kalihim.

Tiniyak naman ni Duque sa publiko na ang vaccination rate ng bansa ay mas mataas kumpara nang sa Hong Kong, partikular na sa mga senior citizens, kung saan ilang mga researchers ay iniuugnay ang pagtaas ng mga kaso ng virus sa ibang mga bansa sa mababang vaccination rate nito.

“On the other hand, ‘yun po kasing vaccination coverage ng citizens sa Hong Kong mababa... so tayo mas maganda ang ating protection level,” saad ni Duque.

“We have experienced five surges... so that has also rendered out population some degree of protection as well. So from natural immunity and also from vaccination,” paliwanag pa ng opisyal.

Ayon kay Duque, ang vaccination rate ng mga seniors sa Hong Kong ay nasa 33% lamang. Gayunman aniya, patuloy ang DOH na mino-monitor ang sitwasyon ng bansa.

“Sa ngayon... wala pang natutuklasan na BA.2.2 sublineage sa samples na na-sequence ng Philippine Genome Center (PGC) sa ating bansa, pero patuloy tayo nagbabantay,” sabi ni Duque.

‘Pinas, nasa low risk na sa COVID-19 – DOH

ni Lolet Abania | March 15, 2022

Kinokonsidera na sa ngayon ang lahat ng lugar sa Pilipinas na nasa low risk sa COVID-19, ayon sa Department of Health (DOH).

“Magagandang balita dahil lahat po ng areas natin ngayon sa ating bansa, maski po ‘yung nasa ilalim ng Alert Level 2 ay low risk na ang kanilang classification,” sabi ni DOH Undersecretary Maria Rosario Vergeire sa briefing ngayong Martes.

Ayon sa opisyal, dumarami na rin ang mga vaccination rates ng ahensiya sa mga lugar na nananatili sa ilalim ng Alert Level 2, bilang bahagi aniya ito ng pagsisikap na maibaba na rin sila sa Alert Level 1.

Sinabi naman ni Vergeire na ang mga restriksyon sa Metro Manila at 38 iba pang lugar sa bansa ay patuloy na pinaluluwag dahil na rin sa mataas na vaccination rates at pagsunod sa mga minimum public health standards.

“Wala pa rin tayong muling nakikitang pagtaas ng kaso sa kahit anong lugar sa ating bansa,” saad pa ni Vergeire.