DOJ Secretary Remulla, nagpositibo sa test sa COVID-19

ni Lolet Abania | July 10, 2022

Ipinahayag ni Department of Justice (DOJ) Secretary Jesus Crispin Remulla ngayong Linggo na nagpositibo siya sa test sa COVID-19.

“I have COVID. Tested positive Thursday,” ani Remulla sa isang mensahe sa mga reporters. Gayunman, nakararanas lamang aniya siya ng “very mild” na sintomas.

“Very mild. But protocol is 7 days,” pahayag pa ng opisyal. Nag-anunsiyo si Remulla, ilang araw matapos na si Pangulong Ferdinand “Bongbong” Marcos Jr. ay magpositibo rin sa test sa COVID-19 nitong Biyernes, Hulyo 8.

Sinabi naman ni Press Secretary Atty. Trixie Cruz-Angeles ngayong Linggo na bumubuti na ang kondisyon ng kalusugan ni Pangulong Marcos, aniya, “with only mild symptoms with no fever, no loss of taste and smell sensation.”

1,825 new infections.. 13K aktibong kaso ng COVID-19 — DOH

ni Lolet Abania | July 10, 2022

Pumalo na ang aktibong kaso ng COVID-19 sa higit 13,000 na naitala nitong Sabado, batay sa datos na ipinakita ng Department of Health (DOH).

Sa latest report, ayon sa DOH, umakyat na sa 13,021 ang active cases, habang may nai-record na 1,825 bagong infections.

Ito ay tumaas, mula sa 12,528 active cases at 1,712 COVID-19 infections na naiulat nitong Biyernes.

Dahil sa naitalang bagong kaso, umabot na sa 3,716,522 ang natiowide tally ng naturang sakit.

Ayon sa DOH, ang National Capital Region (NCR) ay nakapagtala ng 7,228 bagong kaso sa huling dalawang linggo, kasunod ang Calabarzon na may 3,127 cases, Western Visayas na 1,349, Central Luzon na 1,228, at Central Visayas na may 645 kaso.

Marami namang mga pasyente ang gumaling na sa sakit kaya ang bilang ng mga nakarekober ay tumaas din na nasa 3,642,862, habang nananatili sa 60,639 ang naiulat na namatay sa virus.

Sinabi pa ng DOH, nasa 20.5% ang bed occupancy rate, na may 5,948 beds ang okupado at 23,098 beds ang bakante hanggang nitong Hulyo 7.

May kabuuang 19,944 indibidwal ang na-test sa COVID-19 nitong Hulyo 8, habang mayroong 323 testing laboratories ang nag-submit ng data.

DOH execs, pinulong... Obserbasyon ni P-BBM sa Omicron, suportado ng data

ni Lolet Abania | July 6, 2022

Nakipagpulong si Pangulo Ferdinand “Bongbong” Marcos Jr. sa mga opisyal ng Department of Health (DOH) ngayong Miyerkules upang kanilang talakayin ang COVID-19 response ng bansa.

Kabilang sa mga present sa naturang meeting sa Aguinaldo State Dining Room sa Malacañang Palace ay sina DOH Undersecretaries Maria Rosario Vergerie, Ma. Carolina Vidal-Taiño, Abdullah Dumama Jr., Lilibeth David at Assistant Secretary Maylene Beltran.

Sa parehong pulong ay dinaluhan din ng mga executives mula sa Inter-Agency Task Force for the Management of Emerging Infectious Diseases (IATF-EID) at Philippine Health Insurance Corporation (PhilHealth).

Ayon sa DOH, ang vaccination coverage at ilang inirekomendang mga istratehiya para mag-improve ang COVID-19 response ng bansa ang kanilang tinalakay sa nasabing meeting.

Naroon din sa pulong sina Executive Secretary Victor Rodriguez, Special Assistant to the President (SAP) Secretary Antonio Lagdameo Jr., Presidential Management Staff Secretary Ma. Zenaida Angping, at Department of the Interior and Local Government (DILG) Secretary Benjamin Abalos Jr.

Sa ngayon, wala pang inilalabas na ibang impormasyon ang Palasyo tungkol sa napag-usapan sa pulong.

Gayundin, wala pang itinalaga si Pangulong Marcos na DOH chief.

Samantala, sinusuportahan ng DOH ang statement ni Pangulong Marcos na ang mas nakahahawang Omicron variant ng COVID-19 na aniya, “a little contagious but does not hit as hard,” kumpara sa ibang variants dahil ayon sa ahensiya ito ay suportado ng data.

Ito ang tugon ng DOH, matapos na ihalintulad ni Pangulong Marcos ang Omicron sa flu, sa gitna ng pagtaas ng COVID-19 infections sa bansa sa mga nakalipas na linggo.

“The COVID-19 Omicron variant, though transmissible, does not result in more severe and critical cases compared to other variants. Data do support the President’s observation,” saad ng DOH sa isang statement.

“Only 1.8% of Omicron cases became fatalities, versus 5.55% among Alpha and 4.9% among Delta,” sabi pa ng DOH.